Pa’ hihna le Pa’ tavuante
Agelh ~ Kap Za Khai (Photoh)
Thupatna
Billy Graham in “Pa hoihte pen pahtawina leh phatna a ngah lo pente ahih uh hangin a thupi mahmahte ahi uh hi,”ci hi. Billy Graham cih mah bangin innkuan sungah Pate pen nute Sangin kiphawk lo, kipahtawi lo, tate’ itna lahna ngah khollote hi. Kawlgam bek tham loin leitungbup ah Pate pen kiphawk khollo uh hi. Tua hangin Pate’ Ni pen Nute’ Ni zahin minthang vangvang khollo hi. Letsong zong Nute’ Ni zahin kipia khollo banah lawpdan zong kikhai mahmah hi.
A. Pasian ii PA hihna
Mihing Pate’ hihna gencian theih nadingin Pasian ii Pa hihna gen masak ding kisam hi. Pasian pen vantung le leitung, a sunga om na khempeuh a bawlpa ahih bangin Amah pen ‘Na khempeuhte’ Pa ahi hi. Sawltak Paul in, Pasian pen “… vantung a tung khinsa mite le leitungah a omlai mite khempeuh’ pianna i Pa Pasian’ mai-ah ka khukdin a,., (Efe. 3:14),” ci-in Pasian ii PA taktak ahihna na pulakkhia hi.
Hih vanlelei sunga Pa’ hihna khempeuh pen Pasian ii Pa hihna bek panin hong kipankhia hi a, tua banah Pa dinmun pen leitung pan kipankhia hi loin vantung pan hong kipankhia masa hi. Pasian ii Pa hihna pen a kipatna hun leh tawp hun nei lo hi. Tua bek tham loin JESUH KHRIH a umte khempeuh in Amah pen “ABBA, Pa aw...,” cih sap theihna, neih theihna thupha na pia hi (Rom. 8; Gal. 3:26-27, 4:6).
B. Mihing ii Pa hihna
Pasian ii tawntung vaang leh liim in Pa hihna ahih bangin, Pate khempeuh in hih thuluanzia bang hileh Pasian ai-awhte ahi uh hi. Hih thu hangin Pa hoih khat pen Pasian tawh a kibang kici thei banah Pasian tawh kibat nading pen Pa khat ii a sangpen gualzawhna zong ahi hi. Hih thu hangin Sawltak Paul in Pasian leh innkuan kikal kizopzia hih bangin na gelh hi.
“Ahi zongin na theih ding uh ka deih thu in: Mi khempeuh’ lutang pen Khrih hi a, numei’ lutang pen pasal hi a, Khrih’ lutang pen Pasian ahihna thu ahi hi (1Kor. 11:3).”
Tua ahih manin Khrih pen pasal’ lutang hi a, pasal zong a zi leh a innkuan ii lutang ahi hi. Hih thuluanzia bang hileh pasal (PA) pen ama innkuan sungah Khih ai-awh (tangmi) ahi hi. Khrih in ama tungah a bawl bangin amah in zong a innkuante tungah a bawl ding kisam hi.
Topa Jesuh in tawntunga a sep nasep nampi thum om a, tua pen Pa ii sepding tavuante bangin gual lehang
(1) Siampi hihna: siampi khat bangin Pa in ama innkuan sungah Pasian ii tangmi bang hi ding hi.
(2) kamsang hihna: kamsang khat bangin Pa in a innkuante Pasian tawh kizopsak ding hi.
(3) kumpi hihna: kumpi khat bangin Pa in a innkuante Pasian tangin ukna nei ding hi.
C. Pa ii Tavuante
Pa ii sep ding tavuan tampi om a, a tunga gelhsa Topa Jesuh ii a nasep nampi thum tawh kizawitawnin gelh suak ding hi hang.
(1) Pa pen Siampi Hi
Pa pen ama innkuan sungah Siampi hi a, a innkuan ading ahi zongin, midangte ading ahi zongin a thunget ciangin Pasian maiah a innkuanpihte’ tangmi in a dingpa ahi hi. Pa khat ii gualzawhna pen tangmi bangin thungetsakna ah ahi zongin, Siampi khat bang ahihna tawh ahi zongin kizom gige hi.
Gentehna in Job pen Pasian maiah diktanin a kicing Pa khat cileng kikhial lo ding hi. Job in ta pasal (7) leh tanu (3) nei hi. Amaute gualnuam takin om den uh a, ahi zongin Job in nipi kal khat simin khatvei ta ziangsang thobaih in a innkuante tangin meihal biakpiakna nei den hi. Hih pen Thuciam Thak dan hileh JESUH KHRIH in a tate tangin a thungetsak tawh kibang lian hi. Tua bangin Pate pen amau tate adingin ai-awh thungen dingin dinmun a kipia ahi hi.
Tua bek tham loin Israel mite’ khang tangthu sungah Israel mite Egypt gamah saltan in gentheih haksatna nakpi thuakin a om laitak un tuuno tawh biakpiakna tawh amaute a honkhia dingin Pasian in geel hi. Israel mite leh Egypt mite kikhenna thu in Paisan pawi (Passover) hi. Zankim laitak vantungmi hong pai a, tuuno sisan kizutna innkuan khempeuh suakta in tuuno sisan kizut lo innkuan sunga tacil upen khempeuh that hi. Tua bangin tuuno sisan zut nadingin tuuno a teel kua hiam? Innkuan sunga ‘Pa’ ii tavuan ahi hi. Pa in tuuno gawh ding leh a sinsan kong tungah zut ding tavuan nei hi. Tua pen ama tavuan taktak ahi hi. Thudang in gen lehang Pa pen ama innkuan tang dingin Pasian in a teel leh koih Siampi dinmun ngahpa ahi hi.
Innkuan kimciat ading Pasian ii tatkhiatna nasep a kicin theih nadingin Pa tungah tavuan lianpi om hi. Lai Siangtho genna bang hileh ‘Pa’ ii nasep pen midang khat peuhin sem theilo cih hi. Pa in Siampi panmun la-in, tuuno sinsan a theh ciangin ama innkuante in bitna leh hotkhiatna ngah ding hi. Ahi zongin Pa in ama tavuan a pelh ciangin kuamah in ama munah lut in a innkuante honkhia theilo ding hi.
Tuhun ciang dongin Pate in tate ading, innkuan adingin Siampi panmun mah nei lai uh hi a, a innkuanpihte hotkhiatna a ngah kim ding uh pen Pa in nakpi-in kinin sep ding thupi hi. A pa’ upna hangin dawivei naupang khat in damna ngah hi (Mk. 9). Pasian in Pa-te pen innkuan siampi dinmun ah a koihna pen innkuanpihte ama kiangah tunpih theih nading ahi hi.
(2) Pa pen Kamsang Hi
Pa pen kamsang hi cihna ah, a innkuanpihte mai-ah Pasian’ tangmi bangin dinna hi. Pa pen gina kei taleh, ginna taleh amah pen a innkuanpihte mai-ah Pasian ii tangmi na hi gige hi. Pasian deihna, Pasian gennop thute a innkuanpihte tungah pulak in a kalsuanpih ding tavuan nei hi. Naupang khat in Pasian’ limlemel masa pen a pa tungpan sin masa hi ci-in lungsim natna damsak Siavuante, mihing kizopna lam a siam makaite leh Pasian’ nasem pawlkhatte in thukim uh hi. Mihing lel khat tungah Pasian piak a vang nei pen tavuan in midangte’ tangmi in dinpihna hi.
Mi khat in koi bang Pa a nei zongin, Pasian tungah a ngaihsut, a gamtatziate pen a Pa tungah tampi kinga hi. Hehpihna lungsim, kiniamkhiat in a lungvak, midangte tawh a kikholh baih Pa a neite in a Pa bangin Pasian tungah lungsimzia nei pah uh hi. Tua hi loin lungsim khauh, lungdam thei lo cih bang lungsim a nei Pa a neite in a Pa bangin Pasian tungah lungsim pua thei kha ding uh hi.
Thuciam Thak Lai Siangtho in Thuciam Lui mah bangin tate’ kha thu ding, pilna siamna ding tavuan khempeuh pen Pa’ liangko tungah suankhin hi. Nulepa in tate tungah thunei in kha thu ah a khantoh ding pattah theih hangin, a kipatcil hun a kipan tate’ kha thu ah thuhilh dingin a thuneipen in kikoih in ‘Pa’ bekmah ahi hi. Pa in a tate thuhilh in a pattah keileh a kicianin ama munah tavuan a la zo ding kuamah om tuanlo hi.
Innkuan kamsang hihna tawh Pa in innkuante tungah Pasian’ thuman thutak hilh ding, nuntakpih ding kisam hi. Kamsang cih pen mailam a hong piang ding thute gengenna bek hi loin Lai Siangtho sunga kilakkhia Pasian’ thute diktakin a hilhte ahi hi. Innkuanpihte in Pasian’ hoihna thei in, gupna kitel in, Pa hangin Pasian thu sungah nuamsa in citak takin Pasian sungah a nuntak ding uh pen Pa’ tavuan ahi hi.
(3) Pa pen Kumpi Hi
Kumpi khat ii tavuan pen ‘ukna neihna’ hi a, innkuan sunga Pa’ sep ding tavuan thumna zong ahi hi. Kumpi cih kammal pen ‘a ukpa’ cih kammal tawh kilaih thei a, Pa ii tavuan pen Pasian tangin ama innkuan a uk ding ahi hi.
Sawltak Paul in Pawlpi Sia dingte’ pianzia a genna ah: A innkuan sung hoihtakin a ukzo mi, a tate thumangsak thei-in, na khempeuhah a kilawm a kituakin a gamtasak thei mi hi ding uh hi. Bang hang hiam cihleh mi khatpeuh in a innkuan sung ukzia ding a theih keileh Pasian’ pawlpi kem theilo ding hi (1Tim. 3:4-5), na ci a, Pasian’ mite a maikaih dingte ii a thupipen leh a kisam pen pianzia in ‘innkuan sung ukzawhna’ ahi hi. Pa khat i hih leh i innkuan sung a ukzo, a makaizo hi leng hoih pen hi.
“Uk” cih Greek kammal a khiatna pen “a maipen ah ding/mun la” cih hi a, Pa ii tavuan zong uk ding, makaih ding, innkuan ading a maipen ah dingin kemcing ding, cihna hi. Atom in gen lehang, ukna a khiatna pen Pa in innkuan lutang hihna, Pa muanhuai hihna genna hi. Tua hangin Pa in a innkuante maiah dingin, limpha hi in, innkuan a susia thei lauhuaina khempeuh pan hubit in limtak nuntakpih ding ahi hi.
D. Pa in a tavuan a pelh ciangin
Pa khat in a innkuan tavuan pelhden leh bang thu a piang ding hiam? Thuhilhkikna 28 sungah Moses in thupi nih na gen a: Pasian’ thu a mangte tungah thupha ngah ding leh Pasian’ thu a manglote tungah samsiatna tung ding cih hi. Pasian’ samsiatna thu tampi kigelh lakah Thuhilhkik 28:41 sungah, Tanute le tapate na nei ding uh a, ahih hangin amauti pen nomau a’ hi lo ding uh hi; bang hang hiam cihleh amaute galmat suak ding uh hi, ci a, tanu tapa nei napi-in amaute tawh omkhop lohna, nopsak lohna pen samsiatna leh hamsiatna taktak ahi hi.
Pasian lungtuak innkuan nuam suah theih nadingin tavuan nei pen ahihleh Pa mah ahi hi. Innkuan lungtang ahi Pa in a tavuan hong sep loh ciangin innkuan sung nakpi-in kiamna, kisiatna, keungauna piangkhin hi. Tate tanute zong ankham lo, pilna siamna kicingzo lo, kha thu lamah zong kiam in innkuan zong kitoknawi thei hi.
Thukhupna
Pasian in muhtheih innkuan a makaih dingin Pa a koih hi a, Pa in Jesuh Khrih’ nasep nampi thum tawh kizui-in a innkuante limtak a makaih ding pen Pasian’ deihna ahi hi. Pa in zi nei, ta nei dinmun ciang bek tawh lungkim ding hi loin, Pasian pahtak innkuan dinmun tun dongin a innkuante a makaih ding hamphatna nei cih tel ding kisam hi. Innkuan ii mailam a khensat ding pen PA hi. Pa in innkuan limtak etcik ding Pasian in deih hi. Tua hileh bek tate zong Pa kiangah hong ciahkik ding uh a, innkuan picing hong suak ding ahi hi. Pate khempeuh tungah Topa in thupha hong piaksak tahen.
Laibu etkakte:
Lian Muan Kim, Nuntakna Kha An, 2018.
Derek Prince, Fatherhood, 2002.
Laibu Saal / Zomi eLibrary
