SATHAU ZUAK A, LEIBA A LOH MEIGONGNU
Ahamsatna ah Kamsangpa ako thei numei
2 Kumpi 4:1-7
Agelh ~ Rev. Dr. John Thang Hum & Dim Lun Zam
Hilai ah a min leh a omna ki genlo meigongnu khat thu ih sin ding hi. Khatvei, Elijah’ sangnaupang ahi ngei kamsangte khat si a, azi leh a tate (ta pasal nih) leiba nusiat hi. Hih hun lai in leiba aloh zawh kei leh leibatna te in a tate laksak thei hi. Hih meigongnu zong a leiba a piak zawh kei leh a tate aki lak sak ding hita hi.
Jew te laigelhna khat ah, hih meigongnu pasal pen Obadiah hi, ci-in gen hi. Obadiah pen kumpi gilo Ahab hun lai-in kumpi innsung ah nasem Pasian mi khat ahi hi. Jezebel in kamsang te a thah ciangin, Obadiah in kamsang 100 te sel a, ama’ sum tawh anvak hi (1 Kum 18:4). Hih kamsangte anvak na ding sum a leitawi na pan leiba nei hi, ci-in laigelh pa in gen hi.
Hih pen man lian ding cih ki sang thei lo hi. Ahang pen, hih hunlai in, mihau leh mi thahat te in mi thazawng te, meigongte neh thawh in, a nate uh laksak ahih manin meigong tampi tak te cimawh in om uh hi. Topa Jesu mahmah in hih hun in Israel gam sungah meigong tampi om ahihna na gen hi (Luke 4:25).
Meigongnu a tate kilak sak ding hi ta ahih manin nak dah mahmah hi. A tawpna ah acih nading theinonlo a, a-pu (a pasal’ sia pa) Elijah tungah vako hi. “Leibat nate in ka tapa hong laksak ta ding hi,” ci-in vagen hi. Elijah in, ‘bang na nei hiam’? ci-in dong hi. Meigongnu in “sathau themkhat simloh bangmah nei keng,” ci-in dawng hi. Elijah in sathau omteng la sak a, thupha pia in, tuakhit ciangin beel hawm tengah sun ding gen hi. Ama’ neih belhawm teng banah a vengte-a zong kawm beh in sathau dim uh hi. A koihna ding beel a om nawnloh ciangin sathau taak nawnlo hi. Meigongnu in tua angah sathau teng khempeuh zuakin a leiba teng a loh ding gen hi. Tua bang dan in meigongnu in aleiba teng loh khin siang hi.
Thukhupna
Sih nungah innkuanpihte leiba nusiat pen vangbelhloh thu khat ahi hi. Ahi zongin hih kamsangpa in bangci banga leiba nei thei hiam? cih i thei kei hi. Tulai Pasian nasem tampi te kidawm loin sum athangzat na hangin leiba nei om a, pawlkhat te Pasian nasepna ding sum leitawi la-a, leiba nei zong om thei hi.
Moses thukham ah leiba ineih leh kum sagih na ciangin leiba teng maisak ding thu om hi (Thuhilhkina 15 sim in). Hih pen thu-um mite sungah a zat huai mahmah khat ahi hi. Ahi zongin, mihing thumanlohna leh cihtak lohna hangin leiba ki kinlo ahih manin a hunleh athu khinkhai a, sep ding ahihna zong ki mu hi. Leiba I neih leh leibat nate tungah sila ki suak pah hi. Meigongnu in hih thu tel a, manlang takin loh nuam ahihna ki thei hi. Kamsangpa in azi leh a tapa neih leh lam nusiat lo hi. Ahih hangin thugil a nutsiat pen Pasian muanna (Pasian’ sila, kamsangpa muanna) ahi hi. Pasian mipa in thupia leh na khat piang ding cih lamen hi.
Makaih sinna khat ah, tuhun pawlpi sungah sumvai buaina kikupna khat om hi. America ah thu-um mite in sum ngah na ding leh hauhna ding gengen pen paikhialhna lian mahmah khat hi a, pawlpi a-it taktak pastor te in piakkhiatna thu a gen mah bangin thu-um mite in bangci dan a budget tawh pilvang tak-a zeek-a, nungta ding cih hilh na pen pastor te hih zia ding a man ahi hi, ci-in gen hi. Elijah cih bangin nial sawmlo, uplahna zong nei lo hi. Hih pen nalamdang pianna ding thu gil ahi hi.
Dotna
Meigongnu omna khua bang hi a, a innkuan omdan bangci hiam?
Hamsatna a tuak ciangin bang sem hiam?
Elijah tawh bangci ki theih hiam?
Leiba neih loh ding tawh kisai bangci na ngaihsut hiam?
