REV.DR. KHAI KHAN SUAN' TANGTHU (A TOM IN)
Gualnam (Halkik) beh, Pu Ling Za Thang leh Pi Kham Hen Niang (Taithul beh) sung panin June 7,1956 ni-in Thangzang khua ah suak hi.
Pianpih Sanggamteng
1. Tg. En Cin Pau (Tangvalno in si)
2. Sm Cing Ngaih Man - Rev. Gin Khua Thawng (Naulak)
3. Pa Kham Suan Mung - Nu Vial Khawm Mang (Taangpua)
4. Rev. Dr. Khai Khan Suan- Sm En Ngaih Lian (Naulak)
5. Sm Hau Go Cing - Rev. Gin Za Lian (Sukte)
6. Rev. Zen Khan Khup - Sm Mo Yesey (Kayin)
7. Rev.Dr.Hang Khen Dal - Sm Man Suan Lun (Sukte)
8. Rev.Dr.Tual Lian Tuang - Sm Vung Hau Lun Cing (Gualnam)
9. Nu Don Zam Dim - Pa Tin Aung (Kawl)
A Pianzia, Pilna Zon'na leh Pasian' Nasepna
Pian na: Pa Ling Za Thang leh Nu Kham Hen Niangte’ sung panin Thangzang khua ah June 7, 1956 ni-in suak hi. Aneu lai-in damlo a, zong si ngei liang ahih manin a nu leh a pa in Pasian tungah, “Nong damsak kik leh nangma’ nasem dingin hong ap nung” ci-in a ap uh ahi hi.
Innkuan: Agust 9, 1991 ni-in Gamlai khua mi, Sakollam venga teeng, Pa Zam Kho Thang leh Nu Khup Khan Cingte’ tanu, Sm En Ngaih Lian tawh kiteeng in, tanu 6 leh tapa khat nei uh a, Pasian’ piak a Tedim inn ah teeng uh hi.
Pianthakna leh sangkahna: March 31, 1973 ni-in piangthak a, a pianthakna hangin Tuiphum Pawlpi in Rev. Hau Lian Kham leh Rev. Vial Kho Hau te tawh Pawlpi panin hawlkhia khawm uh hi. Evangel Bible College, Yangon ah kah a, 1988 kum Kawlgam bup buaina hangin zom thei nawnlo hi. Ahi zongin Rhema Bible College for Mission (Kalaymyo) panin B.Th ngah hi.
Pasian’na sepna: A pianthak ciangin ama’ thu in Pasian’ na sem kawikawi a, hat lo ahih manin sakol tung tuang kawm sa-in a pa in paipih kawikawi hi. A zu a ham thuak in anguai pua in Lungdamna Thu tangko hi. 1978 kum March kha a kipan Rev. Hau Lian Kham tawh Pasian’ na semin Pawlpi kem khawm hi. Sia Khambawi in Yangon Evangel Bible College ah Siapi a va sep 1979 kum June kha 26 ni pan tuni dong Tedim BAG Pawlpi ah Senior Pastor sem hi. Ama thugenna tungtawn in mi tampitak in gupngah kitel in piangthak uh a, mi tampi mah in ama thugenna tungtawn in Pasiam nasem ding in sapna ngah uh hi.
Pastor a sep kawm mahin Tedim Section EP, District No. 3, Yangon ah 1979-1986 kum dong Vice Superintendent sem hi. 1993-2002 kum March kha dong Kawlpi District No. 4 zum ah hunbit Superintendent sem hi. 2011 kum Kawlgam bup AG General Council panin Tedim District No. 7 hong piak uh ciangin Siapa mah District Superintendent tavuan(vaipuak) pia uh a, 2011-2013 kum sung DC No. 7 Superintendent sem hi. 1993-2011 kum dong Kawlgam bup AG GC EP sem hi. 2006 kum in Tedim khua Pawl Namkim Thunget phuankhia a, tua a kipan tuni dong Pawl Namkim Thunget ah makaipi sem hi. Hih Pawl namkim thunget pen khasim in kiginni(Saturday) nihna ah kibawl den hi.
Ordination (Siampi zaa) ngahna: 1980 kum April kha ni 6 ni-in District in License Minister pia a, 1987 kum February kha 12 ni-in General Council in Putao ah Ordination pia hi.
Pahtawina ngahna: Ama’ Pasian nasep nasa teng leh a lawhcinna hangin Bethel Bible College, Tedim pan 1995 kum in B.C.Min. kipia hi. Tua banah Christian International School of Theology (APTA) in Malaysia Kualalumpur khuapi pan 2007 kum, February kha 25 ni-in Doctor of Divinity pia hi.
Rev. Dr. Chin Do Kham’ vaihawmna tawh Tedim Christian Fellowship te innteek in TBA tual ah December 11-13, 1998 sungteng Lungdamkoh Pawipi kinei in Zomi sungah pahtawi huaite pahtawi piakna zong kinei a, tualai ah Pasian nasem lawhcing Pahtawina kipia hi. Tuhun teh a tuntunna ah a sepna sate hangin Topa min tawh na ki pahtawi kawikawi hi.
Gamdang paina: 1995 kum in Singapore, 2004 kum in India, 2005 kum in Singapore, Malaysia, leh South Korea, 2007 kum in Malaysia, 2008 kum in Malaysia, 2009 kum in USA, 2010 kum in New Delhi, India, 2015 kum in Malaysia leh USA ah cih bangin gamdang mun tuamtuam ah Lungdamna Thu gen dingin sapna ngah ahih manin pai kawikawi hi. A paina gam peuhpeuh ah mite a’ding thupha suak in lawhcing mahmah hi.
Siapa in June 17, 2021(Thur), zing nai 1:30 am hun in i Topa' kiang ah hong ciah san hi. B AG pawlpi-in innteek vaipuak la-in June 17, 2021 (Thur) ni biakinn ah hun kibawl in, Peniel thungetna mualah kivui hi.
Source:
Bethel AG, Tedim facebook page
