SHUNEM NUMEI
Thupha dawhsiam Numei
2Kumpi 4:8-37
Agelh ~ Rev. Dr. John Thang Hum &
Dim Lun Zam
Hih Shunem numei a pasal min leh ama min ki genlo in, a tenna mun, Shunem, cih tawh ki thei hi. A nupa in Pasian it mahmah a, ahi zongin ta neilo uh hi. Hih numei pen neihsa kicing leh Pasian mite a-it thei mahmah numei khatin kithei hi. Tu ciangciang ih sin khitsa thute lak ah, Deborah pen makai, Hannah pen thu ngenngen, Abigail pen numei pil, Sarah pen thumang numei, cih bang a tuamtuam I mu hi. Shunem numei ahih leh hau in a nuamsa numei cih Lai Siangtho in gen hi.
Ahauh bek hilo in, cingh in, mi hehpih theihna na zong nei hi. Lungsim siangtho in, a sungtawng ah lungsim ginalo zong nei hetlo hi. A migitna hangin Pasian kamsangpa tungah thupha bawl a, tua thupha bawlna hangin a lunggulhden tapa ngah lawh hi (2 Kum 4:8-10). Hih pen Matt 10:41 ah ki gen, “Kamsangpa a ngai te in kamsangpa thupha ngah kik ding” a cih tawh ki tuak hi.
Shunem numei nu in mugil thu 3 nei hi:
(1). Lungkimna (2). Migitna, (3).Lungkiat theihlohna cihte, ahi hi.
Hih mugil thu thum te Lai Siangtho ah bangci kigen hiam? Cih enkik hi leeng:
Migitna
Pasian mipa Elisha a khualzin simin hih Shunem numei inn ah baangin, zan giak in anne in tawldam hi. Ahih theihzah in zinte nopsak dingin lupna pia in, an-leh-tui vak den hi. Paul in zong Rom 12:13 ah, thu-um ten zindo hahkat ding hong gen hi. Hih zindo hahkatna pen nidanglai Pasian miten a na zatzat ngeisa uh hi a, tuhun khangthak ah zoptoh ding Topa hong thupiak ahi hi. Zindo te nuntakna Pasian in thupha apiak kikna zong teci panna tampi iza ngei zel hi.
Pasian mipa nopsak ding, tawldam ding leh suahtak ding ut ahih manin inn tungah atuam vilvelin khan khat bawlsak hi. Hih pen thungaihsut siamna, Pasian tuampiak pilna ahi hi. Tulai Pasian thugente zong hi bangdan kisam mahmah hi. Suakta tak tawlngak theihna, thunget hithiat theihna khante kisam hi.
Lungkimna
Elisha in nikhat Shunem numei kiangah, “Hih zahtak a ko hong buaipih den cin-a, nang aading bang hong hihsak ding ka hiam” ci-in adot leh, ‘ka neihsa teng hawmthawh ingh in, deih beh lai ingh’ ci hetlo hi. “Ken, ka mipihte lakah, inn nei ingh,’ na ci kik hi. “Inn leh lo zong anei zolo mi tampi omte lak ah, ken, inn-leh-lo nei ingh, hampha ingh, bangmah kisam keng,” na ci hi. Pasian piak tawh lungkim in azat theih bangin zat khiat ding ngaihsun hi.
Paul in Timothy tungah, thu-um mite Pasian biakna sungah nuamsa a, a lungkim dinguh na gen hi. Tua bang nopsakna in ngahna lianpi piang sak thei cih nagen hi (1 Tim 6:1-10).
Tua bangteng agen laitakin, Elisha’ nasempa in, “Aman tapa neilo hi, a pasal zong teek ta hi,” ci-in ngaihsutna va pia hi. Kamsangpa in numei sam a, “kum kik tu banghun in nau natawi ding hi,” ci-in gen hi. Shunem numei in a-up zawhloh hangin kamsangpa cih bangin piang takpi in teek nungin Pasian letsong tapa khat hong nei hi.
Lungkiat lohna
Naupang hong khangin lo lam khawngah ki sawl theita hi. Khatvei lo lamah an late kiang apai leh thakhat in, “aw, ka lutang, aw ka lutang” ci-in kiko a, a Nu in zong thakhatin delh pah in a-angah tawi hi. Asawtloin naupang a-nu angsung pan hong si hi. Hih Shunem numei in kha galdona khat tuak hi. Hih naupang pa Pasian letsong pen Satan in haza lua in, va thah sak hi. Dawimangpa in, “gu ding, susia ding leh that ding” in hong pai hi. Khris ahih leh tuu-te nuntakna ngah bek thamlo in a dimtaka ngah nading in hong pai hi (John 10:10)
Shunem numei in lungkia hetlo in, Elisha kiangah asun-azan cilo in taai pah vingveng hi. Pasian mipa tawh aki muh ciangin athuteng gen hi. Elisha in a nasempa sawla, a ciangkhut naupang tungah akoih ding thupia hi. Nupi nu in ahihleh Pasian mipa mahmah a-pai teekteek ding ngen hi. Elisha in zong zui hi. Elijah in thungen a, tua pan naupang pa hong thokik in, anungta sa in a-nu tungah pia kik hi. Hih thupiang teng a mu hi leeng bangzah tak in lungdamh huai ding hiam?
Thukhupna
Pasian ih itna ih lah nop leh Pasian mite tungah thupha bawl ding ahihna ih mu hi. Khris in, “Ka mi aneu pen tungah thupha na bawl ciangin kei tungah hong bawl na hi hi,” (Mtt 25:24), tua bang mite in thupha ngah kik loin omlo ding, ci hi (Mtt 5:7).
Hih tangthu in, Pasian mite tungah i bawlzia ding, etteh huai mahmah thu hong musak hi. Pasian pen aneipa hi-a, aman hong pia kei leh bangmah i nei thei kei ding hi. Aman hong piak leh zong angsung khual in eimah bekin kepcip ding hilo aa, midang a kisam te zong hopsawn dinga hong piak ahi hi. Paunak Lai Siangtho ah, “Mi pawlkhat te ciil mahmah a, bangmah neilo hi; pawlkhat ten pia khia ziahziah a, nei semsem” (Pau 11:24) ci hi.
Tua ban ah, hih nupinu in aduhhop lohna leh a lungkiat theihlohna etteh huai mahmah hi. Tulai khangah mihing ki huaiham mahmah a, ki deih behbeh hi. Lungkim hun om ngei lo hi. Lungkim theihna pen nopsakna ahi hi.
A tapa asih ciangin a kiangah tu-in kapkap mawk lo-a, Pasian’ mipa kiang pai ding khensat semsem hi. Lungkiat ding ngaihsun vetlo a, Pasian in semthei cih upna nei hi. A omlo sungpan angah ahihmah bangin, a omsa pen Pasian in Lakhia kik loding cih upna nei in lungkiat sawm vetlo hi. Hih pen a etteh huai mahmah ahi hi. Luke 18 sungah, lungkialo-a thunget ding, nupi khat-i’ thungetna tawh hong genteh hi. Lungkia ngeilo mi-in zo veve hi cih thuciin i-za ngei hi.
Leitungah mipawlkhat in neih-leh-lam, thupha tampi saang hi. Ahi zongin Pasian in thupha a piak adeihna tello in, amah bek in humcip hi. Pasian in midang te sang a tamzaw in hong piak leh, i hawmsawn dinga hong piak ahi hi. Tua ban ah, Pasian mite (a nasemte) tungah piakna zong Pasian in ama’ tungah piakna in ngaihsun hi. “Kamsangpa angaite (asang te, thupha bawlte, a panpih te) zong kamsangpa thupha ngah kik ding” na ci hi (Matt 11:41).
Pasian in thupha i bawlnate manggilh ngeilo hi. Leitungah ngah ding kilawmte leitungah hong thuk kik a, vantungah ngah ding kilawmte vantung a ding in na koihsak hi.
Dotna
Shunem numei in kamsangpa tungah bang migitna lak hiam?
Pasian mite tungah migitna bangci lah theih ding i hiam?
Shunem numei in leitung neihsa tawh kisai bangci ngaihsut hiam?
A tapa sihna tawh kisai in bang ci sep hiam?
Kamsangpa in tua naupangpa bangci damsak hiam?
Kamsangpa in innsung tengah lamsiau in a paipai bang hih hi ding na ngaihsun hiam?
Thungetna in Pasian mite nuntakna bangci dan in hong huh hiam?
