Pu Tuan Cin Tawh Kimeelhekna
US ah Ka Muh Khak Pawl Khat (Azom)
Agelh ~ Awn Za Pau
Ka sangkahpih ka lawm Tuan Cin USA hong tun lim mahin Full Gospel International Church pan Sya Cin Thang in interview a bawlna pan ko kiang Tulsa khua hong tun lam ka thei pah hi. Amah mi meek siam mahmah in mi tampi zong a dam theisakpa ahih lam ka thei hi. Sangkahpih ka cih hangin tan 8 tan 9 ka kah lai un amah Arts lam zui hi a, ken Science la ka hih manin ka lai sinna uh khan kibang lo hi. Ka mangngilh man ahih kei leh amah tawh khat vei beek zong kiho kha ngei in ka ki-um kei hi. Ahi zongin Sakollam sangpi ah bel ka mu zelzel tham hi.
Tulsa hong tun lam ka theih ciangin kei mahmah in ka ka kan kawikawi a, a tawp khakna ah amau inn dong ka va hawh thei hi. Ka kimuh ngawngaw uh ciangin papite’n “Khan In Gual Nei” acih bangmah linlian hi a, ka kiho dan uh bulh tawmtawm, gelgel tawmtawm niloh kullo in ka kihogualnuam pah lian uhhi. Azi Lailo khua pan na hi lailai a, dot ding gen ding hong kicing mahmah ahih manin ka kimuh cil mah un ka gualnuam pah takpi mah uhhi. Ahi zongin anupi Pi Thawng Man, (ken Nu Man ci ing), kiangah Saizang khuapi ah na kinaiipih penpen ding uh kuate ahi tam cia ka dot leh agen ding ami kuammah na thei nawn lo hi. A mah mawh lo hi. Saizang khuapi pan Lailo khua pen kum 1900 ma 1875 kum pekpek khawng a, khua na saat uh ahih manin, 1900 kum zawh ciang a khua saat thak Sezang, Teeklui, Tualzangte zahin kizopna gangg zo nawn lo hi. Mualpi khua pante zong 1900 kum khit ahih hangin kikawmna gamla lua mahmah ahih ciangin khat leh khat kikawmna tawm mahmah ta hi.
Tua bek hi lo in Tulsa khua a om a tapa Khaipi (Khup Thawn Khai) zi Nu Vungsan zong Tedim sangpi ah tan 8 tan 9 ka sin lai in Sya Lian Za Thawn in Ni-nga ni sim a, Math. I homework hong piak den pen, kei Ninga ni simin khua ah ka ciah a, Nipi khuavak ni in ka zing delh hi. Sang ka tunphet in ka lawm Kham Lang kiangah ama homework bawlsa teng ka tei ngeekngeek a, tua vive tawh kinamtak ka hihi. Tua ka ganan teina lawm Kham Lang pen Khaipi zi Vung San ii papi taktak na hi ta lailai hi. Tua zawh akipan kei ka hawh thei zelzel hi. Ahih hangin ka lawmpa pen Tulsa khuasung bek hi lo in mundang gamke a tuamtuamte ah cimeek dingin khual va zin kawikawi thei zel ahih manin, ka kihawh ding zah uh ka kihawh man zo nawn kei hi. Amah zong lah a om sunsun ciangin, amanlah banah a nunung ciangin nu Man zong a cidamna hong kiam semsem hi.
Khat vei peuhmah amau nupa va pi in ko nupa tawh kiholim khopna kibawl zo leh kacih simsim zawh a sawt hangin, kei nupi lah Amazon ah asep laitak hi a, man hun om thei ngei mahmah lo hi. Ka lawmpa in zong khat vei mahmah zong ka inn hong siik kha nai lo ahih manin, ke’n ka va sap theih pah loh ciangin, February 24, 2023 ni in Khaipi kikhasak in ka innah amah kia hong hawh vingveng hi. Nu Man in hong zui lo maw cia ka dot leh dam pha meel lo a, ngap taktak meel lo hi veh aw hong ci hi. Kei lah kei guak bekmah ka om laitak hi ta sawnsawn hi. Tawmvei ka kiho zawh uh ciangin Portland a ka lawm Mungno uh zong hopih in ka thum un kakihokha thei bilbel uhhi.
Ganan homework a teitei kei bek ka kisak leh ka lawm Mungno zong lawm Tuan Cin kiangpan ama bawlsa homework a tei natengin ka laibu bang sia niknek bek hi ci’n tua ni mahin hong gen hi. Hi lai ah gen tawh kizomin pulaak pak leng, Tuilangh khua panin Ganan siam mahmah 2te lak ah ka lawm Kham Lang tawh bel tan 8 tan 9 lai pek leh RIT ka tun ciangin kum 4 sung mah kithuah ka hih manun, khuapi tuipih ahih zenzen loh hangin, a sawtvei penpen ka kithuahpih ka lawm manpha taktak dingin ka ciamteh hi.
Kawlpi ah Chin College ka lam lai in ka thallohpa inn ding Saizang khuapi ah ka lamsak hi. A sem a bawl dingin khuapih lettama siam sanggam meltheih tampi mah om mah ta gegu se leh Tuilangh lettama te mah deihin muangin ka lamsak uhhi. Nasep sep dan leh a gel kholh dan siam mahmah uh a, a khutma uh zong hoih in nasep zong telh mahmah uhhi.
Nu Man In Hong Nusia
Nu Man a dam loh sungin zato zong a na lum zelzel ahih hangin ken ka khuanung theih zelzel bek ahihi. Tua mahmah zong Portland a ka lawm Mungno in hong theihsak ciang bek a, a thei pan ka hi den zel a, ahun aphat in zong ka veh zo man ngei kei hi. Tua bek hi lo ka nupi tawh zong khat vei talek zong akimu kha nai lo tuak uh ahi lailai hi. Nu Man hong nutsiat lai in zong ka lawmpa Pa Cin pen si gal mi honpite mai ah, thugen kampau zong siam mahmah in maimial het lo takin maitai takin zong thugen thei a, thupisa in pasal kician mahmah khat in ka ciamteh gige khat ahihi.
Ka Lawm Tuan Cin In Hong Nusia Vat Leuleu
Nu Man in hong nutsiat khit zawh ciangin, amau inn zongah ka hawh thei vat tuan kei hi. A kha khat bang hong cin ciangin, ka lawmpa pen cidam mahmah lel hi ci’n zong ciamteh ka hih manin, a inn ah ci meek nuam khat leh nih kitatsat lo in a om hamtang dingin ka ngaihsun sim gige hi. Nu Man nuntak lai in hopih leng nu Man in na len masa in, amah’n kamphen hong sem pahpah hi. Ama om loh ciangin amah zong a bil hoih nawn lo ahih manin, ph tawh hopih ding zong ci meek a, a manlah laitak peuh ahih khak ding khualna tawh athupi lua ahih kei leh ci’n ka hopih kha ngei kei takpi hi.
Amah pen kei ngaihsutna dan bang na hi hilhial lo in, kei theih loh kal zel mahin Zato nih vei bang a na tung na hi ta leuleu hi. Tua mahmah zong ka lawm Mungno hong gen ciang bek mah a ka theih ahihi. Kei zong tutung peuhmah zato a ka veh loh in piang lo ding hi ci’n St Francis zatopi Room # 4516 ah August 10, 2023 ni Thursday ni in ka va veh hi. Ama kiangah ka tun ma in ka maiipuak dan ding zong ka seh kholkhol hi. Maii puam/gum ngeungau a om sangin amah bangin maitai takin om leng hoih zaw ding ci’n ka khensat hi. Ka ho masak dan ding zong koici ho leng ama a’dingin lem pen ding cih zong ka ngaihsun kholkhol hi.
Ama kiang ka tun petpet ciangin amah leh a naupa (Pa Nang, Nang Khan Khual) bek a om laitak tawh kituak ngelcel hi. Hong muh limin amah’ na lungdam petmah in a naak akibulh oxygen bulhna lakhia liangin hong hopih pah saisai hi. Kei kiginnate khempeuh zat kullo in amahmah in hong makaih pah ziau hi. Cina vehte in amah a lungnopsak zawk ding sangsikin, amah’n cina vehte hong lungkim sak hong lungnuamsak zaw behlap hi. Adang bangmah ka dong thuah thei tuan kei a, oxygen diik kei lecin na naak dan nuam zo naii lo maw cia ka dotteh, bulh kei leng naak haksa mahmah ei ci’n hong dawng kik hi. An zong kam lim zo taktak kei tawmtawm bel ne zo saap ing hong ci hi.
A cidam mahmah, a maitai thei mahmah midangte tawh kiho kizop dan a siam mahmah ka lawm Cin in ka nat veh zawh ni thum ni ciangin, gitneih hethet loh laitak mahin hong nusia vat miau khong hi. Hong nusiat ni Nipi Ni hi a, ama sihnop ni zong Nipi Ni mah hi ta sawnsawn hi. Nu Man zong Nipi Ni mah a, si ahihi. Anupa in kha 2 bek kihal hi. Tua hun sungin ama sih ciang a kiphumna ding a zi gei ah lei khol hi. A mualsuang dingin zong ama maan leh Nu Man maan suang khawm hi. Vaphual nupa kimaituah in suang hi. Ama sih ni bek gelhthuah ding bekin na koih khol dildel mawk hi. A taktak ama sih hun ding amah leh amah in (instinctively) athei khol dan na hi gige mawk hi. Hihte khempeuh kha 2 sung a, a tate in a bawlsak kholh vive ahihi.
Hih lai kong gelhna pen ka lawm Tuan Cin leh Nu Man, Pi Thawng Man ka phawkna cia kong gelh ahihi. A zenzen in a luang om lai in thugen la gen hun khat ngah thei kha zenzen hi leng zong hih zah kan kong pulaak thei tuan kei ding hi. Topa’ in a om lai atu atate a sanggam meltheih khempeuh tung thupha namcin hong buaksuk kim ciat ta hen.
2022 Kum Sung a Liim Kilaakna, February 24, 2023 a Liim Kilaakna
