SALOME 1
(Kamsangpa Johan
sihna ding-a kizang numei)
Matte 14:6-11; Mark 6:22-28
Agelh ~ Rev. Dr. John Thang Hum &
Dim Lun Zam
Salome min pen “lungsim zulhzau, busim, liim ah kisel” cih bang tuamtuam khiatna nei hi. Salome pen Herodias in a pasal masa Philip tawh aneih tanu ahi hi. Tangthu gelh Jehosephat in agenna ah, Salome in Philip ten pih masa a, tua khit ciangin Aristobulus, Herod tupa ten pih leuleu ci-in gen hi. Herodias tangthu sungah I gen khit mah bangin, Salome in Herod suahni in gamuk uliante maiah vaidawnna in laam a, Herod lungdam lua in bangdeih na hiam? Cih adot ciangin anu’ thu mangin kamsangpa Johan lutang dalkuang sungah angen nu ahi hi.
Salome tuazah tak a ki pahtakna pen, laam siam in, ama’ maitang ding khuat a, uliante mai et thei khat ahi hi. Hih Herod suahni in Salome ava laam ciangin Herod ading agam ukpih mite maiah maipha lianpi ngah lawh hi.
Salome in Pasian mipa’ sih nading alungsim ah om peuhmah lo ding hi. Ahi zongin anu sungah hehna, thangpaihna, maizumna om a, Johan tungah phulak ding a ngaihsutna bei theilo hi. Tua ahih manin ama’ liim beel a, abu khinkhian atanu zangh in a hehna phula ahi hi.
Tua hun lai in, mun pawlkhat te ah, tanu te nu-leh-pa in amau angsung khualna linlian bek tawh a pumpi uh kizuak ding sawl a, tua tawh anungta om hi. Hih pen adah huai mahmah ahi hi. Salome zong tua bang dan a kizangh ahi hi. Herodias in Kamsangpa Johan phu alak nop sawt ta a, hunhoih azonzon laitak, bangci leh a pasal, Herod thuzawh zo ding cih a ngaih sutsut lai tak, a tanu kivakh na zanglian in nasem hi. Dawi gilo ten zong hi bang dan in thu-um mite hong encik tawntung hi. Mihing kivakh na nei mahmah khatpeuh zangin I tungah nasem thei hi. Numei in zawhlah neilo hi. Salome ahih leh anu leh apa kikal ah vanzat khat ahi hi. A laam theihna ding hunpha zong anu bawlsak mah hi ding hi. Dawimangpa pen thu gelsiam mahmah a, ama’ mizat te zong khuavak tate sang pilzaw lai, ci hi (Luke 16:8). Lai Siangtho sungah, laamna tawh kisai in, a siangtho, Pasian phat a, laamna om a, ci leh sa tawh kipawl pawibawlna leh laamna, zudawnna, tua pan in nu leh pa om khopna leh milim biakna om in, kizom den hi. David in Pasian thuciam singkuang amuh in nak lungdam lua in laam hi. Late sungah zong laamna tawh Pasian phat ding zong hong hanthawn hi. Pasian pahtawina laamna in suahtakna hong piak mah bangin ci leh sa utna tawh lamna in zong siatna hong tun thei hi.
Tulai leitung sangte ah laam sinna (lesson) khatin bawl uh hi. Hih laamna pen khat guak laam na hilo in neih kibanglo (opposite sex) kithuah a laamna hi zaw hi. Amau ngiimna ah, social club te ah lam thei ding cihna hi. Nitum nalam gamte ah nungak tangval ten night club leh social club te ah pai in nu ngak tangval laamkhawm a, tua pan in amau zi ding pasal ding ngah uh hi. Tua bang hih thei kei leng, mibang zolo cih ngaihsutna om hi. Sangte pan nu leh pa te tungah lai kipia zel a, naupangte nalamsak nuam hiam, cih dotna na om zel hi. Tua pen (no) ciziau leng aa-naa tawh hong hih theilo hi. Eima teel theihthu ahi hi. Jesu nungzui ten leitung gualnopna, leitung miten acihziate ih nial theih nading thubul kiplet (principle) i nei hi.
Thukhupna
Herodias in kamsangpa tungah phu lazo kisa kha ding hi. Ahi zongin Pasian in thu a khen ding lam muto lo hi. Salome ahihleh nu-leh-pa liim ah abu khinkhian, amailam ding atheilo numei no khat ahi hi. Ahi zongin tel lohna tawh ahoihlo na sepna in thukhenna pan hong pengsak tuanlo hi. Pasian kihta lo nu-leh-pa neih khak pen naupangte ading kaamsiatna taktak ahi hi.
Dotna:
Salome innkuan sung om zia gen in.
Nang Solome hi le cin a, na nu in na ut loh khat sem ding hong sawl ding hi leh bang na cih tam?
TV sung khawngah gualnuam a laamte na muh the bangci nasa a?
