SAPFIRA
A Pasal’ zuauphuah
Athukim pih Numei
SAWL 5:1-11
Agelh ~ Rev. Dr. John Thang Hum &
Dim Lun Zam
A pianzia
Sapfira pen Hebia pau hi a, “suangmanpha”, “etlawm”, “hoih” cih bangdan khiatna tuamtuam nei hi. Ezekiel 28:13, Lucifer mel hoihna namkim tawh kidim pen sapphari meel ki ci hi. Tuhun lai-a puan pawlkhat Sapfira min avawh om a, zong hoih phadeuh se mah hi. Hih numei nu zong tua bangdan in min kipua sak hi. Laigelh khat in hih numei nu hoihna amit tang sungah kilang hi, ci hi. Ahi zongin amel hoihna leh etlawm na pen puatham bek na hi a, sunglam laigil aneilo singhawm tawh na ki bang hi.
Sapfira pen bangci banga, a pasal Ananias tawh kiteng cih a cingin i thei kei hi. Pasal pawlkhat te melhoih iplah nam om a, Ananias in Sapfira mel hoih amuh ciangin a nuntakzia zong encik tektek khollo in ngailua ahih manin tenpih hi thei mai ding hi cih a ngaihsun zong om hi. Hite pen ahithei thu vive hi a, Lai Siangtho in siangtak a hong gen hilo ahih manin mittawh sialkhau let in ki len thei lo hi. Ahi zongin kamsiatna khatah, a nupa un zuauthu gen ding ki thukim hi. Hih pen adahhuai thu khat ahi hi. Lai Siangtho thu atel theih mahmah khat in, “hih bang gitlohna (zuauthu phuakna) pen numei sungpan kipan masa den hi. Eve in gulpi khemna thukim a, a pasal Adam tungah a-na hopsawn bangin, hih Sapfira leh Ananias tangthu zong hi lua ding hi,” cih dan in gen hi.
Nungzui te omzia
Nungzuite in Topa vaikhakna sem in, lungdamna thu gen a, lim leh nalamdang in nasiatak in zui hi. Hih hun pen vantung kumpi gam khuahtak aki zelh nading kal masa, hun masa hi a, nungzuite upna pen ciim sitset in, leitung tawh them zong ki sawh lo hi. Kha Siangtho in na asep ciangin, khauhtak in sem hi. Cina damin, misi tho hi. Alang khat ah thukhenna zong khauhpai mahmah hi. Ahang pen gospel, singlamteh thu asianthona, avangliatna lah na ding ahi hi. Nungzui te in aneihsa te zuakuh a, nang a, kei a, cih bang om lo-in zangkhawm, nekhawm, dawn khawm uh hi. Hi bang nuntakzia pen thu-umlo mite lak-ah omlo ahih manin, thu-umlo mite in eng mahmah uh hi.
Zuauthu gen
Pasian mipa khat in a genna ah, Pasian gam kikeek a, dawimang pan ama’ gam suplawh ahih manin nak heh mahmah a, pawlpi leh amite a suksiat zawh nading lampi tuamtuam zong hi. A pualam pan hong pai taksa bawlsiatna tawh ahi zongin, a sunglampan khemna tawh ahi zongin pawlpi suksiat ding kipan hi, ci hi. Dawimang pa pen amin mahmah “zuauthei te’pa” kici a, zuauthu akici khempeuh ama’ kiang pan hong pai hi. Lei piancil pan kipan zuauthu genpa ahih manin siam lua mahmah ta a, kua tungah, bangci gen ding cih thei hi. Tua ahih manin thuman, thutak, Pasian kammal leh Kha Siangtho tawh kidim lo mite zawhnop sa mahmah hi.
A pasal, Ananias in aneihsa leitang zuak a, angah khempeuh sungpan kim khat khen in sawltakte tungah aap hi. A kigen ciangin angah vekpi a piakhia dan in gen uh hi. Alo a zuakkhit ciangin a sum ngahteng a mau’ a ahih manin, apiak nop leh amau thu, a kep nop leh amau thu mah ahi hi. Ahi zongin azuak khempeuh sungpan kimkhat khen napi avek pi a piakhia bang dan a kigen pen zuauphuahna ahi hi. Mite maiah maipha ngahnopna ahi lel ngel hi. Sawltak te in hihpa in zuauthu gen ahihlam theipah uh a, adot phatphat ciangin, avekpi hi ci teitei hi. Tua bang asep uh pen azi tawh a ki thukim uh ci hi (Sawl 5:2).
Nungzui ten sittel
Peter in hih zuauthu genna pen mihing tungah zuau hilo in, Kha Siangtho tungah azuau ahihna uh tel gen hi. Tua mun lianah Ananias pukin sipah a, tangval ten aluang pua khia hi. Tua khit ciangin Sapfira va tung leuleu a, a pasal tungah bang teng piang cih theilo in, a zuauphuahna thukim pih hi. Tua mun lianmah ah Sapfira thakhat thu in tuuksuk pah leuleu hi.
Pawlkhat in Sapfira leh Ananias pen Peter in a hamsiat sa uh hi. Hih mun ah thupianzia pen, thukhenzum ah thusit bang dan a, teci nih leh thum te thugenna ngai in tua pan thukhen pawl hilo a, Kha Siangtho’ teci panna (theihsakna) tawh aki pholak ahi hi. Hih pen Pasian nasep ahi hi. Pasian in a kikhel theilo, pianpih thulaigil guk nei a (Munkhempeuh ah om, Na khempeuh thei, Na khempeuh bawl thei, Itna dim, thuman thutak tawh dim, a Tawntung nungta, Kikhel ngeilo) cih bangin Lai Siangtho in hong gen hi. Itna Pasian ahih manin mihing bawlin nahoih pen pia hi. Thuman Pasian ahih manin athu aki man ding ut hi. A thupiak khat ki zui kei leh thuman tak a thukhen Pasian ahi hi.
Zuau gen nopna bang pan hong piang hiam? Ei mah leh eimah kihuut nopna, mite thupi sak ding utna, mite etneu ding launa, angsung khualna, midangte siat ding ngaihsutna, sum duhna, cih te pan hong piang hi. Judas in Topa a zuaklai in khemna zang hi. Sum deihna pan kipan a, Topa zuak ding dongin khemna in hong zo hi. Kuamah in to nih na semkhawm zolo ding hi, tua bang hi leh khat mudah a, khat it ding hi, ci hi. Sum duhna, zuau khemna, kineih khemnate satan vanzat hi a, tuate in Sapfira leh Ananias te kai paai uh hi.
Thu-um mite tungah ahi a, pawlpi sungah zuau genna pen Kha Siangtho tungah zuau genna ahi hi. Kha Siangtho icih in Pasian ahi hi. Mihingte kikhemzo kha dinga, ahi zongin Kha Siangtho kikhem zolo hi. Amah in lungsim tawng dongin amu Pasian ahi hi. Kha Siangtho pen ikhem sangin, “ hong entelin, ka ngaihsutna, ka sungah nadeihlo a om kha hiam,” ci-in David bangin gen leng, amah’n hong huh nuam, hong siangtho saknuam, thahatna hong guan Pasian ahi hi.
Pasian kihtakna khang
Sapfira sihna hangin bang phattuamna piang hiam? Ananias leh Sapfira sihna hangin Pasian kihtakna thu-um mite lakah hong piang hi. Pasian in, sisan tawh alei sa a pawlpi a siangtho dingin hong deih hi. Lai Siangtho encian te in, hih Sapfira leh a pasal sihna pen pawlpi a siangtho a kepna ding a kisam thu hi, ci in gen uh hi. Tuhun laizong hi bangdan thu tampi om hi. Pasian in a pawlpi siangtho sak nuam ahih manin hepkhiatna, kisitna, siantho sakna bawl zelzel hi. Jeramy Tylor in, “Tawntung nuntakna tawh kipelh loh nading in, leitungah daan tahna, sihna, hepkhiatna thuak huai hi,” ci-in gen hi. Kolose 3:10 ah, khat leh khat zuauthu ki gen loh ding hong gen hi.
Dotna:
Sapfira innkuan thu na theih zah gen in
Sapfira leh a pasal in aneihsa uh azuak lai in kikupna anei hiam?
Sawltak te tungah lo zuakman a piak ciangun bang ki thukim uh hiam?
Zuau genna bang pan hong piang a, bang deihna nei hiam? Na lawmte tawh ki kum in.
Zuau gen na thaman bang piang hiam?
Pasian kammal in zuaugenna tawh kisai bangci gen hiam?
Zuauthu na gen ngei hiam? Na gen ngei leh kisik kikna tawh Pasian kiang na thum ngei hiam?
