PILATE MANGPA ZI (CLAUDIA)
A Pasal In Jesu tungah
thu akhen loh ding agen numei
Matt 27:19
Agelh ~ Rev. Dr. John Thang Hum &
Dim Lun Zam
Pilate mangpa’ zi min pen lungdamna bu 4 te sungah kician takin a kigelh loh hangin “Nicodemas Gospel” kici laibu dang khat sungah hih nu pen a min Claudia ci-in kigelh hi. Hih min pen 2 Tim 4:21 ah, khatvei bek ki gen hi. Hih Claudia pen Rom khua a thu-um mite lakah upna kician mahmah anei numei khatin kigen hi.
Pilate mangpa zi asuahna
Pilate tawh bangci kimuh cih a kigen na omlo hi. Ahi zongin mipil, mihau nam sung pan hong pai hi dingin ki ngaihsun thei hi. Pilate pen za nei, leitung hauhna, minthanna anei khat ahih manin azi ding zong numei tampi lak pan a, a ki tel tuam ahi hi.
Pasian zahtakna nei
Hih Claudia pen minam dang pan Jew biakna zui asuak mi khat hi dingin ki um hi. Minam dang te Jew biaknazui asuah na uh a hang thu tuamtuam om hi. Solomon kumpi pa’ hun lai in, ama’ pilna hanga amin thanna leh Jerusalem ah biakinn en ding mi namdang te a pai ciangin Pasian vangliatna mu kha a, Jew biakna zui a suak zong om hi. Hih Claudia zong lampi khat teitei hangin Jew Pasian amuh na khat om hi ding hi.
Jesu tawh kisai amang sungah ki hopih
Mang pen Pasian in mite a hopihna vanzat khat ahi hi. Job in, Pasian in mite mangmatna leh mang muhna tawh hopih hi, ci in gen hi (Job 33:15). Hih Pilate zi zong Pasian in mang tawh hopih hi. Amang sungah Jesu in Pasian mi siangtho ahihna ki langh in, ama’ tungah thukhenna abawl loh ding, akhut angak loh ding, a pasal Pilate kiang ah va gen sak hi. Pilate in zong azi genna hang mah hi kha ding, Jesu suahtak theih na ding lam pi zong hi. Ahi zongin mipi a kihtakna hangin piang sak zolo hi.
Jesu nungzui suak
A pasal Pilate in Khris a san loh hangin, Claudia Jesu nungzui suak hi. Jesu in honpa ahihna a mang sungpan kician takin mu khin hi. “Topa hoihna ciam un la mu un” (Late 34:8) ah acih bangin Khris hoihna a ciam kha mite nungkik nuam nawnlo hi. Paul in Timothy a lai khak na ah, Claudia leh numei pawlkhat leh misiangtho ten zong hong hopih cih gen hi. Catholic pawlpi te leh, Ethiopia gam a pawlpi te in Claudia pen misiangtho Claudia ci-in min pia uh hi.
Thukhupna
Hih Pilate zi (Claudia) in Pasian hopihna nak tel mahmah a, a pasal tungah zong gen hi. A pasal upna sungah angah loh khak zenzen hangin, hih mi dikpa (Khris Jesu) tawh kisai bangmah thukhen kei in a vacih pen teci panna lianpi hi khin hi.
A pasal sih khit ciangin zong, leitung lam ah pai lo in, Pasian nasepna sung ah ki-aap in pawlpi makai muanhuai khat a, a omna zong thupi mahmah leh, etteh huai mahmah khat ahi hi.
Dotna
Claudia in bangci bangin Pasian upna sungah om thei hiam?
Amang sungah Pasian bang ci bangin ki langh hiam?
Pilate in Khris bangci hotkhiat sawm hiam?
Pasian in mite tungah mang sung pan hong kilah ciangin bang hih ding hong deih hiam?
