PATE NI.
Tu kumin June 16, 2002 ni pen, PATE NI in kicamteh aa, kikhopna mun ciatah Pate pahtawina le Pate thupina tampi tak kigen hi. Hih Pate ni hong pian pen a beisa kum tampi lai bang hi aa tu ni ciang dong ni thupi in ki ciamteh hi.
PATE NI in, Nute pahtawina le Nute tawh kisai la ki phuak tampi a om hangin Pate la ki phuah pen tawm mahmah in, ki za ngei lo phial hi. A hi zongin, innkuan sung le mimal khat ciat nuntakna pen Pate a thupi lua mahmah a hihna ki phawk aa, PATE NI cih bangin ki bawl zawzen hi. Ih pate pahtawi ih hih manin, ei tate in ih pate tungah bang ci bangin lungdam kohna ih nei thei hiam? Mipilte in lai gelh uh aa, naupang khat in a neu lai in, a pa pen leitungah a hatpen, a pilpen, a siampen a mel hoihpen dingin ki ngaihsun hi. A hi zongin, tate hong khangto in, kum 15-25 kikal khawng hong phak ciangin, pate pen mi lak ah zumpih thei hi.
Tate hong khangtoto uh aa, kum 30 hong val uh ciangin, pate thupi na le kisapna hong phawk sansan uh hi. Kum 40 hong val uh ciangin, thu khat peuhpeuh ah pate dot ding hi hong ci thei ta uh hi. Tate in ih neu lai in pate ki muang mahmah aa, tua khit ciangin, amau sangin thei zaw le siam zaw peuh kisa kha thei hi hang, a tawp lam ciangin ih pate mah in thei zaw mawk veh ee cih hun hong tung kik veve hi.
Tu in, tate in hong pahtawi uh PATE in zong ih tate tungah, amaute nuntak gamtat kalsuan na ding bang zah ciang lam lakin thuhilh ih ih hiam cih ih gen suk ding hi. LST sungah naupang khat a paina ding lampi man hilh le cin a khantawn in piallo ding hi ci hi. (Paunak 22:6) Tua ahih manin, pate in ih tate tungah kam tawh ih genna a hi zongin, gamtatna tawh ih lah khiatte a hi zongin, innkuan sung om zia tawh ih lahkhiatte a hi zongin, hun khat ciangin tate tungah hong kilang khia kik ding hi, tua hun ciangin ih lungkim takpi ding hiam cih ki ngaihsun kawm ding hi hang.
Joshua 4. sungah, Makaipa Joshua in mipi tung ah thu gen aa, Jordan gun a kantan uh ciangin, siampite in Jordan gun a sikkhak phet-un, a nung aa pai ding mipite in leikeu tawnin gunpi kantan ding uh hi ci hi. Tua laitak in, Israel minam 12 te sung panin upa khat ciat in, gun lai zang pan suangtum lianpi khatta puakhia uh hen la nitak guahphual a sat uh ciangin, tua lai ah ciangkhawm ding uh hi ci in vaikhak hi. Tua suangtum kiciangkhawm pen nuapangte le khangsawnte in hong dot uh ciangin, Pasian in amaute vaangliatna tawh Jordan gunpi a kantan pihna na hilh ding uh hi ci hi. Tua mah bangin, Israel makai mi 12 te in suangtumte pua ciatin ciangkhawm uh hi. Teci panna hoih khat a hihi.
Tu ni in, pate in na tate/ tute innkuan sungah hih bang a hi hiam ci aa hong dot ding lim le teci panna khat peuh a hi zongin thu khat peuh a hi zongin ih nei kha hiam?
Khang tangthu nihna 29-31 na sungah Kumpi Hezekiah pen ama kum 29 a phak in kumpi seem aa Jerusalem khua ah kum 25 sung mang hi. Khangno mahmah khat a hih hangin, kumpi hoih a hih theihna thu tawm khat en suk ding hi hang. Hih a nuai aa ih gen suk teng en in, tu ni aa PATE in kei zong Hezekiah kumpi pa in a gam sungah Pasian thu a ki theihna ding le Pasian a ki zahtaak theihna dingin, a sepnate tawh sehkak ih innkuan sung ciatah, innkuan pihte in Pasian thu a muh theihna ding le Pasian lamah a picin’ theihna dingin bang ih seem hiam cih ih ki ngaihsut kawm ding ka deih hi.
Hezekiah kumpipa pen Pasian muhna ah manin gamta hi. (29:2). Mite muhna aa gamtatna thupi mahmah bangin, Pasian muhna ah a man in gamta cih pen a thupi zaw lai hi. Hih kumpipa in a gam sungah mite in Pasian thu zui in Pasian thupha piak taak a hih ding deihna lianpi tawh amah nuntakna sungah kikhalna na nei aa, Pasian muhna ah a manin gamta hi na ci hi. Pate in ih innkuan sungah tate etteh theih ding na hoih bang ih seem hiam? Hih Hezekiah kumpipa mah bangin aman in ih kampau hiam? A manin ih gamta hiam cih ki sittel huai mahmah ding hi.
Topa inn kongkhak te hong hi. (29:3) Hezekiah kumpipa in, a gam sung mite le Pasian hoihtak aa kizopna ding deihna tawh, kumpi a sep kum lian mah in Topa inn kong khak pite hong khia in biakinn ah mite in Pasian a biak theihna ding un vaihawm sak hi. Gam sung mite in Pasian mah bia in, Pasian thu a zuih theihna ding uh lampi hon sakna a hihi. Pate in zong, ih tate in Pasian a biak theihna ding Pasian thu tawh a nuntak theihna ding uh a hi zongin, Paisan nasepna lam ah hong ki piak theihna ding uh a hi zongin bang teng ih seem khia hiam?
Topa paisan pawi bawl hi. ( 30:1) Gam sung mite in a biak uh Pasian hangin gual zawhna a ngahnate uh a hi zongin, thupha ngahna a dawldawl aa om te a phawkkik theihna ding uh le Pasian tungah a lungdam theihna dingun pawi lianpi a hi ‘paisan pawi’ bawl sak hi. Taanglai aa Pasian teeltuamte sila hihna pan aa a suahtakna uh pawipi na bawl uh hi. Hih pen Pasian hong gupna thu teci panna tawh ki bang hi. Na innkuan sungah Pasian hong gupna thu, na lamdang a bawlna thu, thupha hong piakna te na genkhia ngei hiam? Tuate na gen khiat kikkik ciangin, na innsung aa tate in Pasian um thei in, muang thei in, Pasian nasep ding lunglutna hong nei ding uh hi.
Gamsung aa dawi biakna tau teng suksiat sak hi. (31:1). Kumpi pa in, ama uk hun sung gam mite in a nungta Pasian mah hoihtak aa a biak ding uh deihsak a hih manin gam sung aa om dawi biakna taute suksiat sak hi. Tu hun ciangin, kamsang vak kawikawi pawl khatte in dawi tampipi hawl khia kawikawi thei uh hi. Ih innkuan sungah dawi biakna tau dawi-lim khawng a om pah loh hangin, Pasian na biak theihna ding hong nawngkai sak na tuamtuam a om le tuate dawi biakna tau hi pah hi. Mi pawl khatte inn sungah lim tuamtuamte ki suangthei hi. Innteekte in a deih aa suan’ uh hi in, amau inn a hih manin amau thu hi, a hi zongin tua lim le na kisuangte in Pasian upna le Pasian it-theihna ding lamah hong kalsuan pih hiam cih ngaihsut huai mahmah hi. Pasian tawh hong ki gamla sak ding na khat peuhpeuh pen hepkhiat huai mahmah ding hi. Tua bek tham loin, inn sungaa ih sepna khat peuhpeuh zong milim suak kha thei ding hi. Thu um mi khat sep ding aa kilawm lo na tampi tak ki seem veve in Pasian thu sangin thupi koih zaw lian ta kei le cin, kin bawl zaw na hih manin, dawi biakna hi pah lel hi. Tuate na hepkhiat ding kisam hi.
Hih a tung aa ih gen teng a tom mahmah aa ih gen hi. PATE NI in, biakinn ciatah Pate kipahtawi hi. Tu in, Pate in zong tua pahtawina tungtawnin, na innkuan sung le na pawlpi a hi zongin, Pasian nasepna ding a hi zongin bang na seem thei hiam? Hezekiah kumpipa in a gam sung aa mite le Pasian hoihtak a ki zop theihna dingin a tung aa teng seem khia hi. Nang bang teng na seem khia hiam? Tu laitak aa na taneute, tu zawh kum 15 ciangin, tu ni aa nang om dan le gamtat dan bang tektek in hong gamta ding uh hi, na lung a kim ding hiam?
Source :
Upna Laigil
Vol.10, No.4
July - August ,2008
