PAWLPI MASA TE LEH MEIGONG TE
SAWLTAK 6, 1 TIM 5:9-11
Agelh ~ Rev. Dr. John Thang Hum & Dim Lun Zam
Pentekos ni-a Kha Siangtho hong kibuak khit ciangin thu-um mi hong ki behlap hi. Jew te biakna pawi siim dingin mun tuamtuam pan Jerusalem ah hong pai mite hangin Khris lungdamna leitungbup hong zel hi. Jerusalem ah om thu-um mite sawltakte makaih na nuai ah pawlpi khatin omkhawm uh hi.
Hih pawlpi sungah Greek kampau Jew mite leh Hebia kampau Jew mite cih nam nih in hong om uh hi. Pawlpi sungah ahau a om mah bangin, a zawng leh meigong tagah zong om hi. Hih mizawng leh meigong tagah te pawlpi in huhna pia uh hi. Nikhatni tak teh, Greek kampau Jew-meigongte in, “Ko, hong ki deidan hi, Hebia kampau Jew-meigongte zahin huhna ka ngah kei uh hi,” ci-in hong phun uh hi. Hih bang phunna pen mihing ahih manun aom thei ding thu ahi hi. Ahi zongin tua buaina pan in thuhoih mahmah khat hong piang khia hi.
Sawltakpite kikum in, “Hih mizawng et nasep pen ei’ sep ding hun ipia zo kei ding hi, tua ahih manin hih nasep asem ding u-pa sagih teel in tuate sem sak ni, ei (sawltak pite) I hih leh ih hih ngei, I tavuan, thunget leh thuhilh nasep mah sem suak ni,” ci-in khensatna hong nei uh hi. Kua bang mite teel ding hiam? cih a kikup uh ciangin, “Kha Siangtho a dim, pilna nei leh pualam mite maipha ngah te” tel dingin khensat uh hi.
Tua tawh kizui in, thu-um mite sung pan, u-pa sem ding a tunga thukhun tawh kituak mi sagih teel khia uh hi. Hih u-pa sagihte pen, deacon ki ci a, Greek pau in “Daikonos” pan hong piang hi. A khiatna pen “sabuai ah nasem te, sabuai zeek te” cihna ahi hi. Tulai a pawlpi sungah upa I teelte hih pan hong piang ahi hi. Hih hun pan kipan meigongte phunciakna hong bei hi. Sawltak ten zong amau sep ding, thungetna leh thuhilhna zom suak in Khris lungdamna thu nakpi takin hong kizel khia hi.
Thukhupna
Pawlpi sungah buaina khempeuh a sia hi khin lo a, thu-um mite I khantoh zawk nading leh Pasian gam zai zawk nading hi thei zaw hi. Sawltakte tangthu sungah, pawlpi kipat khiat pan kipan, lungdamna thu a kigen bang mahin, thu-um mite kipawl khawm in mizawngte huh nading, lungdamna thu gen a, zin khia te huh na ding leh mimal hahkatna tawh mizawng te huhna tampi ki mu hi. Hih mizawng leh meigong te huh nasepna pen nasep thupi mahmah khat hi a, sawltak James in, biakna man taktak pen meigong te leh mizawng te etna ahi hi, ci in na gen hi (James 1:27).
America te a minthanna hang khat pen, leitungah huih leh guah hang ahi a, zin lin leh mei kang khatpeuh hang a cimawh tuakte huhna ahi hi. Leitung kipawlna tuamtuam tawh ahi zongin, biakna pan ahi zongin nakpi takin huhna kibawl ahih manin, haksatna tuak te in phat tuam pih mahmah hi.
Hih meigong leh tagah huhna pen tuni in I pawlpi te sungah nakpi takin a sep huai mahmah thu ahi hi.
Dotna
Pawlpi masa te sungah bang buaina tung a, bangci vaihawm uh hiam?
Greek-kampau Jew cih leh Hebia-kampau Jew a ki lamdanna bang hiam?
Pawlpi masa te in sabuai zeek ding bang ci mi te teel uh hiam?
Hih buaina hangin a nungsangah bang hoihna piang hiam?
Na omna pawlpi ah mizawng te leh meigong te aki en hiam? Tua bang dan nasepna a om nai kei leh bangci pat khiat theih ding cih na ngaihsutna gen in.
