PA! NANG, NAI KHAT-IN BANGZAH THALAWH
Agelh ~ Khoi Lam Thang
Lianno kum 7 pha pan, thu ngaihsut kipanpan ta. A pa (Pa Pau) bel manlah den, inn om ngei lo. Pa-ta kiho khawm, kimawl khawm cih sangsik-in kimu ngei melmel lo. Nitak khat a pa hong ciah hak simsim napi Lianno in ihmut suak pipi-in ngak ngeungau-in … a pa’ an kham khit ciang;
Lianno: Pa! nang, naikhat in bangzah thalawh na hia?
Pa Pau: Bang hangin maw!
Lianno: Pa aw, na nitha zong cingam keng, nai khat a bangzah thalawh na hia, hong gen heuh ve.
Pa Pau: Ka gim ka tawl tawh dihdih ciai, nang i sum thu gen na’ng mahmah thei keng, pai pai pai … va lum, va ihmu... na kisap peuhpeuh kong leisak hi lo maw? ...
Lianno: (Khitui mualtuangsa le nung hei kawmkawmsa in…) Awle, Pa, va lum ning ei … mang… mang pha!
Tawlkhat khit ciangin a pa zong om thei tuan loin, ka tapa Lianno in sum thu gen ngei lo pi, tu nitak hong gen ahih ciang leinop khawng nei ahih leh, ci in Lianno’ lupna ah a va lut phei leh Lianno na ihmu nai loin, kidik kawmkawm le khitui nul niangniang sa-in a lukhap tungah na kun ngeungau hi. A pa in lamdang sa kawm in;
Pa Pau: Bangci na hia, Lianno … ihmu ta ve …
Lianno: Pa! Ka ihmut suak lo pi.
Pa Pau: Naupang nono ihmu thei lo cih om kei, lumsuk le cin ihmu pah ding hi ve cin!
Lianno: Pa, ka kiangah hong lumta ve.
Pa Pau: Den ciang hong lum ning ei maw … Na ih mu ou! Eh! Den a ka naikhat thalawh zah nong dot lei nop nei na hia?… Heu zakhat, ka naikhat thalawh!
Lianno: (Lianno zong hong khuadak to ningniang sa-in) Pa! Ken zong maw, ka nu in moh lei nang hong piak ciang lei ngam lo a ka kholkhol zakhat nei. (A lukhap nuai pan zalai khat hong dokkhia hiathiat in), Pa! nang, nai khat zakhat thalawh na hih leh, ke’n na naikhat hong lei ning ei. Heu Pa! Za khat!!!
Guai! ahih theih liai leh, a phamawh, a pelmawh, a lo thei lo, a hamtang-in, innkuan mah bulphuh taitai ni. Neulai a nu le pa’ itna a goihte, a picin ciang lungsim buaina hau deuh hamtang hi. A khangual phalah thei hi. Lam pialkhin vet leng bawlkik haksa mahmah hi. I lungsim, i pumpi i vakkhiatna pan inn ah ciah ni.
Source:
Sihna in hong khen mateng (Laibu)
Laibu Saal / Zomi eLibrary
