PETER A KAWK NUMEI NO. Agelh ~ Rev. Dr. John Thang Hum & Dim Lun Zam

PETER A KAWK NUMEI NO

 

Matt 26:68-75; Lk 22:55-62; Johan 18:16-18; 25-27

 

Agelh ~ Rev. Dr. John Thang Hum &

Dim Lun Zam

 

 

 Hih Peter a kawk numei nonu’ min leh a innkuan pian zia a cingtak in I thei kei hi. Ahi zongin,​​ hih numeino​​ zong Jepthah tanu bang a, khantawn a siampi te nasem ding a kipia te khat hithei ding hi​​ (Hih mun te sim in-Gam 27:8; Thuhilhkikna 25:5-10)​​ sungah ki mu hi.​​ 

 

 Ih nuntakna ah ih ngaihsut khak ngeiloh mi pawlkhat in hong lunglut in i omdan I tat, i heek dan​​ khempeuh hong en cik gige na om thei hi. Ih theih loh kaal in hong pakta aom mah bangin dik hong sa khollo zong na om thei gige hi. Hih Peter a kawk numeino in zong amah kuamah’n a phawkkhak loh ding hang, amah’n mite na en cikcik in, kua te bangci cih na​​ thei mahmah a, Peter zong na ciamteh thei mahmah hi.​​ 

 

 Khris a kimat ni zan in, Peter leh Johan in siampite nasepna phual dong vazui hi. Tualai ah Peter pen miten na thei hi. Nungzuite pen Galilee gam pan a tamzaw kila hi a, a omzia amel uh zong​​ milak ah tuampian hi kha thei ding hi. Peter a kawk te khat in zong, napau na awsuah mahmah, Galilee awsuah hi, na ci thei hi. Peter in ahihleh utlo in na nanial phangphang lai hi. Hih bang kikawk nate ci leh sa tawh deih huailo ahih hangin, kha lam ah a sang siam ta ding phattuamna lianpi piang thei hi.

​​ 

 

Peter omzia

 

 Upna leh muanna lamah madawk, nungzui pite lakah makaipi za angah Peter, lungsim manlang, kampau manlangin na​​ khatpeuh sep ding khensat semsem thei hi. Topa Jesu in,​​ “Kei, miten kua​​ hong ci hiam?”​​ Acih ciangin in, nungzui te in​​ “kamsangte khat in hong ngaihsun uh hi,”​​ ci in dawng a,​​ “No-e leh kua nong ci uh a,”​​ acih ciangin, Peter mahmah in,​​ “Anungta Pasian Tapa Khris hi teh,”​​ ci-in na dawng hi. Tua pulakna ci leh sa pan hilo a, Pasian Kha Siangtho pan ahihna Topan gen hi. Hih pulakna hangin Topa lungdam in, “Hih suang tungah ka pawlpi ka lam ding hi,” ci-in gen hi. Hih suang acih pen Peter a genna hilo in,​​ “Peter pulak khiat, Peter in a kawk, Jesu tungah ka pawlpi ka lam ding hi,”​​ a cihna ahi hi.​​ 

 

 Topa kammal muan ngamna, upna tawh kalsuan nalam ah kisin ngam in, lungsim manlang hi. Topa Jesu tui tungah apai lai-in​​ “Kei zong hong pai thei sak in,”​​ ci-a, anget ciangin, Jesun,​​ “pai ve”​​ acih leh kisin ngam pah a, tuitung pai thei takpi​​ hi.​​ 

 

 Peter pen a lawpna khauh mahmah a, lawp baih in alung zong akiabaih thei nam ahi hi. Kamciamna piazeel napi nungkik pah cih bang dan ahi hi. Topa Jesu in, hi bangdan Peter’ lungsim puak zong na taai zel hi.​​ “Kei, galpa khut sungah ka kipia dinga, sihna ka thuak ding hi,”​​ acih ciangin, Peter mah pau masa in,​​ “Na tuaci kei dinghi,”​​ na ci hi. Topan’ Peter kampauna deih loh in,​​ “Satan aw, ka nungah kihem in,”​​ na ci hiau hi​​ (Mk 8:33). “Mikhempeuh in hong taisan ding uh hi,”​​ cih Topa’n a gen ciangin, Peter​​ in,​​ “Midang ten hong taisan hang, ken hong taisak ngei kei ningh,”​​ na ci phangphang hi. Jesu in,​​ “Akkhuanma in thumvei nong nial ding hi,”​​ na ci leuleu hi.

​​ 

 Topa Jesu leh nungzuiten paisanpawi an anek khit uh ciangin, Gethsemane huanah a zatngei bangun​​ thungetna neikhawm uhhi. Tuamun ah zong ngak zolo in ihmu khin uh hi. Topan,​​ “Kei tawh nai khat beek, ngak zolo ding na hi uh hiam? Ze-etna tawh na kipelh na ding un, thu nangen un,”​​ ci-in gen hi. A sawtlo in, aman dingte hong pai a, Topa hong akimat tak ciangin, Peter in temta a selsim khinkhian dok in, siampipa’ nasem pa’ ngawng vat dinga ahihleh a ngawng bel vatkha lo in, abil na vat kha hih tuak hi. Topa in, tua pa bil bulh sakkik hi.

 

 Tua zan mahin siampi lianpen pa maiah thu kisit dingin ki paipih hi. Peter in zong gamla sim pan in Jesu nung a zuizui hi. Siampipa inntual ah, mei kicih a, tualai ah siampipa nasem te in mei awi ngeingai hi. Peter zong meiawi in a vapai leh, tualai a-om, siampipa nasem numeino khatin amel natel liana,​​ “nang Jesu tawh kipawl hilo na hiam?”​​ ci-in vakawk phei hi. Peter in,​​ “hi peuhmah keng, ken theingei keng,”​​ ci-in nial hi. Tualaiah om midang ten zong,​​ “Nang Jesu pawl hi teh,”​​ a vacih uh leh Peter in zanuam lo in, kiciam phangphang leuleu hi. Tua bangin thumvei agen khit ciangin aak hong khuang hi. Tua ciangin Peter in Topa thugen phawk a, kap dapdap hi.

 

 Ih dinmun manlo pan i ciahkik theihna ding Pasian in lampi tuamtuam, thu tuamtuam zangh thei hi. Israel mite a nungtolhna pan aciah kik theih nading Pasian in kamsang te zangh hi. Pasian kammal mah zangh in Pasian in ih manlohna hong phawkkik sak thei hi. Midang khatpeuh zangin zong hong gen thei hi. Ganhing nangawn zangh in i mawhna hong phawk sak thei hi. Athupi pen ah, i lungtang khauhsak lo in i sansiam ding thupi hi. Paunak ah​​ “Tamveipi ki hilh khit cianga, amang nuamlo mi, thakhat thuin siatna ngah ding,”​​ ci hi​​ (29:1). Nungzuite lakah, Peter leh Judas Iscariot in Topa nial tuak uh a, ahi zongin Peter in kisikkikna tawh Topa zong kik ahih manin Topa in sang kik hi. Pasian in awnem tawh hong zol hun om a, tua ih manloh ciangin a khauh tawh hong pai thei hi.

 

 

Thukhupna

 

 Ih Khrisian nuntakna ah, ih lampi tang sinsen in kipai theiloh hun hong om theizel hi. Ahangpen, ei zong thungetna ki neilo, ci leh sa in hong zawh hun zong om, kiim leh paam in hong nehthawh hun zong om hi. Tua bang hun ciangin anungtolh ih hihi. Hih bang ih nungtolh hun ciangin bangin hong kaikik ding hiam? Pasian in lampi​​ tuamtuam zangh thei hi. Adiak in mihing, midang, thu-um (or) thu-umlote mah zangin​​ hong sem thei hi.

 

 Hih Peter tungah numei nonu nasepna in ngaihsut ding thupi hong musak hi. Peter in anial hangin Topa itna mah in amah kaikik teitei hi​​ (Lu 22:31).​​ Topa’n eite hong nusia ngeilo hi. Ih paisan khak ciang, hong delh in hong zong kik veve​​ hi.​​ “Satan in nang hong seepkhia nuam in hong ngen hi. Ahizong na puk loh nading thu kong ngetsak hi,”​​ ci-in gen hi​​ (Luke 22:31)

 

 Topa’n lampi tuamtuam zangin i mawhna, i nungtolhna kiphawk theih nading thu hong gen ding hi. Khatveivei hong sat lai​​ ding hi. Tua pen hong itna hang hi zaw hi. I laksiam leh ei hampha, thupha in zong hong zui dinga, ih lak theihkei leh i daupai ngeilo ding hi. Lai Siangtho sungah, a mawhna leh nungtolhna kiphawk kik napi Topa kiang aciah kiklo mi tampi om hi. Hi bang mite lakah ih kihel loh khakloh ding​​ thupi hi. Peter leh Topa aleh heek, Judah a mawhna uh ki bang tuak hi. Ahi zongin Peter in Topa zuankik a, Judas in zuan kik lo hi.

 

 Pasian in hih numei nonu bangin i nuntakna ah hong kawk ding mi koih ding hi. Tua​​ bang hun I tuak ciangin hong kawkte muhdah na ding thu omlo hi. Numeino bang zangh kei leh mi gilo khat peuh zong zangh thei ding ahih manin, hi bangdan, thatang hatna suanglo, kam tawh hong gen ciang bek te zong lungdam huai ahi hi. Mihing pen eitungah kuamah om nawnlo cih bang I ngaihsut ciangin midang te hong gen ding I ut kei hi. Hih pen alau huai ahi hi. Numeino nu bang dan ih nuntakna ah I tuah khak leh I lungdam mahmah ding ahi hi. Tua pen eimah hamphat na ding hi zaw hi.

 

 

Dotna:

 

• Ze-et na tawh kipelh nading bang hih ding ci hiam?

• Peter a nungtolhlam thu bangzah tawh ki thei hiam

• Peter akawk numei nu’ deihna bang hiam?

• Na nuntakna ah hih numei nonu bangdan mi na tuak kha ngei hiam? Nang bangci na thuhkik hiam? ​​ 

• Pasian in na dinmun manlo a kiphawk theihna hong piak ding na lunggulh hiam? Bangci dan hi leh na lunggulh hiam?