Pau nam tampi theihna in pilna hi a, ei pau theihlohna in haina ahi hi.
Agelh~Sia Do Khup
Ei pau nasiam mahmah khit ciangin namdangte pau ei pau zahin na zat theihna pen pilna ahi hi. Ei pau bek a theite sangin a hamphazaw nahi hi. Ahih hangin ei’pau sangin nam dangte’ pau siamzaw ahih kei leh namdangte’pau bek a zang thei nahih khak leh mi mangthang nahi hi.
Isrealte in zong amau pau sangin Ashdod pau khawng hong siamzawk uh ciangin Pasian in thupha pia nawn loin mi’ sila, mi’ salin omsak hi. Amau pau in a pau theihlohna uh pen mawhna in ngaihsun uh a kisiansuah tangtang uh hi. (Neh.13:23-27)
Tua ahih manin nam dang zi i nei a, khuapi sungah i teng ahi zongin i tate in ei pau a theih nading uh i hanciam tentan ding ahi hi. Innkuan sungah ei’ pau mah zatpih tangtang ding ahi hi. I omna pihte paupen sinsak kullo in hong thei lel ding uh hi.
Pasian piansak pau namkhat a kem zolo, a mangthangsakte i suah loh nadingin i lai, i pau, i ngeinate limtakin i kepcing ding kisam hi. Dawi biaknain a kizang i ngeina hoihlo teng i nusiat ding hi bek a, ki-itna a piangsak thei i ngeina hoihte i kepcing kinken ding ahi hi.
Innkuan sungah, Pate in i Pasian biakna ngeinate i tate tungah i hilh sawn ding ahi hi. Jacob in zong a zi a tate Pasian biakzia hilh a, a gam dang pasiante uh koih khiasak hi (Pian 35:17) Pasian hehpihna i san ziate tate tungah teci pangin i hilh ding ahi hi. Tang lai mi masate in zong tua bangin hih uh hi. (Late 4:1).
