PU HATLANGH TANGTHU
Pu Hat Langh khangsimna a nuai a bang ahi hi.
Sing On Kawlpi pan Laihan khuasat & Hausa
Han Thang Laihan Hausa
Ngal Hat Laihan Hausa
Thang Um Laihan Hausa
Hat Langh Laihan pan Ciimnuai, tua pan Dimpi khua Hausa
Kawlpi ah Sing On te unau a ten laitak un anau pa in zan-in mang lamdang khat man hi. Amang sungah, “Zang-a teng, u zaw, Ni’ siam, Kham a teng nau zaw Kha’ siam” ki ci hi. Hong khanlawh ciangin anaupa in hih ka mangmat bangin ka u kiangah gen leng, kei pen Kham ah teng ding, leh a zawngzaw ding ka hih teh ka u khem ning, ci-in hong ngaihsun hi. A U kiangah tu zan ka mangin “Zanga teng nau zaw, Kha’ siam, Kham-a teng u zaw, Ni’ siam” ci in Pasian in thu hong hilh hi, hong ci hi. Tua ciangin Sing On in a naupa Kawlpi innluah sakin, amah Khamtung ah kahto a, Laihan Khua hong sat hi. A pu a pa lamsa dakbu minthang thum: Tuiluang, Tonkai, Nuaisuk te zong Kawlpi inn ah kemsak hi.
Hun khat khit ciangin Laihan aa om te in Kawlzang aa a sanggam tawh ki sim dingin thu zasak uh hi. Hih thu a zak ciangin, Kawlzang a te patau mahmah uh-a, acihna ding a theihloh uh ciangin Laihan a te thu zasak in, hong sim kei un la, i dakbu minthang te hong pia nung, tua ban ah, kumsim in buhtang, siah kong pia ding uhhi, ci-in gallem na dingin na thum uh hi. Tua ahih manin gal kisim na om nawnlo a, Kawlpi te in dak min thang thum leh kumsim in Laihan te tungah buh, siah na pia uh hi.
Sing On in tanu tapa cingtak in nei a, Laihan khua sat pa ahih na tawh a innluah ding pa min dingin Laihan khua tamsak in Han Thang sa hi. Han Thang khan teh, gal leh sa mat, a khangual in pha lo ahih manin a innluah ding pa min dingin Ngal Hat sa leuleu hi. Ngal Hat khan ciangin zong galmat samat ahi zong annek tuidawnleh neih leh lam, akhangual ten phalo semsem ahh manin a innluah ding pa min dingin Thang Um sa hi. Thang Um khan ciangin galmat samat leh neih leh lamh a khangual in pha tuan lo ahih manin a tapa te min dingin: Hat Zaw, Hat Langh, leh Hat Lei sa hi. Amau unau teng, Laihan khua a ten sungun, Khuapha in, khannuam, khan hau in, mikicing, tha kicing leh galhat in a gualzo te ahih manun Tedim khua Tedim khuataw Nahten khua na sim uhhi. A zawh hangun mi that lo, inn hal lo in, siah nekna bek in bawlin siah kai uh hi. Hi ci bangin u nau thum, Hat Zaw, Hat Langh leh Hat Lei te in a mit ciat uh vawhin beh min thum in a ki khen uh ahi hi.
Hun khat khit ciangin Laihan khua ah natna khat hong tung ahih manin mi tampi hong si hi. Tua ahih manin Laihan ah kuamah teng ngam nawnlo in hong ki thehthang uh a, pawlkhat te Ciimnuai lam hong zuan hi. Ciimnuaipan in Pu Hat Langh makai in Dimpi khua hong sat a tua lai ah Hausa hong sem in siah hong kai hi. Khuainun siah leh Ci khuk siah zong na kai hi. A siahkaihna dung zui in anuai a bangin la na phuak hi:
Sak en leng kenliang aw, khang en leng sihkhuk aw ee;
Kasih khuk sangin bawm e, ka ken liang khuai in bawn ee;
Siksan : Col. Khen Za Moong (Retd.) “Tedim Pan Zangkong”
Source :
Global Hatlangh Organization
