SALOME 2
(Thu telmel takeileh a tate
mailam ding aphut sak numei)
Matt 20:20-24;27:56;Maku 10:35-40;15:40-41;161,2
Agelh ~ Rev. Dr. John Thang Hum &
Dim Lun Zam
Hih Salome pen ngasa beng siam, nasem dang te zong akawmzo pa Zebedee’ zi ahi hi. Jesu in ngabeng kim lai, anungzui ding asap ciangin, Johan, James ten a pa nusia in azui pah uh hi. Hih khatvei zuih masak pen lawpvatna (emotion) khat nei hithei ding hinapi atawp dongin zui suaksuak cih pen lungsim lawpvatna ciang bek hilo in, thuman thutak atelna uh hang ahi hi. Tate in anuntak zia ding a teelna ah nu leh pa thuzawhna zong tampi kihel hi. Tua ahih manin John leh James te in Khris nung a zuih suakna uh pen anu Salome teelna zong hi ding cih ki ngaihsun hi. Topa bangzah it hiam cih leh hun nunung singlamteh ah a sihna mun dong azui numei ahi hi. (Lk 23:28). James in Topa ading sihna thuak a, John zong Mangmuhna laibu gelh hi.
Tate mailamding khuat pih
Kuama dang omlo, hunkhat ciangin, Jesu kiangah atate nih (James leh John) vapai pih a, Khris kumpi asuah ciangin atate nih ama’ nuai a thunei munte a piak ding ngen hi, (Matt 20:20-21). Hih ngetna pen khamit tawh vantung kumpi dong muto a ngetna hi masa lo hi. Hih hun in mi khempeuh in Jesu amuh zia pen, Rom kumpite khut sungpan honkhia a, a Jesu mahmah leitung kumpi a hong tu ding cih upna ciang hi lel hi. Ahi zongin Topan’ adawn na ah, “Nong nget thu na thei kei hi,” ci masa hi (Matt 20:22). Tua mun pen thuakna tawh ki lei hi a, no, tua ahih leh thuak zo ding maw ci-in a dot ciangin, “thuakzo mah nung,” ci in zong na dawng kik hi. Anung ciangin James in Topa min tawh thahna nathuak a, John in zong Topa min tawh thong khiatna, sikbel sungah ki huanna zah dongin na thuak hi. Hih bang zah cianga Topa a up theihna pen anu Salome upna hang zong ahi hi. Salome in upna gina leh a khauh anei numei ahi hi.
Vantung mite tawh ki mu
Thawhkikni zingsang numei pawlkhat tawh Jesu’ han ah paknamtui koih ding ava pai uh leh vantungmi in na dawntuah in na hopih hi. Hih thu acingin Matt 27:56, ah en in. Vantung mite thu nidangin athu bekin za ngei ding hi ta leh tu-in amit mahmah tawh va mukha hi. Vantung mite in, “No te in athokik Nazareth khua mi Jesu nazon lamuh ka thei hi. Amah sihna zo a thokik khin hi, hihlai ah omnawnlo hi”, ci’n na gen hi (Maka 16:1-4). Hih muhna leh kammalte anuntak laiteng amitkha leh a bilkha te ah mangthei nawnlo ding hi. Mikhat in agenna ah, lai tawh I sim na leh, a taktak a I tuahkhak pen ki lamdang mahmah hi. I mit tawh ih vamuh khak teekteek pen cikmah ciangin ki manggilh ngei nawnlo hi, cih gen ngei hi.
Thukhupna
Salome leh a pasal Zebede in atate Jesu nungzui a, kipumpiak ding aphal ngam na uh pen a lamdang, etteh huai mahmah thu ahi hi. Mihing in na isep zawh laiteng mailam nuntak ziading tuazah pi in ki lunghimawh lo a, kumtam ciangin, kei bang kaci tam, ka taten hong en kik tam, cih ngaihsutna te ki nei hi. Hih hun in Jesu nungzui cih pen nakhempeuh nunglam ah koih khia a, sih ding theisa a kizui ahi hi. Hih bang thu te paltan zo a, tate Pasian gam ading pia khia ngam Salome upna pen etteh tak mahmah ahi hi.
Dotna:
Salome innkuan thu gen in?
Atate in Jesu nung azuih theih na ding bangci huh dingin na ngaihsun hiam?
Jesu a-itna bangci lah hiam?
Vantung mitawh a kihona gen in.
5. Atate ading tutphah, min leh za angetna, na bangci muh hiam?
