NUTE' NI-A NUTE' ITNA THU A LUNGNGAIH THAM CINGTE.
May13 pen Leitung bup ah Nute' Ni (Mother's Day) ci-in kizang ding hi. Na pian'na nu na khasiatsak khak leh a sih ma-in lungkimsak sawm teitei in. Na pianna tunnu khasia sakin, kulsin ah khasiasa-in na zaal sak leh na mavang lo ding a, na daupai lo ding hi cih mangngilh kei in. Kei bangin thumang loin vak thap in, nute khasia sak ngei na om uh a, pianna nute khitui nulsak ngei in, a ihmu mawhsak ngei na om uh leh hih thute lim takin lungngaih pha kik un.
"Nu aw, moh at pheng (bread slice) thum zong kei adingin ka gilvah tham cing hi," na cih ciangin moh at pheng li pheng nga hong piatuah den na tunnu hi.
Khualak na vak khiat ciangin a sawt loin nang hong lunghimawh pahin, phone call tawh hong ho-in, na tun mateng a lungnuam lo den na tunnu hi.
Thumang loin vakthap in, ihmut hun in inn na ciahkik mateng hong ihmutsan ngam loin, ihmut suak mahmah napi inn na ciahkik dong mitsan gilgial liangin a mittui luang keuhkeuh in thungen a hong ngak den na tunnu hi.
Nek ding khatpeuh, thei leh nektheih nam khatpeuh inn ah thum om a, innkuan milip li na phak ciangun "Kei ka gilkial kei, duh keng... no lim takin ne un," hong ci ngam a, duh mahmah napi hong nekkhiat ngam den na tunnu hi.
Zanpuan (blanket) khat beek silh loin na lup hangin na khanlawh ciangin zanpuan khat tawh hong na tuam na tunnu hi.
A gamla ah khuazin dingin na zinkhiat ciangin na nek ding sunsiah leh an a lim thei pen dingin na nek ding hong tunsak in, "Na lawmte tawh ne se kei in la, nang bekin ne in," hong ci na tunnu hi. Na lawmte a a haza leh a muduh man loin nang ading hong khual luat man hi zaw hi.
Khual gamla ah zinkhia in, inn na ciakkik ciangin, "Na khualzinna na tawl lua hiam? ci-in tuisik hong suah masa pen leh an lim thei pen hong pia masa na tunnu hi.
Zan sawtpi zankhang dong lai na sim ciangin tuilum, niangtui, coffee ahih kei leh nekthei pak ding na khatpeuh (snack) a om bangbang hong bawl dingin ihmut kham lo liangin a mansa a om gige, gim ing tawl ing ci loin nang ading hong bawlsak nuam den na tunnu hi.
A tate ading ahih peuh leh mun gamlapi dong ah pai-in biakinn ah thungen a pai ngap den na tunnu hi. Guah nuai, thosi thovai leh phalbi khuavot nuai ci loin nang ading thungen a kuan ngap den na tunnu hi.
Hun khatpeuh ciangin na pianna tunnu mudah in, a tungah hehna ding bekbek zong thapai in, a thu a la om lopi-in hehsan in, na nuaksan hangin cik mahin hong hehsan leh nuaksan den ngei lo leh hong ho masa khial kik ngei lo na pianna tunnu bek hi a, na muhdah mahmah hangin hong it den na nu bek hi. Kha kua sung hong paai-in, a duh a ngaih ne thei loin, a vaksuk a vaktohna mun tengah gim leh tawl ing ci loin hong daipih ngam in hong paai na tunnu bek hi. Na suah cil a kipanin kum 3 hoih na phak mateng na ihmut suah hun in hong pom, hong pua den in, na kah ciangin hong khem in, gim leh tawl ing ci loin a vaksuk a vaktohna mun teng ah hong pua den in, zun leh ek na thak khum hangin hong phunsan ngei lo, ihmut kham lo liangin hong keem hong khoi hong it na tunnu laih thei ding kuamah leitung bei dong zon hangin na mu zo kei ding hi.
Hih leitung ah na nu tha khek zo ding leh zalaih theih ding na zonzon hangin na mu zo ngei kei ding a, sum leh pai tawh lei sawm in, na hahkat mahmah hangin vannuai leitung mun khempeuh na zon hangin na pianna nu banga hong it ding na mu zo ngei kei ding hi. Nute' Ni hong tun ciangin ama muh phak loh dingin a maan leh na itna thute Facebook ah na post thapai den sangin, "Hong it ing nu aw... Nu in kong neih khak hampha kisa lua ing... Na khan kumkhua sawt hen nu aw..." cih teng bek ci lecin zong na khasiat saknate, a khitui na luan'saknate mangngilh zo ding a, a teek a guai khinsa na nu adingin damna zatui vitamin thawlpi khat na leisak sangin manpha zaw ding hi. A sih ciangin kawsah puanbuk na kengsak zo kei zongin a nuntak lai teng lungkim sak peuh lecin na thupha ngahna kihonna hi ding hi.
Agelh ~ Thang Khan Lian
