Siktukilh
Agelh ~ En Khat Thang
Nidang lai-in, Billy kici pasalno khat om hi. A khuak hoihin, thu thei baih hi. Lungsim manlangin, na khat peuhpeuh pheklek hat diak hi. Pil mahmah napi in, Billy pen a lungtomin, heh baih citciat hi. A heh ciangin agei a om khat peuh tawng gawpin khut khial, khe khialin om kha zel hi.
Ni khat, a Pa in siktukilh thongkuah dim khat le sekpi khat pia in, "Billy aw, na hehsuah sim, na lungtom simin, Inn nunga dai khuam tungah siktukilh khat ta va khen in" ci-in sawl hi.
Billy in zong sang pah bilbelin, tua ni masa bekbekin dai khum tungah siktukilh 37 bang va khen zen hi. Tua bangin nisim a hehsuah sim va pai-in sik a khetkhet leh hong lungduai zawdiak thei hi. Damdamin dai khuam tungah siktukilh khetna ma hong kivang semsem hi.
Billy in ngaihsutna hoih khat hong nei thei-in, dai khuam tung sik ka va khet niloh sangin heh sedah ning in, sik khen lo-in om hilhial lel ning hong cithei bilbel hi. A sawt na ciang, ni khat bup bang hehsuak lo-in hong om zo ta hi. Billy zong lungdam takin a Pa kiangah "Pa aw, nisimin heh het lo-in om zota hing, tuin siktukilh khet kul nawn lo hi" cikawmin a siktukilh val pawl khat va apkik hi.
A Pa'n zong "Aw hoih ei ka ta, tua ahih leh ni khat tawntung lungtom lo, hehsuak het lo-in na om zawh simin, dai khuam tungah na khetsa siktukilhte khatta in va dokkhiakik oo" ci-in sawl zel hi. Billy in zong kha li khit khawng ciangin siktukilh dokkik hong zo siang in, "Pa aw, dai khuam tung siktukilh bangmah om nawn lo hi, tu in ka lungduai in ka heh nawn kei hi" va ci hi.
A Pa in Billy dai khuam gei ah paipihin, "hoih ei ka ta, ahi zongin, hih dai khuam ni dangin a zol dikdek hi a, tun ah na hehsuah sim, na lungtom sim a, na sik khetna ma, na sik dokkikna ma teng hangin dai khuam pen a vang tawh, a dep tawh, a tekgawp vele! ni dang bangin maap nawn lo-in, liamma tawh kidim mawk hi, na mu hiam?" ci-in a gen leh "himah ei Pa aw" ci-in Billy in dawng hi. A Pa in zom suakin;
"Tua mah bangin Billy aw, na hehna khat, na lungtomna khat peuh mi dang, na lawmlegual te tungah tu sakin, va tum kha, va dawt kha, kamsia va gen kha hi le teh hih dai khuam tungah na siktukilh khet mah bangin mi dangte in nasa in, liam na, baina in nei dinguh hi. Kisikin na va thumkik phial hang, dai khuam tung pan siktukilh dawh khiatna ma vang a om mah bangin, mite pumpi, lungsim sungah na hehna ma pen mang thei tuanlo-in kilang den ding hi ka ta aw!
Mihingte pen i kimlepam ah kikhawlhpih ding, thulela kikuppih ding, i lungdamna, haksatna, nopna, dahnate i puakpih ding, a manpha pen lawm hoihte a hi uh hi. Tua ahih manin ka ta aw, thu khat peuhpeuh hangin, lungtomin heh pahpah kha kei in, khut khial, khe khialin gamtat sawm peuhmah kei in, kimlepam na lawmlegual te pumpi ahi a, lungsim ahi zongin, situkilh khetna meima tawh a kidim dai khuam bang sak kha peuhmah kei in. Na lawmlegual te zong tua bangmahin, lungsim kikem siam zo dingin itna lak dena na makaih zawh ding hanciam tawntung in" ci-in thu a hilh hi.
Source:
http://www.moralstories.org/controlling-temper
Hih Thute Manpha Sa Lua Ni Teh (Laibu)
Laibu Saal / Zomi eLibrary
