PASAL TAWDOK
Agelh ~ Khoi Lam Thang
Khat vei khua khat-ah nungak melhoih mahmah khat le tangval melhoih mahmah khat kingai-in, kiteng uh hi. A kua maciat in kilawm kituak sa mahmah uh-a, kilungdam pih ciat napi, tangval pawlkhat in haza dihdih mawk uh hi. Hih lawmtate kitenni mahin a kikhen theih nading hong vaihawm uh hi.
A pasal kiangah pai-in:
“Na lawmnu mel hoih mahmah i cih, a mawk hoih hi lo ahi maw. A sawt lo-in thei pah lel sam ni cin, a mau namte in a taw-ah mei nei kici hi lo maw? ci uh hi.
A pasal’ lungsim sungah “Ka zi in mei nei takpi ahi tam” cih muanmawhna khaici kituh pah hi. A zi dongin amau le amau kigen leh vai siangpah ding thu hi napi, a dot loh ban-ah, cikciang ka theikhia zo tam cih ngak gige hi.
A zi kiangah tangvalte va pai leuleu uh-a,
“Na pasal bel na kidawp kei leh, tanglai a tawpi a kici namte hi-a, tawdok thei kici ai maw”
na ci leuleu hi. Tua nu in a pasal tawh lah kikum kidong loin, muanmawhna le launa lungsim vangikpi tawh “Cikciang ka pasal in ka taw hong dok tam” ci-in zan simin patau den hi.
Zan khat, mei sawk nuam le tawdok ding kihta nupate a nih-un, kuamah ihmu sip thei mahmah lo uh hi. Zan kim petmah ciangin a zi zong a ihmu sip kineihin, zawdildel-in a om leh a pasal in damdamin hong kizia hiathiat-in a lawmnu’ taw hong zawt takpi hi. A lawmnu in “Tangvalte thugen, ka lauhlauh hong tung ngawngaw hitah maw” ci in, thakhat-in a lupna pan diangkhia a, khu vingveng in taikhia a, a nungsang zuanin ciah suak ta hi.
Nupa kal-ah thusim thusel koih het loh ding kisam hi. Nupa kikal thu ahih leh midangte’ gensawn thu up het loh ding ahi hi. Kimuanmawhna a om khak leh nitumsak lo-in kikum ding hi. Upmawhna tawh lupkhop lohna piangak loin, muanna tawh lupkhop ding ahi hi.
Nupate in lungdamna le lungkhamna kikum-in kigen pahpah ding kisam hi. Thupha in kong pua a kan zawh loh hangin, thusia in mualkua khum pahpah hi. Dawimangpa in kitelkhialhna tawh kinopmawhna a pian nading vaihawm kinken hi. Thu neu khat thulian suaksak a, bangmah lo tawh nupa kikhenna dong piang thei hi.
Nupa lungtuak, khuakua in zo lo hi.
--00—
Source:
Sihna in hong khen mateng
Laibu Saal / Zomi eLibrary
