PETER
Suangneu ci a kisampa
Nungzuite min sazian a kigelh simin peter pen a masa pen hi den hi. Nungzui sawmlenih lakah makai hi-in Peter ci-a i theih pen ahi hi. Thuciamthak sungah min thum nei hi.
A masa in Simon ci’n amin om hi (Mk. 1:16; Jn.1:40- 41). Tua in ama min taktak ahi hi. Matthai in “Peter kici Simon” ci hi (Mt. 4:18; 10:2) Simon cih min pen a innkuanpihte sapna min hi. Tua banah Marka le Luka in Simon’ inn “Simon’ sunghnu” (Mk. 1:29-30; Lk. 4:38). luka in “Simon gunkuang, Simon lawmte” ci’n gen hi. Korneleas pen vanmi in Peter kiangah pai ding a sawlin Simon kiangah thu va dot phot ding ahi hi. A tom in “Simon Peter kiangah” cih ahi hi. (Sawl. 10:5, 18; 11:13). Jesuh in thupi deuh a kikholhna a neih uh ciangin Simon ci’n sam zaw hi. Jesuh in tuithukna lamah gunkuang hot dingin a sawlin Simon ci’n sam hi (Lk. 5:4). Amah a nial ding thu agen laitakin Simon ci’n zang hi (Lk. 22: 31). Gesthsemane huan thungetna ah Simon ci’n sam hi (Mk. 14:37). Ama naihuai tengin simon ci’n sam ciat uh hi. Luka in simon gunkuang ci hi (Lk. 5:3-10).
Thuciamthak sungah Peter pen simon ci’n nihvei kiat hi. A mah mah Simon ci’n kisam hi (2Pet. 1:1). Simon cih pen Hebru kam a min bulpi hi, simon cih pen Simeon cih pan Gential-te i sap dan ahi hi. Jerusalem Pawlpi Laibu sungah Peter pen Simeon ci’n ciamteh uh hi (Sawl. 15:14) Tua hi in Hebru mite i sap dan limlim ahi hi.
Bang hangin Simon pen Peter ci’n kisam se hiam? Jesuh in Peter pen Simon ci’n minthak pia hi (Mk. 3:16; Lk. 6:14). Johan lungdamna thu sung i et ciangin Simon ci’n a sap kikna ciantak in i mu ding hi. Andru in a u Simon Jesuh kiangah a paipih lai-in Jesuh in, “Johan i tapa Simon, nangin Kefas (sifas) hong kici ding hi”, ci hi (Jn.1:42). Kefas leh Peter cih pen min khat hi napi’n namnih a sap theih ahi hi. Jonah cih pen Gam vakhu cihna hi a, Kefas le Peter cih pen suangneu cihna hi. Tua manin Jesuh in Peter kiangah “Tu laitakin lungsim moilai, lungsim ngek lai mi, launa a nei bang na hi lai hi; ahi zongin tuin ken nangmah hong nei in, na nuntakna ka tungah nong piak a, ahih leh suang bangin kong bawl ding” ci hi. Jesuh in Peter tungah minthak a piakna pen ngaihsutna leh tupna nei -in amai lam ding ngaihsutsakna tawh a piak ahi hi. Peter cih min pen lungdamna thu gelhte in minlui leh a minthak gawmin Simon Peterci’n at uh hi. (Mt. 16:16; Lk. 5:8). Johan in Peter min pen minnih kopin na tam zat pen hi. (Jn.1:40; 6:68; 13:6, 7, 24, 36;18: 10, 15, 25; 20:6; 21:2, 3, 7, 11, 15, 17)
Peter le Kefas a kibang hi, ci’n i gen zo hi. Peter pen Greek min hi-in Kefas pen Aramaic kam hi-in suang cihna veve ahi hi. Tanglai hunin mi khempeuh phialin Greek pau zang uh hi. Tua manin min nih nei kim uh hi. Min khat pen Greek min hi-in a nasepna mun ua zat ding, min khat pen inn sung leh lawmlegualte kikal a zat ding ahi hi. Tua manin Thomas pen Didima ci’n sam uh hi. Aramaic pau in Thomas hi-in Greek min in Didima hi, a cihnopna ‘unaupeeng (tjrTm) hi, (John 11:16) Aramaic kamin Tabitha pen Greek kamin Dorcas hi-in Dorcas in min nih nei hi. (Sawl. 9:36). Scotland gammi mualtung mite’n zong hih bangin nei uh Goelic minin John, Hamish minin James ci’n sam hi. Mi khat min veve ahi hi. Paul in Peter a hopih simin Kefas ci’n sam hi. (1Kor.1:12; 3:22; 9:5; 15:5; Gal. 2:9) Peter pen Jew te kiangah a kikhah ahi hi. Tua manin paul in Peter pen ama Jew minin a sam a hi hi (Gal 2:9).
Nungzui sawmlenih lakah peter pen i theih pen ahi hi. Tua in Peter leh Marka a kinai man uh hi ding hi. Peter in a laikhak masa a at in “ka ta pa Marka” ci hi. (1Pet. 5:13) Peter pen Marka i lungdamna thu tawh kinai pen hi. Hirapolis kumpi Papias in kumzalom nihna kipat lamah lungdamna thubute bangci at in koici gawmkhop uh hiam? cih thu na kan ngei hi.
A mah in Marka lungdamna thu pen bangci bangin at hiam? cih a genna ah:
Marka in Peter i kamphenpa hi-in a theih khempeuh lai-in hong at hi. Jesuh in bang semin bang gen cih pen a banban in gen lo hi. Jesuh zui ngeilo ahih manin Jesuh paute theilo hi; i gensa bangin a khak bellamah Peter’ i nungzui suak hi. Mipi kisap dandan in peter in thuhilh hi. Topa’ thugente a zak a ciapteh bang danin hong at hi. Tua manin Marka in a theihna ciang a at hi-in khialhna neilo ding hi; a theih khempeuh sit neilo leh behlap neiloin kidawm takin sem hi. Hih thu i theih ciangin Marka lungdamna thu pen thudang hi loin Peter thugen teng ahi hi. Bang mah ipcip nei loin at a, peter a zahtakna kilang hi. Peter in ama khialhnate, Topa in a kawknate, upna kip loin a omnate pawl genin Marka in agendan lianin at hi. Peter in Jesuh Khris i ngaihsiamna, maisakna bangzah in lian cih a kilatsak nop man a pulak khin ahi hi.
Peter pen ngabengpa hi-in a gunkung leh a ngamatna ngen tawh a om laitak Jesuh in sam hi (Mk.1:16). Zi nei hi. (1Kor. 9:5). A inn pen Kapernaum ah om in Jesuh Kapernaum lam a pai ciang Peter inn pen a tunna mun uh hi ding hi, cih upna om hi. Jesuh Biakinn panin Peter innah pai in Peter sunghnu damsak cihna om hi. (Mk. 1:29-30; Lk. 4:38; Mt.8:14) Peter pen Galilee mi hi-in, Galilee mi lungsim taktak nei hi. Tua hunin Galilee a uk Mangpipa pen Jisefas hi-in Galilee mite pianzia hoihtak a thei ahi hi. Galilee mite pen a thakthak a lawp a deih, a kikhel nuam, lung kimlohna a neih uh leh kitom pah, Makai hoih a neih uh leh zui pah, do ding a om leh zong dopah, a lungsim uh manlangin, tomin, buaina piangsak pahpah uh hi. Tua banah galhangin, si-ngam uh hi. (Josephus Life, 17; Wars of the Jews 3, 3, 2.).
Talamud kicipa in zong Galilee mipawl hi bangin gen hi; “Hih mite in meetna’ng leh phattuam nading sangin minthanna leh mi i zahtak hih ding bek ngaihsun den uh hi. lungtom in, lungsim manlang, heh baih, sap ol, a tawp ciang diktak a om theite ahi uh hi. Peter pen tua bang lungsim nei mi ahi hi.”
Peter pen a sawt loin nungzui sawmlenihte lakah makai suak hi. Matthai in nungzui sawmlenih sazian a at ciangin hi bangin pan hi, “A masa in Simon” (Mat. 10:2). A masa cih kammal ah protos i cihnop pen “masa pen cihna hi-in “upa pen” cihna zong ahi hi. Tua manin Matthai in nungzuite thu a at ciangin mawk at loin, cihnopna nei a, peter pen nungzuite lakah a makai, upa pen” ahi cih kilangsak hi.
Nungzui sawmlenih lakah Jesuh tawh a kinai pen mi thum omin Peter, James, Johan ahi hi. Hihte pawl pen Jairus tanu thawhkiksakna ah om uh hi (Mk. 5:37; Lk.8:51). Jesuh mel kikhelna ah zong om uh hi (Mk. 17:1; Lk. 9:28). Gethsemani huansungah zong om uh hi. (Mk. 14.33; Mt. 26:37). Jerusalem khua-ah a nunung pen Pasian pawi a vaihawm dingin peter leh Johan sawl hi (Lk. 22:8).
Lungdamna thubu siksanin gen leng nungzui sawmlenih lakah a pau mun pen ahi hi. Gentehna tomnonote adeihna a dong mun pen zong amah hi (Mt. 15:15; Lk. 12:41). Bang zahvei ciang mawhna maisak ding cih thu a dong zong Peter mah ahi hi (Mt. 18:21). Neih khempeuh nusia in Jesuh nungzui leng bang ngah ding cih a dong zong amah ahi hi (Mt. 19:27). A zing ciangin apaina uh ah paikik in theikung a na sihna thu a dong zong peter mah ahi hi (Mk. 11:21). Jesuh in mihonpi lak panin hong lawng kua hiam? cih a dot hun a, a na dawng pen zong Peter hi (Lk. 8: 45). Jesuh a thawhkik nung thu a dong zong peter mah ahi hi (John 21: 20- 22). Biakinn kisiat ding hun a dong zong Peter hi (Mk.13:3). Phiangsiah piak ding a dong zong Peter hi (Mt.17:24).
Thuciamthak sungdanin peter nuntakna i kan ciangin tua sungpan ciin ding tampi kimu thei hi.
Theihna muhna lianpi:
Hih theihna lianpi cih pen lungdamna thubu thumte sung leh lina lungdamna thubu sungah om hi. Alina lungdamna thubu in bangci gen hiam? cih leh: Jesuh in mi tulnga an a vaak ciangin Jesuh pen a siampi dingun koih sawm uh a Jesuh in na nial hi (Jn. 6:1-15). A tawpna-ah mi tampite “Note zong na ciahkik nuam uh hiam” ci’n dong hi. Tua ciangin peter in “Topa aw, ciah le ung kua kiang zuan mawk ding ka hi uh hiam? Nang mahin nuntak tawntung nading thu na nei hi. Siangthopa na hih kong thei uh hi” ci’n thu lianpi a muhna gen hi (Jn. 6:66-69).
Johan lungdamna thu sunga kigelh thu sangin lungdamna thubu thumte sunga kician zaw hi. Jesuh a hun a nai ciangin a galte’n naih deuhdeuh hi. A taisan khit ma un Jesuh pen kua hiam? cih a thei a om ding kisam mah mah hi. A taisan khit maun Jesuh pen kua hiam? cih a thei a om ding kisam mahmah hi. Tua manin a nungzuite saklam gam Sisaria Filipi khua-ah hun tomno sung tawlnga dingin paipih hi. Tua munah kinai tak in om uh a, thuhilhna nei hi. Tua khitteh thu dong hi, “Keipen mite in kua hong ci?” ci’ndong a, pawlkhat in tuiphumpa Johan, Pawlkhat in Elijah, Pawlkhat in Jeremiah, Pawlkhat in kamsang khat hi, hong ci uh ci’n dawng uh hi. A tomin Jesuh in hi bangin dong kik hi, “Note in kei kua nong ci ua leh” a cih ciangin Peter in. “Nang pen anungta Pasian’ Tapa, Khris na hi hi” ci hi. Peter in thei ahih manin suangneu cihna ngah hi. (Mt. 16:16-18).
Thuciamna Lianpi:
Topa Jesuh pen Pasian’ Tapa ci’n Peter in agen khit ciangin, Jesuh in Peter kiangah “nangin suangneu na hi a, hih suangpi tungah ka Pawlpi ka phut ding hi,” ci hi. Peter pen Jesuh Khris kua hiam? cih a thei masa pen ahih manin Pawlpi sungah thu um mi hong lut beh ciang thuciamna kammal a ci masa leh Topa Jesuh’ Pawlpi ah Pawlpimi masa pen suak hi. Tua manin Peter in Pawlpi i bulpi suangtum ahi hi. Peter in hih bang lungsim a neih manin a Khristianpihte pen, Kha thulam inn lamna dinga kizang suang i hi ciat a, Peter in tua suang i bulpi ahi hi (I Peter 2:5).
Kihilh kitaina Lianpi:
Peter in hih thu a gen zawh a sawt loin Jesuh in mailam a, a tuah khak ding, sihna ding thu gen hi (Mtt. 16: 21; Mk. 8:31; Lk. 9:22). Peter in tel zolo leh deihlo lua ahih manin “tua bang piang kei ta hen”cin a nial ciangin Jesuh in, “Satan aw ka kiangpanin taikhia in,” ci’n taihilh hi. Hih kitaihilhna pen khauhlua mahmah ahih manin gencian kul hi. Amasa in Peter lampan enin tua teh Jesuh lam pan i en ding hi. Jesuh in asihna ding thu a genkholh ciangin Peter lunghimawhna namnih pha hi.
Itna hang ahi hi. Peter in a nuntakna khempeuh tawh Jesuh it hi. Tua manin Jesuh in thakhat thu in singlamteh tungah thahna a thuak ding pen ngaihsun zolo, sang zolo hi.
Jesuh thu gen pen Peter’ upna sanna tawh kituaklo ahih man hi. Peter i lungsim sungah Jesuh pen vangliatna tawh kidimin ngaihsun den hi. Mt. 16:13 sungah Jesuh in, “Mite in kei, Mihing Tapa kua mi hi hong ci uh hiam” ci’n a nungzuite dong hi.
Jesuh in amah leh a mah mihing Tapa ci’n akisap denna Lk. 4:34; 9:58; 19:10; Mk. 10: 45 ah kimu thei hi. Hih min pen Jesuh in a phuahtawm hi loin, Lai Siangtho lui leh a thak hun a minthang mahmah Enoch Laibu (Book of Enoch) sungah na om khin zo hi. Tua laibu sungah Mihing Tapa (Son of man) in Vantungmi hi-in leitung pianma pek in om khin a, Pasian i deihna bangin hih leitung mihingte lakah nungta dingin vantungah angak hithiatpa ahi hi, ci hi.
Peter i nuntakna sungah Mihing Tapa pen ukna vangliatna tawh kidimin a galte a vatmai gawp zo vantungmi bangin ngaihsun hi. Jesuh in mihing Tapa pen singlamteh tawh sih ding a genteh Peter’ lungsim sungah hih banga singlamteh thuak ding pen sang zolo hi.
Topa Jesuh in agim thuakna ding leh a sih nading a genkholh thu Peter in anialgawpna pen Jesuh tunga, a neih itna hang ahi hi. Hih bang gimna Jesuh thuak ding pen ngaihsutin zong nei ngam vetlo hi. Amah adingin hih thu pen up zawhloh phial ding thu ahi hi.
Tuin Jesuh in Peter pen satan ci’n a kawkna thu i en ding hi. Jesuh nasep a kipat dinga satan i ze-etna danin peter in Jesuh kiang gen ahih man ahi hi (Mt. 4:1-11; Lk.4:1-13)
“Suangtum khomun suaksak in”cih a deihna in mihingte thuman cihtakna ngah nang, leitung hauhna tawh ze-etna cihnopna ahi hi. “Biakinn tungpan tuaksuk in” cih a deihna in nalamdang bawlna tawh mi umsak ding, ze-et ding cihna ahi hi. “Khukdinin hong bia in” cih pen leitung deihna lamin makaih in acihna ahi hi. Jesuh in singlamteh lampi tawn ding ahih manin leitung vangliatna tuamtuam tawh ze-etnate na nial vinven hi. Sisaria Philipi khua-ah Peter in Jesuh a it luatna hangin ze-etna kammal na zang kha ahi hi.
Peter’ nialna hun hong tunna:
Peter tungah a hoihlo thukhat hong tunga, tua in peter in Topa a nialna zan hun ahi hi. Peter in inntung khanah “cikmah hun in kong taisan kei ding hi,” ci’n kiciam hi. (Mt. 26:31-35) huansungah Topa adingin a nuntakna buppi tawh dal nuamin anamsau dok hi (Jn. 18: 10-11). A hih hang Siampi ukpa huansungah numei khat in Peter limtak en in “Nangin Galilee khua mi Jesuh’ lawm hilo na hi hiam” ci’n a dot ciangin Peter in na nial hi (Mk. 14:66-75; Mt. 26:69-75; Lk. 22:54-62; Jn. 18:25-27). Hih munah Peter i mawhsak nuam kha ding hi. Nungzui dangte lau in sial-ek denkek a bat laitakin Peter in Siampi ukpa huang ciang zui ngam hi (Mtt. 26:56; Mk. 14:50). Peter thanemna pen galhang pente’ nangawn i neih theih lungsim ahi hi. Peter’ nialna hangin kimawhsak kha thei a, ahizongin nungzui dangten Peter zuihna ciang zui ngamlo uh hi. Marka lungdamna thubu in Peter thugente hi, ci i hih leh Peter gennop bel thu in, Jesuh tungah ciam apel hang Jesuh in bang zah ciang dong a mawhna maisak, cih thu ahi hi.
Piter tungah sepding tavuan lianpi piakna:
lungdamna thu bute sungah Jesuh in thahna athuak zawhin peter in nungzui dangte tawh kilawmtatna nei hi, ci’n kiciamteh hi. Hih in Peter’ hangsanna hong musak hi. Nungzui dangte in Peter’ nialna thu thei khin napi maizum lo a, a pawlzot kik ngamna ahi hi. Thawhkik ni zingsang han a pai masa in Peter (Jn. 20:6). Jesuh’ vaikhakna lianpi a ngah Peter (Mk. 16:7). Jesuh kilat masakna Peter (1Kor. 15:5) Thawh kik zawh Peter leh Jesuh a kimuh un Peter bang ci om cih kua ma’n theilo a, a hi zong Peter in maisak theih loh dihg mawhna nangawn maisak thei cih pen mu masa ding hi. Hih in Jesuh’ mawhmaisak zia ahi hi. Tua banah bual kiang pan; Topa’ tuunote cin ding nasep lianpi piakna ngah hi (Jn. 21:15-17).
Peter’ tavuan, nasep lianpi lakna:
Peter tangthu bei nailo a, na thak tuamtuam a theihna lah ding omlai hi. Sawltak laibu patna lamah peter in nungzuite’ makaipi ahihna kimu thei hi. Jesuh a zuak Iskariot mun a nungzui ding khat tel kul hi, a ci pen peter hi (Sawl. 1:15). Penticost pawi athugen pen Peter hi a, Khristian lungdamna thu a gen masa pen zong hi (Sawl. 2:14-40). Johan le Peter Biakinn a pailaitak Khebai khat na om a, Peter tungtawn in Pasian damsakna ngah hi (Sawl. 3:1- 11). Jesuh’ lungdamna thu genkhiatna hangin John leh Peter in mat leh hen thuak a, Sanhedrin (Siampi lian, Lai theite le Ulian) te’mawhsakna pen hangsan taka, ahih lohna thu agen ngam Peter hi (Sawl. 4:1-22; 5:26-32). Samaria khuapiah Jesuh’ lungdamna thu gen dingin apai lai mikhem a hat, a gilo Simon magus thu a hilh pen Peter hi. (Sawl. 8:12-25). Ananias leh Safirate’nupa thu ahilh Peter hi. (Sawl. 5:1-11). Lidda khua mi Aenias leh Joppa khuami Dorkas a damsak zong peter hi (Sawl. 9:32-43).
Peter nasepnate lakah a thupi belin Gentail mi ahi galkapbu Kornelias pen Khristian kilawmtatna sungah kihelsakna a hi hi. Jew te’n Gentaite a pampaih hunin Peter in Khristian vaitak a, a na huaina ahi hi. (Sawl. 10). Hih Jesuh’ lungdamna thu pen Jew mite bek hilo minam dangte tawh zong kisai hi, cih angaihsun Peter hi. Nam dangte hong lut theihna ding pawlpi kongkhak honga, Jerusalem Council a sampa in Peter ahi hi. (Sawl. 15:7-11).
Thu ciamthak sungah Peter tangthu hi ciang tawh bei ta a, Jew Khristiante’makai a hi hi. Thuciamthak sungah a ban a kigen nawnloh hangin Khristian pawlpi masate tangthu sungah tampi tak om hi. Tua tangthute sungah Peter thu pen namthum in lak hi.
(1). Antiok khua tawh kizopna nei hi:
Peter in Antiok khua ah Bishop Pastor kum sagih sem a, a sem masa pen hi, ci hi. Minam dangte tatkhiatna ngah nading lungdamna thu agen masa pen, Pastor a hih loh nading thu omlo hi (Sawl. 11:20). Khristian cih min a kizat masak penna mun zong ahi hi (Sawl. 11:26).
(2). Asia Minor tawh kizopna nei hi:
Antiok khua-ah na a sep khitteh Asia minor ah tatkhiatna thu gen hi, ci uh hi. Hih thupen dik hi, i cih theih nading thuin peter’laikhakte pen Pontus, Galatia, Bithynia, Capadosia leh Asia gamte-ah a tung Khristiante tunga kigelh laikhak hi, cih i thei hi (1Pet. 1:1). Peter laikhak masa sungah a telhak thu khat om hi (1Peter 5:13). Tua in Babylon khuapi sunga om pawlpite in zong hong hopih uhi, cih kammal ahi hi. Babylon a cih kammal in bangcihna hiam? Lai Siangtho siam pawlkhat in Babylon khuapi mah a gen hi ding hi, ci uh hi. R.H. Streeter genna ah Peter in Babylon khua-ah lungdamnathu gen a, Babylon khua a om Palestine Jew-te in na muak hi, cihna hi, ci hi. A hangin Babylon khuapi-ah a kipaipih Jew mite pen deihtel-mipil, misiam teng hi a- tuate sungpan a tamzaw ciahkik nawnlo uh hi. Jew midik tak leh ngeina a zuite in Mesopotamia-ah teeng uh hi. Jew mi khang tangthu kan pilna nei Josephus in Babylon a thupisakna in Jew tangthu Aramiac pau tawh at in Babylon leh Mesopotamia a om a mipilte phattuamna ding ngaihsutna tawh a atna hang hi, ci hi.
Teltak leh siangtak a gen Jewte laibu in Babylonian Talmud ahi hi. Jew mite laipil laisiam zong leng Babylon lammah zon kul ding hi. Ahi zong tua munah Peter in thugen hi, cih kiza kha ngeilo hi. Babylon cih pen Rome khuapi hi, ci’n ummawh uh hi. Mangmuhna laibu sunga Babylon in Rome khuapi a gen nuam ahi hi. (Mang. 14:8; 16:9; 17:5; 18:2).
Nisuahna lam khang tangthu pilna anei a minthang mahmah Eusebius in (Peter laikhak masa 5:13) sunga om Babylon pen Rome khuapi a gennopna ci’n hi bangin gen hi. Peter gen bangin hih laibu pen Rome khuapi a at hi ci’n mi tampi in um uh hi. Rome khuapi pen Babylon khuapi ci’n, tehkak a genna ahihna thu pawlpi tangthu ciaptehna (Ecclesiastical History 2,15) laibu sungah om hi. Tanglai Khristiante in Rome khuapi ukna vangliatna, gitlohna, kiphatsaknate a ngaihsut ciangin nidanga Babylon khuapi tawh kibang hi ci’n a tehkakna a hi hi.
Peter in Asia Minor ah thugen hi, cih pen ahih theihna ding om a, ahi zong Babylon ah pai hi, cih pen ahih theih nadingthu omlo hi.
Peter Rome khuapi ah tung hi, cih pen tanglai pawlpi masate’n sang thei kim uh hi. Tua hun pen AD 61 pawl hi-in Peter in tua khuapi -ah thahna thuak hi. Rome khuapi ah Peter om hi, cih tawh kisai a ngaihsuttak tangthu pawlkhat om hi. A diak in Peter kithahna thu ahi hi. Tua thupiangte dik, diklo cih ciantakin kilak theilo hi. Sawl 8: 9-24 sunga Peter in thu ahilh Simon margus pen Rome Khuapi -ah kimu kha lai uh hi. Simon Margus in a sisa khangno khat ka thosak hi, ci’n agen ciangin Peter in hih pen a huih bungpi, a kiphatpi hi lel hi, ci’n pulak hi. Huih lakah lengin a vangliatna lak dingin Simon Margus in a ngaihsut laitak Peter in Simon ‘ khemna, zuauphuahna mite’n a theih nadingin thungen hi.
Simon in vanlamah leng dingin a hanciam leh lei lakah kia in si hi. Rome ah Simon ‘nungzui tampitak om hi. Simon pen a kiphatpi ahihna Peter in a pulakna hangin gal hong hau mahmah hi. Thu hoihlo zaw khat hong piang lai hi. Agrippa’ Zino li-te in Peter thu genna hangin pianthakna nei uh a, Khristian suak uh hi. Tua bek hiloin kumpipa Albinus i itbel kumpi nu, Xanthippe pen zong a lungsim leh a nuntakna kikhel hi.
Asia Minor tawh kizopna nei hi:
Antiok khua-ah na a sep khitteh Asia minor ah tatkhiatna thu gen hi, ci uh hi. Hih thupen dik hi, i cih theih nading thuin peter’laikhakte pen Pontus, Galatia, Bithynia, Capadosia leh Asia gamte-ah a tung Khristiante tunga kigelh laikhak hi, cih i thei hi (1Pet. 1:1). Peter laikhak masa sungah a telhak thu khat om hi (1Peter 5:13). Tua in Babylon khuapi sunga om pawlpite in zong hong hopih uhi, cih kammal ahi hi. Babylon a cih kammal in bangcihna hiam? Lai Siangtho siam pawlkhat in Babylon khuapi mah a gen hi ding hi, ci uh hi. R.H. Streeter genna ah Peter in Babylon khua-ah lungdamnathu gen a, Babylon khua a om Palestine Jew-te in na muak hi, cihna hi, ci hi. A hangin Babylon khuapi-ah a kipaipih Jew mite pen deihtel-mipil, misiam teng hi a- tuate sungpan a tamzaw ciahkik nawnlo uh hi. Jew midik tak leh ngeina a zuite in Mesopotamia-ah teeng uh hi. Jew mi khang tangthu kan pilna nei Josephus in Babylon a thupisakna in Jew tangthu Aramiac pau tawh at in Babylon leh Mesopotamia a om a mipilte phattuamna ding ngaihsutna tawh a atna hang hi, ci hi.
Teltak leh siangtak a gen Jewte laibu in Babylonian Talmud ahi hi. Jew mite laipil laisiam zong leng Babylon lammah zon kul ding hi. Ahi zong tua munah Peter in thugen hi, cih kiza kha ngeilo hi. Babylon cih pen Rome khuapi hi, ci’n ummawh uh hi. Mangmuhna laibu sunga Babylon in Rome khuapi a gen nuam ahi hi. (Mang.14:8; 16:9; 17:5; 18:2).
Nisuahna lam khang tangthu pilna anei a minthang mahmah Eusebius in (Peter laikhak masa 5:13) sunga om Babylon pen Rome khuapi a gennopna ci’n hi bangin gen hi. Peter gen bangin hih laibu pen Rome khuapi a at hi ci’n mi tampi in um uh hi. Rome khuapi pen Babylon khuapi ci’n, tehkak a genna ahihna thu pawlpi tangthu ciaptehna (Ecclesiastical History 2,15) laibu sungah om hi. Tanglai Khristiante in Rome khuapi ukna vangliatna, gitlohna, kiphatsaknate a ngaihsut ciangin nidanga Babylon khuapi tawh kibang hi ci’n a tehkakna a hi hi.
Peter in Asia Minor ah thugen hi, cih pen ahih theihna ding om a, ahi zong Babylon ah pai hi, cih pen ahih theih nadingthu omlo hi.
Peter Rome khuapi ah tung hi, cih pen tanglai pawlpi masate’n sang thei kim uh hi. Tua hun pen AD 61 pawl hi-in Peter in tua khuapi -ah thahna thuak hi. Rome khuapi ah Peter om hi, cih tawh kisai a ngaihsuttak tangthu pawlkhat om hi. A diak in Peter kithahna thu ahi hi.
Tua thupiangte dik, diklo cih ciantakin kilak theilo hi. Sawl 8: 9-24 sunga Peter in thu ahilh Simon margus pen Rome Khuapi -ah kimu kha lai uh hi. Simon Margus in a sisa khangno khat ka thosak hi, ci’n agen ciangin Peter in hih pen a huih bungpi, a kiphatpi hi lel hi, ci’n pulak hi. Huih lakah lengin a vangliatna lak dingin Simon Margus in a ngaihsut laitak Peter in Simon ‘khemna, zuauphuahna mite’n a theih nadingin thungen hi.
Simon in vanlamah leng dingin a hanciam leh lei lakah kia in si hi. Rome ah Simon ‘nungzui tampitak om hi. Simon pen a kiphatpi ahihna Peter in a pulakna hangin gal hong hau mahmah hi. Thu hoihlo zaw khat hong piang lai hi. Agrippa’ Zino li-te in Peter thu genna hangin pianthakna nei uh a, Khristian suak uh hi. Tua bek hiloin kumpipa Albinus i itbel kumpi nu, Xanthippe pen zong a lungsim leh a nuntakna kikhel hi.
Agrippa leh Albinus in Peter tungah heh lua mahmah uh ahih manin, Peter that dingin khensat uh hi. Peter lawmte leh a Khristian mipihte’n theisak uh hi.
Topa Jesuh nasep maban a zop theih lai nadingin mundangah a kihep ding thapia uh hi. Peter in Rome khua panin taikhia ding hong pai laitakin Topa Jesuh Rome khuapi sungah lutin vision mu hi. Topa koi ah pai ding na hi hiam ci’n Peter in a dot ciangin Jesuh in thahna thuak dingin Rome khuapi-ah kapai ding hi, ci’n dawng hi. Topa khatvei thahna thuak kik lai ding na hiam? ci’n Peter in a dot ciangin Jesuh in “hi hi, Peter ken khat vei thahna ka va thuak kik ding hi’ci’n dawng hi. (Act of peter 35). Peter in a taisan singlamteh pua dingin, Topa Jesuh Rome khuapi ah lut hi, cih pen theisiam pah hi. Tua ciangin Peter zong thahna thuak dingin khuapi sungah lutkik hi. A ma nasepna hangin azi pen ama’ muhna -ah kithat hi. A zi kithahna pen enlo thei loin bawl uh hi.
Peter in azi’ kiangah “Topa’ thuakna phawk in” cih kammal bek tawh tha pia zo hi (Eusebius Eccleisastical History 3, 30). Thongcingpa in Peter hangsantak a thuakngamna a muh ciangin a lungsim sukha in Khristian suak lian hi. Singlamteh tungah khencip a thah ding hun hong tun ciangin, Peter in “ka Topa kikhai bangin kikhai ding ka kilawm kei hi, ka bungbulam in hong khai un ci’n ngen hi (Eccleisastical History 3, 1). A tawpna ah Peter in a Topa adingin galhang sihna Martyr tawh hong si hi.
Peter in mawhna tampi zong nei kha mah ding hi. A hi zongin itna hoih, hehpihna lungsim nei tawntung hi. E.W Earrar kicipa in Peter minthanna pen khatin tamveipi aciampel kha zongin galhanna leh thumanna ngah kik veve hi. Luka in Peter’ nialna theihhuai thu tomno tawh na khum hi. Tua in Jesuh in Peter a et kik ciangin .... cih hi (Lk. 22:61). Hih Jesuh et kikna in Peter mawh kiphawkkikna piangsak a, tua mah bangin eite in zong dinmun a dik loh lam i kimuh ciangin “khat vei hong enkik in” ci’n thu i nget ding hoih hi.
Source:
NUNGZUI SAWMLENIH (Laibu)
Laibu Bawl: Rev. Job Nang Khaw Thawng
Laibu Saal / Zomi eLibrary
