PHILLIP TANUTE
Kha Siangtho’ Letsong
Tawh Pawlpi Sungah Nasemte
SAWL 21:8-9
Agelh ~ Rev. Dr. John Thang Hum &
Dim Lun Zam
A pianna uh
Hi lai ah min kigelh lo, Pasian in kamsan theihna letsong apiak, numei 4 thu i sin ding hi. Amaute amin hong kigen loh hang, lungdamna thupuak(evangelist) Phillip tanu te ci-in kigen hi. Philip pen nungzui masate lak ah khat hi a, Topa Jesu in nungzui ding a telte lakah khat ahi hi (Mk 3:16-18). Jerusalem pawlpi kipat in upa in zong kikoih hi (Sawl 6: 1-5). Hih Philip mah zangin Samaria ah khanlawhna piang hi (Sawl 8:48). Kha Siangtho in Ethiopia mangpa khualzin a sakolleeng tungah lungdamna thu gen dingin Philip zang hi (Sawl 8:26-40).
Azi leh a tanute’ min a ki genloh hangin, Pasian gam ading a ki-ap leh alawp vilvelte ahi dingin ki ngaihsun thei hi. Philip pen azi si baih a, meigong hi kha thei ding hi. Ahi zongin, a mah leh a tanu te’ nasepna te ih muh ciangin, Pasian aa ding in, pumpi, thatang leh pilna, neihsa sitlo in na asem te cih ki thei hi.
A omzia uh
Hih unau numei li te, pasal neilo, nungak bit, ci-in kigen hi. Hih nungak siangtho cih kammal tawh kisai in, pasal neilo cih ciangbek hilo in, anuntakzia leh a lungsim ngaihsutna mahmah siangtho, lungsim kihhuai nate tawh kisawh khalo cihna hi. Lungsim ah tulai a, khangno lungsim zaulenna, kidek zawhlohna (sexual fantacy) cih bang zong om vetlo cihna hi. Mikhat in acih na-ah, taksa-a angkawm lohna tawh numei siangtho (virgin) kici theilo a, lungsim mahmah ah zong ngaihsut khak lohna pen virgin hihna hi, ci hi. Tuhun khangthak te sungah hi bang dan lungsim siangtho ding haksa mahmah ta hi. Ahang pen lim hoihlo etna tawh lungngaihna kinei in nuntakna ki ninsak khin hi. Hih bang dan in khanggui siantho’ lohna leh hamsiatna i tungah hong tung hi.
Kamsang uh
Kamsang pa Joel in, hun nunung ni a, mikhempeuh tungah Kha Siangtho aki buak na’ng leh, numei pasal in kamsan theihna angah na ding gen khol khin hi (Joel 2:28). Kamsanna cih ciangin, mailamthu genkholhna, thanemte tha piakna, Lai Siangtho tawh hansuahna cihte kihel hi. Hih unaute khualzin lo in Cesaria khua pawlpi sungah na sem hi. Pawlpi in phat tuampih mahmah uh cih zong kithei hi. Kamsang nasep cih pen, abaihlo nasepna khat ahi hi. Pasian in gen ding asawl thute, kuamah maitang zahtak neilo a, gen ding ahi hi. Tua banah lungsim siangtho zong kisam mahmah a, a tuacih theih nading nisim a, Pasian kammal tawh ki dimna, ki-apna leh ci-leh sa singlamteh ah thahna kisam den hi. Cih nopna ah nuntakna siantho kul hi .
Thukhupna
Hih Philip leh a tanute’ nuntakzia pen enhuai mahmah hi. Tulai Pasian nasemte haksatna pen, Pasal (pa) in kipiak khiatna khauhtak nei napi, zi leh tate in panpih zolo thei hi. Tua ahih manin Pasian nasemte deihzah in lawhcing theilo hi. Hih innkuan ahih leh a nu leh a pa thupha luah khawm uh hi. Joshua in, “Kei leh ka innkuan ten Pasian na ka sem ding uh hi,” acih pen amaute tungah kimu thei hi. Tua hi a, hih Philip tanute bang dan Pasian it leh ana asem nuam mi kisam hi hang.
Dotna
Philip nuntakzia atom in gen in. Kamsanna i cih bang hiam? cih gelh in.
Lai Siangtho mundangte zong tawh bulhtuah in gen in.
Philip tanu li te nuntakzia bang dan hi ding cih gen in.
Banghang khualzinzin se lo a, a pawlpi sungah nasem lel cih na ngaihsutna gen in.
