Pasian Theihna leh Pasian Thu Theihna
(Knowing God and Knowing about God)
Agelh ~ Kap Za Khai
Hih thugual nihte pen a thu laigil (essence) kilamdang mahmah hi. Pasian thu theihna cih ciangin muh theih, sin theih, lung ngaih theihna thulela te (knowledge & facts) tungah kinga zaw-a, Pasian tawh kitheihna hilo in athu theihna bulphuh zaw hi. Pasian mahmah sangin ama thu theihna ding bek-ah lungngaihna hi. Pasian theihna cih ciangin Pasian mahmah tawh kitheihna (Personal relationship) tungah bulphuh hi.
Pasian thu pen a ut khempeuh in kan theih, sin theih, gen theih hi. Khristian a hilote in zong Pasian thu thei uh hi. Satan leh dawite in zong Pasian thu thei bek tham lo-in Satan pen Pasian mai nangawn ah pai lai hi (Matt. 4: 5-6; Mk. 1: 24; Job 1:6; 2: 1). Pasian thu pen laibu sung pan ahi zongin, mite’ tuahkhak theihna (experience) sung pan ahi zongin, mite’ kammalte tungtawn pan ahi zongin kingah thei, kisin thei hi. A lang khat-ah Pasian thu cih pen thuk-in, tangzai lua, tel hak in zong tamlua hi. Tua ahih manin leitungah Pasian thu a thei sitset zo mi kuamah omlo hi (Jn. 21:25).
Tua Pasian thu theihna sangin a thupi zaw-in Pasian theihna ahi hi. Pasian thu a sin khempeuh in Pasian thei kim lo hi. Pasian tawh kitheihna pen leitung pilna leh siamna tawh kingah theilo a, upna bek tawh kingah thei hi. Tua upna zong mittaw upna (blind faith) hi lo dinga, telcianna (faith seeks understanding) tungah a kinga upna hi zaw ding hi (John 17: 3; 1John 5: 20). Pasian tawh kitheihna in Khristian nuntakna ah a bulpi ahih mah bangin tawntung nuntakna zong ahi hi (John 17: 3). Pasian tawh a kitheite bek mahin pianthakna taktak ngah uh hi (John 4: 3-30; Acts 22: 8-10; Luke 19: 1-10). Pasian tawh a kithei lote in nuntakna ngahlo ding uh hi. A lang khat-ah Pasian thu thei na pi’n Pasian tawh kithei kei leh zong a mawkna hi veve hi (Matt. 7:21-23). Banghang hiam cih leh Pasian neilo pi-in ama deihna bangin kinungta theilo hi.
Tua ahih manin i nuntakna ah Pasian thu tampi theihna sangin Pasian mahmah tawh i kitheih ding kisam zaw aa, zong thupi zaw hi. Pasian tawh kitheihna panin Pasian thu theih ding hi zaw a, mihingte theihna tungtawn in Pasian theih sawn ding hi lo hi. Khristian nuntakna cih in Kha siangtho lamlakna tawh Pasian deihna bangin nuntak kalsuanna ahi hi. Tua bang nuntakna lampi-ah Pasian tawh kitheih ding, leh Pasian mah neih lianpi in I neih ding mah a thupipen leh a kisam pipen ahi hi.
