PASIAN IN KI-ITNA HI
(GOD IS LOVE)
Agelh ~ Rev. Dr. Thang Cin Lian
29 December 2022
"Pasian pen ki-itna ahih manin itna aneilo mite in Pasian theilo uhhi." (1John 4:8).
1. Pasian pen ki-itna hi a, Ina pen Pasian hilo hi.
Mihing nuntakna sungah itna thupi a, ganhingte nangawn in itna thupisa uhhi. Ahizongin leitungah thu lamdang mahmah khat pen, Itna in hong khenkhen leuleu hi. Itna hangin kikhenna piang hi.
Ahangin, mihing i hih manin, ulenau, behlephung, khualetui, tanau zawdeuh teng ki-it luailuai i hih manin, i phawk khakloh sungin kikhenna hong piangpiang hi. Innkuan sung, Ulenau sung, Khualetui sung, Pawlpi sung, Kipawlna tuamtuam ah, Itna hangin kikhenna hong piang hi. A hangin, Pasian masaklo in, Itna masak kha i hih manin, kikhenna hong tam semsem hi. Pasian masa ki-itna hileh a kikhensate zong kigawmkik ding hanga, kipumkhat ding hihang. Itna i masak khak ciangin Itna in damdam in hong khenkhen hi. Itna bek masak ki-itna pen hilunglung a, Pasian masak ki-itna pen hilingling, kihuai diamdiam hi. Tua ahih manin Pasian pen ki-itna hi a, Itna pen Pasian hilo ahih lam phawk tawntung ding hihang.
2. Pasian Ina in deidan neilo hi.
Pasian in leitung mite khempeuh deidan neilo in It hi. It tuam neilo hi. Mivom, mikang, ahau azawng, apil ahai, numei pasal, cilo in mikhempeuh hong it kim hi. Mihing genloh, singkung lopaa, ganhingte zong it hi. Ei It teng bek Pasian in a it ding i sak khak aleh hipeuhmahlo, ei Pawlpi bek ah Pasian hong kikhawm ding I sak khak aleh hipeuhmahlo hi. Ei minam bek hong ittuam ding I sak aleh hipeuhmahlo hi. Singkung lopaa te, ganhingte zong Pasian in it hi. A taktak in cileng Singkung lopaate, ganhingte pen Mihingte a omloh hangin, amau nungta thei a, leitungah nuamtak in nungta thei uh hi. Mihingte pen hi-ikisak mahmah hangin, singkung lopaate, ganhingte omkeileh nungta theilo ding hihang. Tua ahih manin Mihing khempeuh, singkung lopaa, ganhing khempeuh Pasian pian sak hi a, Pasian in itkim hi. Pasian Itna in deidan neilo ahihlam phawk tawntung ding hihang.
3. Pasian Ina sung mah nuam pen hi.
Leitung nuntakna sungah Itna a thupi pen hi a, itna tawh hong kilui an lim pen a, Itna tawh hong kipia letsong manpha pen a, Itna tawh hong kihopih kam khum pen a, Itna tawh izatkhop hun abeilam kitheilo a, Itna tawh ipaikhop lampi tom pen hi. Mihingte ki-itna bei thei a, peengthei hi.
Tua ahih manin Pasian Itna sungah nuntakna pen Vangam maleep hi a, a nuam penpen hi. Nuntak hun sung Ki-it diamdiam ding hang a, Itna pen sih ciang a kilah panpan ding zong hilo hi. Nuntak sung Ina kilah khiat ding hizaw hi. Tua hi a, Late 136:1-26 sungah "Pasian Itna kip tawntung hi." na ci hi. Pasian Ina pen kikhel ngeilo a, atawntung in kiptawntung ahih manin, tua Pasian itna tawh khat leh khat ki-it ding phawk tawntung ding hihang.
"Pasian pen ki-itna ahih manin itna aneilo mite in Pasian theilo uhhi." (1John 4:8).
Source:
Vaihunta (Ciingpikot/Keizang) Thukizakna
Laibu Saal / Zomi eLibrary
