Singkungpi le Khualzinmi Nih
Agelh ~ En Khat Thang
Khat vei, khualzin mi nih gamzang kuam khat ah sun ni sat laitak hong tunguh a, lam phei pai ahih manun nem simthamin, nisa lelin hong tawl peuhmah uh hi. A gal gamla lualo khat ah mualbo no khat hong delh uh a, tua mualbo khen diakah Singkungpi khat hong gal muh uh hi.
Khualzin nih zong singkung liim beel dingin thasanin hong nawh pai in, singkung nuai ah hong tung petpet uh hi. Singkung nuai ah tawlnga in a tui puakte uh dawnin tawmvei sung hong khawl uh hi.
Khualzin khat pa in singkung tung lam dakto kawmin "endih ve lawm, hih singkung in gah a nei het kei mawk a, a teh nget nek theih ding cih bang dan nangawn om kei veh aw, bangci singkung hi lawmlawm a le?" ci-in a lawmpa hopih hi.
Alawmpa in zong "hi sa mah ing mataw, vasate nangawn in beel lo dan ahi ta ve, nek theih om lo singkung hi lo dia, kimanna nei lo singkung pawl hi ei" ci-in hong kithutuak dep uh hi.
Tua laitakin singkungpi hong kilokin, thu hong gen mawk hi. "Mihaite aw, kei pen hih zangkuam sung a uk Vantungmi kahi hi. No gel nisa lakah na gim, na tawl lamuh kong muh ciangin, singkung bangin ka lim nong belh theih dingun ka na om hi. Tua nangawn na lungdam thei kei uh a, na duhhop, na huaihamna lungsim uh tawh gah nei lo, nek theih om lo, kimanna nei lo ci-in nong gensia lailai uh hi" a cih khit ciangin singkungpi hong mang vingveng hiau hi.
Mihai khualzin nihte zong nisa lakah belh ding liim nei nawn lo-in kimlepam khuadakin a kampaute uh kisikin hong om ta uh hi.
Duhhop, huaihamna tawh a kidim mite pen bangzahtakin neih le lam kipiapia ta se leh, lungkim zo ngei lo uh a, deih beh beh lel ding uh hi. Lungkimna lungdam theihna pen bangzah hau, bangzah nei cihte tungah kinga lo-in, i neih peuhpeuh tungah lungkim zawhna tung bekah kinga zaw hi. I neih bangbang eite tawh kilawm kituak dingin Pasian in hong piak hi a, i hihna bangbang ah i lungkim theih leh hong pia Pasian zong lungdamin i kisap dangte hong piak beh thei zaw ding hi. Lungdam theih ding kisam hi.
Source:
Hih Thute Manpha Sa Lua Ni Teh (Laibu)
http://www.moralstories.org/the-travelers-and-the-plane-tree/
Laibu Saal / Zomi eLibrary
