NUNTAK NA KAHLEI.
Laigelh ~ Mungsan
Mihing I nuntak na ah pilna leh hauhna ki lunggulh mahmah tek hi. A hih zong in sangkah khempeuh ong pil khin lo aa, sum zong(bawl) khempeuh zong hau khin tuan lo hi. Lei pian a ki pan in kua te pil ding hi, kua te hau ding hi cih in khen sat sa, gel sa in ki koih khol na hi tuan lo in a ki bang kim tek in guahzu, nitaang, khuavak, ong ki pia a hihi. A hi zong in a pil deih ki om aa, a hau deih ki om in nuntaak na khat leh khat ki lam dang in ki bang kim lo hi.
Zogam I khualam leh muntuam tuam aa om sanggam NulehPa te’n tu laitak din mun I nuntaak na ciang bek mah ei tawh ki tuak hi ci in I ngaih sut khak loh ding thupi ka sa hi. Leitung mi hau pen te lak ah ki hel Billgate in “bangmah nei lo in na piangkhiat pen nang khialhna hi lo aa, bangmah nei lo mah in na sih leh nang khialhna hi” ci hi. Ngimna ngaih sut na te leitung tawh ki kim in kalsuan ding a hihi.
Leitung ah mihing in cidam tak in I pian khiat nak leh pumpi, khut leh khe, muk leh kam a kim in ki nei tek aa, nikhat in nai sawmnihlehli(24) tek a ki bang in ki nei in, zan nai sawmlehnih(12), sun nai sawmlehnih(12) cih bang in I nei tek hi. Tu lai tak leitung ah mi pil, mi siam, mi hau ten; pilna,siamna, hauhna mi dang te sang in a neih zawk nang in a mau a ding nai a val in ki pia tuan lo hi. Nang leh kei hun ngah zah mah nisim in ngah in a zangh uh a hihi.
Mi pawlkhat te nulehpa gamhluah in sumhau zong om veve hi. Pianpih khuak a hat deuh om mah hi. Maanhi! a hi zong in nulehpa gamh sumlehpaai tampi a luah khempeuh hau pai suak lo hi. Pianpih khuak hoih mahmah khempeuh mipil hi khinlo uh hi. Banghang pawlkhat te pil zaw diak aa, hau zaw diak se hiam?
A hang in nang, kei leh zomi te I zat siam het loh leh I thudon het loh ‘HUN’ a na zat siam mahmah man uh a hihi. Hun zat dan I siam loh man in I sin zah in ki pil lo aa, I zon zah in ki nei lo hi. Hun zat siam na in I nuntak na tampi ong ki lamdang sak in ong khangto sak hamtang hi. Tua a hih man in na nisim nuntak na-na hun a hoih thei penpen leh a mawk bei lo thei thei ding in gel hamtang in. na hih na khempeuh na pumpi, lungsim leh kha a ding in khantoh na a om ding manphat na nei na te ah hun tampiak masak ding hamciam in.
Gtn: laisim hun, na sep hun, an nek hun, gym pai hun, innkuan te tawh ki ho lim hun, thunget hun a tuamtuam in khen dimdiam in. Tuhun (social media) facebook, TV, Movie cih te ah hun a tawmbei thei thei ding in gel in.
Hih bang in na nisim nuntaak na-na hun hoihtak in na gel sitset theih aa na zuih zawh, na kalsuan zawh nak leh kum khat kum nih sung in na nuntaak na, na lawm na gual te tawh pel lo na ki lamdan hamtang lam na ki thei pah ding hi. Na pilna, na thu theih na ong khang ding hi. Kiim leh paam thu sia la sia zong a beisa hun sang ong om lo zaw ding hi. Na kha sum a khan loh hang na sum ong ki khol zaw hamtang ding hi.
(Time is money) Hun in sum hi a cih mah bang in hun zat I siam loh luat man in ki sam lo pi ah sum mawk bei in, ki sam lo pi ah buai na thusia, la sia teng I va nawk kha zel hi. Hun zat siam loh man in supna tam mahmah hi. Ki man na nei lo facebook, TV, Movie cih te ah hun na bei sak luat leh hun in sum hi I cih mah bang in sum a mawk bei sak sak tawh na kibang lel hi. USA ah na sep zawh zah tawh sum ong ki pia lo aa, nai tha tawh ki zui in sum ong ki pia hi.
Tua a hih man in hun zat siam na tawh Pilna, hauhna zong khawm ni. Hun in manpha mahmah a hih man in nang.kei leh zomi bup I nuntaak na a ding in hun zat siam na kah lei bang in dawh in mangvom, mang kang te tung ah kahto in khangtoh na lam mainawt ni.
Source :
from: Lengtong Hoih
to: Cinpu Zomi <cinpuzomi@gmail.com>
date: Wed, Mar 14, 2018 at 12:40 AM
subject: article
Laibu Saal pan suahsak dingin hong kikhak ahi hi.
