PRISCILA
(Kivak na ding zong a, a pasal
tawh Pasian na a semkhawm numei)
Sawl 18:2, 18, 26; Rom 16:3; 1 Kor16:19; 2 Tim4:19
Agelh ~ Rev. Dr. John Thang Hum &
Dim Lun Zam
Priscila min in taanglai vai, etlawm, deihhuai cih bang khiatna tuamtuam nei hi. A pasal min Aquila hi-a, anih tuak un Jew minam hi in, Rom gammi hihna nei tuak uh hi. Anu leh apa min leh ama’ innkuan thu ih theihloh hangin a pasal tawh ki bangin Pontus khua pan piang in khangkhia hi dingin ki ngaihsun hi. Rom kumpi Claudias in (AD 41-54) Jews minam khempeuh Rom khuapi sungpan a hawlkhiat lai in amau nupa zong a taikhia pawl ahi hi. Jesu Khris thu bangci zak uh hi ding hiam cih a kigen na ah, Pentecost pawi siim dingin hong pai mite lak ah amau zong kihel hi ding a, tua ni-a Peter’ thuhilhna pan akikhel hi dingin ki um hi. Ta aneih lam kigen lo ahih manin amau nupa thu cih simloh a innkuan pih dangte thu ki thei lo hi.
Khut tawh nasep hah kat
Hih Priscila leh Aquila te nupa pen nasep a hahkat mahmah mite ahi uh hi. Puan khui sem in nuntakna kivak uh ahi hi. Puan khui pen nasep tuamtuam te lakah sum ngahna piang nasep, cilgil nasep nam zong ahi hi.
Nupa ki thutuak
Nabal leh azi Abigail banglo in, hih nupa te ki thutuak ngiat te ahi hi. Amau thu a ki gen ciangin anih in amin ki gelh khawm den hi. Tua ahih manin na khatpeuh a sepna, a hawh, a ciahna ah khat bek tangtat vauvau selo a, anih in semkhawm cih ki mu hi. Ta aneih ki gen lo a, ahih hangin pumkhat suak uh hi. A ngaihsutna te uh ki kelki cih bang omlo hi. Tua ahih manin ahih na peuhpeuh uh adau pai hi.
Paul tawh ki thuah
“Gip zong leh khuai zong kituak” a cih bang khat in, Corinth khua sungah sawltak Paul tawh hong kimu khawm uh hi. Paul zong puanbuk khui nasem kawm a, Pasian thugen hi a, hih te nupa zong puanbuk khui leh Pasian nasep ahihtheih zah a semte ahi hi. Paul in a nasepna ah a lungkiat hun zong tamveipi tak om a, lawmngai mahmah thei hi. Hih hun laitak in, upna kibat pih leh nasep ki bappih nupate tawh ki muh khop pen Paul ading zatui hoih mahmah suak hi. Paul in zong a khualzin nate ah ki thuah pih hi.
Mi pattah siam
Ephet khua ah aom laitak Apolos va pai in Pasian thu vagen hi. Apolos thugenna angaih uh ciangin tha ngah mahmah hi. Lungdam takin a inn uh ah Apolos sam in, Pasian thu acing zawin gen beh hi (Sawl 18:27;19:1). Priscila leh Aquila in hih bang ahih theih nading Lai Siangtho tampi atheih uh kul hi. Lai Siangtho theihna zong ama ut tawm thu tawh hong piang hilo in, hahkat leh zon mahmah kul hi.
Inn pan pawlpi ki pan
Aquila leh Priscila ten nupa leh a-inn a kikhawm pawlpi mi khempeuh in zong note hong hopih hi (1Korin 16:19). Mi honkhat inn ah hong pai zel ding a, ki mutuah zel cih pen vai lianpi ahi hi. Zindo zia leh lengla muakzia siam kul a, mite nopsak theih ding in omzia te bawl kul hi. Nek leh dawn zong a piak ni om ding hi. Hih nupa te in Pasian it a, maitang zahtakna tawh phunlo puamlo in, thu-um mite a inn ah kikhopna bawl sak in, thuman thutak lampi na hilh hi.
Thukhupna
Hih Priscila leh Aquila te’ thu aki gen ciangin (mi) khat bek ki genlo in, anih in amin kilo khawm den hi. Amau mahmah tawh nasem in, amau kivak tawm in Pasian nasepna ah ahihtheih zah in mapang ahihna ki mu hi. Paul in thu-um miten midang te tung pan lamen lo in, amau khut mahmah tawh sem in, a neilo midang te zong piak ding hong hanthawn hi. Leitung mun tuamtuam ah zong kumpi nasemte leh, sum bawlna nei tuamtuam pawlkhat ten zong in a paipai na uhah, kumpipa na asep kawm in, nuntakna ding zong kawm mah in Pasian thu zong na gen a, pawlpi na ngawn phut khia uh in lawhcing mahmah uh ki mu hi.
Dotna:
Priscila leh a pasal Aquila in Jesu bangci muh hi ding hiam?
Pasian na asep zia uh koi ci bang hiam?
Paul tawh bang ci ki muh hiam?
Evangelist Apollos tawh bangci kimuh a, Pasian thu bangci hilh beh uh hiam?
Priscila te nupa bang dan a, amau kivaak tawm a, nasem na thei a om hiam? Bangci sep uh hiam?
