NI SAWM NI
BIAKPIAKNA LAIGIL
No le no Pasian kiangah kipia un...
A thumaan ngimnate aading zattheih dingin
na hihna bup uh tawh ama kiangah niamlut un.
Rom 6:13 (TEV)
Biakpiakna a laigil pen niamlutna hi.
Niamlutna (surrender) cih kammal pen kipakta khollo a, kipumapna (submission) kammal zah phial mahin kideih lo hi. Lelhna gimnam pian a, kuamah a guallel ki-ut lo hi. Niamlutna kammal i zat ciangin gal kidona ah gallel, kidemna khatpeuh ah guallel, ahihkeileh a thahatzaw khat kiangah lut, cih danin a nopci lo theithei thu-omziate i mitkha ah hong luai hi. Hih kammal pen a hoihlo lamin kitamzat zawdiak sawn hi. Khutkhial mite a kimat ciangin ukna nei mite kiangah niamlut uhhi.
Kidemna a khauh mahmah tu hun nuntak khuasakna sungah lungkiat ngeiloh ding leh khiapsuk ngeiloh dingin hong kihilh ahih manin niamlut cih thu tawh kisai kitamzak khalo hi. Gualzawhna mah a thupipen ahihleh niamlutna cih pen ngaihsut theihloh ding thu hong suak hi. Lelh ding, kipum-ap ding, thuman ding, leh niamlut ding cihte sangin gualzawh ding, lawhcin ding, tungnung tuan ding, cihte mah i kikum nuamzaw ding hi. Ahi zongin Pasian kiangah niamlutna pen biakpiakna laigil na hi sese hi. Tua pen a lamdang Pasian’ itna leh hehpihna, maan takin i dawntuahna hi. Ama kiangah ei le ei i kipia a, tua pen launa ahihkeileh sep ngeina khat hang hilo-in itna hang hi. “Banghanghiam cihleh amah in eite hong it masa hi.”1
Paul in up ngamhuailo zah dinga a lian Pasian’ hong hehpihna thu, Rom laikhak khawklian masa 11te sungah hong gentel khit ciangin Pasian kiangah biakpiakna tungtawnin i nuntakna bup tawh i niamlut nadingin hong hanthawn hi: “Tua teng ahih manin lawmte aw, Pasian’ hong hehpihna lianpi hangin...ama nasepna aading a kipiakhia, amah a lungkimsak, a hingtang biakpiak van khat bangin no le no Pasian kiangah kilui un. Tua pen note’ luih ding a kul biakpiakna maan hi.”2
Biakpiakna maan -- Pasian’ lungkim nading sepna -- cih pen nang le nang Pasian kiangah a bupin na kipiak ciangin hong piang hi. A tunga khawkneu sunga kilui, luih cih kammalte limtak ciamteh in.
Nang le nang Pasian kiangah na kiluih pen biakpiakna i cihcih pen hi pah hi.
Hih, mimal niamlutna pen min tuamtuam tawh zong kilo thei hi: Pasian aading kipiakna; Jesuh, Topa-a saanna; singlamteh puakna; “kei” cih lungsim a sihna; Kha Siangtho kiangah lutna, cih bangte hi. A min na lawhdan thupi lo a, na hih takpi ding kisamzaw hi. Pasian in na nuntakna -- a vekpi-in -- deih hi. Za ah sawmkua-le-nga cih pen kicing lo hi.
Pasian kiangah a bupin niamlut ding hong khaktan thei thu thum om a, tuate pen: launa, kiphatsakna, leh lungbuaina, cih teng hi. Pasian in bangzahin hong it cih tello i hih manin niamlutna zong a khiatna i theikhial a, i nuntakna ah ei le ei i ki-uk nuam hi.
Pasian ka muang thei ding hiam? Muanna pen niamlutna sungah omloh a phamawh kihelpih khat hi. Pasian na muan masiahsiah ama kiangah na niamlut kei ding a, thu khat leuleu ah amah na theihtelbeh mateng amah na muang theikei ding hi. Launa in i niamlut ding hong khaktan a, ahi zongin itna in launa khempeuh notkhia hi. Pasian in bangzah takin hong it cih na theihtel zahzah, niamlutna zong hong ol pah ding hi.
Pasian’ hong itna bangci theih thei na hi hiam? Amahmah in siksan theih ding thu tampi hong pia hi: nang hong it ahihna pulak hi;3 ama muhlohna ah na om ngeikei hi;4 na nuntakna a neng a tawng dongin hong kinpih hi;5 nopsakna namkim na ngah theih nadingin hihtheihna hong pia hi;6 na nuntakna aading geelna hoihte nei hi;7 na mawhna hong maisak hi;8 nang tungah itna tawh hong lungduai mahmah hi.9 Pasian in nang’ ngaihsut theihzah sangin teh theihloh a sangzaw thamin nang hong it hi.
Tua itna hong kilahkhiatna a lianpen pen nang aading Pasian’ Tapa hong kiluina pen hi. “Eite mawhnei i hih laitak eite aading Khrih hong si ahih manin Pasian in eite hong itna kip takin hong lak hi.”10 Pasian aading nang bangzahin thupi cih na theihnop leh, singlamteh tungah a khutte zan kawmin “Hih zah takin nang ong it ing. Nang lo tawh ka nuntak sangin kei si nuamzaw ing” hong ci Khrih en dih in.
Pasian pen kipum-apna i neih nadingin zawhthawh thu tawh hong tawsawn gawpgawp a gilo sila ukpa ahihkeileh mi ngongtatpa hilo hi. Amah in i lungsim deihna kantansawm lo a, ama kiangah ei le ei suakta takin i kiluitawm theih nadingin hong heelzaw hi. Pasian pen itna a nei, a suaktasakpa khat hi a, ama kiangah niamlutna in kikhihna piangsak lo-in suahtakna hong tunzaw hi. Jesuh kiangah eimahmah a bupin i va niamluttawm ciangin amah pen thagum hatna a suang ukpa bang hilo, i honpa ahihlam; naseem uk bang hilo, i sanggam ahihlam; khatkia thuneihna a zangpa hilo, i lawmpa ahihlam i mukhia ding hi.
Hihtheihloh nei i hihlam pulakna. A bupin niamlut ding hong khaktan thu nihna pen i kiphatsakna hi. Piansak nate cih ciang bek i hihlam, leh na khempeuh a uk a van i hihlohlam i kipulak nuam kei hi. “Pasian tawh na kibang ding uhhi”11 cih pen tangtawng pek panin i lelhtaak zia-etna hi. Tua lunggulhna -- a uk dinmun utna -- in i nuntakna sungah lunggimna nakpiin piangsak hi. Nuntakna cih pen thasaanna (struggle) khat hi a, ahi zongin Jakob’ tuahkhak ngei mah bangin tua i thasaanna pen Pasian tawh thasaanna ngiat ahihlam mi tampite in theitel lo uhhi. Pasian i suak nuam a, tua hangin tua thasaanna ah i gualzawh nading lampi om lo hi.
A.Z. Tozer in, “Mi tampite a buai detna uh, hanciam napi-un a khantoh theihlohna uh, a hang pen amau aituam thasaanna a mong dong tung nailo uh ahih man hi. Thupiak ding i hanciam den a, i sunga Pasian’ nasepna i va nawngkaisak den hi” ci hi.
Eite, Pasian i hikei a, zong i hi ngeikei ding hi. Eite pen mihing i hihi. Pasian suak nuamin i hanciam ciangin tua bang mah a na ut ahi Satan mah bangin i puk hi.
Eite in i mihing hihna pen lungsim sukkhak thu tawh hilo-in lungsim pilna tawh i saang ding hi. I hihtheihloh thute i tuahkhak ciangin thangpaihna, hehna, leh khasiatna tawh i thukkik thei hi. I tun a sangzaw ding (ahihkeileh a tomzaw ding), a pongzaw ding, thatang a hatzaw ding, siamna a neizaw ding, mel a hoihzaw ding, leh neih le lam a hauzaw dingin i lunggulh hi. I ut teng seem nuamin i deih teng i ngah nuam a, tua bang hong pianloh ciangin lungkia-in i dah hi. I neihloh pawlkhat Pasian in midangte a piak i muh sawnsawn ciangin eenna, hazatna leh ei le ei hehpihhuai kisakna hong piang hi.
Niamlut a khiatna. Pasian kiangah niamlut cih ciangin bangmah gamtaang lo-in kihepkhiatna, kaam thu bek muanna, ahihkeileh thadah vuina cih bangte hilo hi. Tu-a thu-omzia (status quo) ahi bangin saanna zong hilo hi. A kilehbulh khat hihtuakzaw a, Pasian kiangah niamlut i cih ciangin laih ding a kisam thu khat laihzawh nadingin na nuntakna pia, lui, ahihkeileh gimna thuak, cihna hi. Pasian in a niamlut mite ama taangin galdo dingin sam thei hi. Niamlut cih pen meidawite ahihkeileh a niamkiatte aading hilo hi. Tua mah bangin khuak pilna nusia ding cihna zong hilo hi. Pasian in zatloh dingin na khuak mawkbawl lo ding hi. Pasian in set milimte (robots) ama naseem dingin deih zenzenlo hi.
Niamlut i cih ciangin na sungpua melpuakzia (personality) seelcipna hilo hi. Pasian in na sungpua melpuakzia a tumdang teng na zatkhiat ding hong deih hi. Niamlutna in tuate beimangsak cih sangsikin khangtosak hi. C.S. Lewis in, “Pasian ki-uksak seemseem lehang, eite ama bawlsa i hih manin i hihna taktak bangin i hito seemseem hi. Pasian in nang le kei dinga hong ngimsa a om bangin mihingte a tuamtuamin hong bawl hi...Khrih ka zuat ciangin, Ama sungpua melpuakzia sungah kei le kei ka kipiak ciangin, kei’ aituam sungpua melpuakzia taktak khat ka ngah pan hi” ci hi.
Niamlutna thu pen thumanna thu (obedience) ah kitelpen hi. Hong cih bangbang “Hita hen, Topa” ci-in na mang hi. “Hilo hi, Topa” cihna pen thalnialna hi. Jesuh’ hong cih mang lopi-in amah Topa na ci theikei hi. Peter leh a lawmte zan khat tawntung nga bengin bangmah a ngahlohna uh mun ah ngen khatvei khuh kik dingin Jesuh in a sawl ciangin Peter in niamlutna a cih thu, hih bangin na lakkhia hi: “Topa, zan thapaai nakpi-in ka seem uh a, ngasa khat nangawn ka man kei uhhi. Ahi zongin hong sawl na hih manin ngen ka khuhsuk ding hi.”12 A niamlut mite in Pasian’ cih bangbang, a khiatna omtuak ta keileh, mang uhhi.
A bupin niamlutna sunga kihel thu dang khat pen muanna (trust) hi. Abraham in koi tak tung ding cih thei lopi-in Pasian’ makaihna zui hi. Hannah in cik ciang tangtung ding cih thei lopi-in Pasian’ sep ding hun ngak hi. Mary in bangci danin hong piang ding cih thei lopi-in na-lamdang khat lam-enin om hi. Josef in thu le late bang hangin tuaci pian cih thei lopi-in Pasian ngimna muang hi. Hih mite khatciat Pasian kiangah a bupin niamlut uhhi.
Vai khatpeuh ah nang’ phattuam nadingin midangte’ pilna siamna zat ding (ngian-vat ding), nang’ thusun teng hong kiman nading, thu-omzia na heizawh nading, cihte hanciamsawm lo-in na hong seem dingin Pasian mah na muan ciangin Pasian kiangah a niamlut na hihi. Nang, om hiithiat lelin Pasian na seemsak in. Nang, “thuvanpi” (in charge) na hihdet kullo hi. Lai Siangtho in, “Pasian kiangah niamlut inla lungduai takin amah ngak in”13 ci hi. Hanciambeh lo-in muanbeh in. Hong kisiatgennate thukkik lo-in nang le nang na kiphelh samsam sawmloh ciangin zong a niamlut na hihi. A niamlut lungsim pen kizop kikomnate ah kilangpen hi. Na niamlut ciangin midangte na nawlkhiin kei a, nang’ ngah hamtang ding thute (rights) zong na kal kei a, nang’ aituam hamphat nading na seem kei hi. Mi tampite aadingin niamlut ding a haksatpenna mun pen sum le paai thu hi.
Mi tampite in, “Pasian aading nungta nuam mah ing. Ahi zong, nuntak a ol nading leh ni khatni teh nuamtak ka tawlngak theih nadingin lah sum a kicingin zong nuam ing” ci uhhi. Pensen lakna (retirement) cih pen a niamlut nuntakna ii lungtup kungpi hilo hi. Banghanghiam cihleh tua pen i nuntakna sunga kin masak ding tawh kisai thu ah Pasian tawh kidemna hi. Jesuh in, “Pasian leh sum aading a nihin na seemkhawm theikei ding uh hi”14 a cih banah, “Na neih na lamte uh koikoi-ah a om zongin tua mun ah na lungsim uh zong om ding hi”15 ci lai hi.
Niamluttawmna tawh kisai etteh ding a bulpi pen Jesuh hi. Kikhailupna a thuak ma zanin Jesuh pen Pasian’ geelna sungah amah le amah niamlut hi. Amah’n hih bangin thungen hi: “Pa aw, nang aadingin na khempeuh hithei hi. Hehpihna-in hih gimthuakna hai kei kiangpan hong akkhiatsak in. Ka cih hangin kei’ deihna bang hilo-in nang’ deihna bang ahih ding ka ut hi.”16
Jesuh in, “Pasian aw, hih gimna a lakhia zo ding na hihleh hehpihna-in lakhia dih in” ci-in thungen lo hi. Na khatpeuh Pasian in hihthei ahihlam amah’n pulak khin hi. “Pasian aw, hih gimthuakna paihkhiat ding nang’ lunglutpen thu sungah a kihelkhak zenzenleh hehpihna-in tua bangin hong seem in. Ahih hangin hih thu in na ngimna kicingsak ding ahihleh tua pen keima lungdeih zong hi pah hi” ci-in ngenzaw hi.
A niamlut takpite in, “Pa aw, hih bang buaina, gimna, leh natna ahihkeileh hih bang thu-omzia pen keima nuntakna sung ahihkeileh midang khatpeuh’ nuntakna sunga na ngimna leh na minthanna kicinsak nadingin kisam ahihleh tua pen hehpihna-in lakhia kei in” ci uhhi. Tu-a dan picinna ciang tuntoh nading pen a thubaih hilo hi. Jesuh’ tuahkhak thu ah zong Pasian’ geelna hangin amah gim mahmah a, a khua-ulte sisan bangin taak tanghial hi. Niamlutna cih pen nasep haksa mahmah khat hi a, angsung bulphuh i pianzia tawh nakpi-in kidona hi.
Niamlutna thupha. Pasian kiangah a bupin na niamlut ciangin na hamphatzia ding Lai Siangtho sungah kitel takin kigelh hi. A masapenin lungnopna na ngah hi: “Pasian tawh na kitot khawl phot in! Amah tawh kithuhual lecin a tawpna ah lungnopna na ngah ding a, nang aadingin nate hong lem ding hi.”17 A zom ah, suahtakna na ngah hi: “Pasian’ zia le tongte leh a bei ngeilo suahtakna sungah nang le nang kilui in...ama suahtakna sungah kihong takin a nungta thei dingin (ama) thupiakte in nang hong khahkhia ding hi.”18 A thumna ah, Pasian’ vangliatna na nuntakna sungah na ngah hi. Lungtang a pha mahmah zia-etnate leh a thakhauh buainate Khrih kiangah tun lehang ama tungtawnin kizo thei hi.
Joshua in a khan sunga gal kisimna lianpen a tuahkhak ciangin19 Pasian tawh kimaituahin a mai-ah bokin bia a, ama geelna teng tawh niamlut hi. Tua niamlutna in Jerikho khuapi ah a lamdang galzawhna khat piangsak hi. A kitukalh tawh a kibang thumaan (paradox) khat pen hih bang hi: Niamlutna tungtawnin galzawhna piang hi. Niamlutna in nang hong thaneemsak lo-in hong thakhauhsak hi. Pasian kiangah niamlut lecin vai dangte ah na kihtak ding ahihkeileh na niamlut ding kul nawnlo hi. Hotkhiatna Galkap (Salvation Army) a phuankhiapa William Booth in, “Mi khat ii vangliatna a phatzah pen a niamlutna zah tungah kinga hi” ci hi.
Pasian’ mizatte pen a niamlut mite hi. Pasian in Jesuh’ nu dingin Mary a teelna pen siamna a neih man, a melhoih man, ahihkeileh a hauh man, cih bang hilo a, ama kiangah a bupin niamlut ahih man hi. A piangtheilo phial ding tawh kibang Pasian’ geelna thu, vantung mi in a koh ciangin Mary in lungsim kip tawh, “Kei pen Topa’ naseem nu ka hihi. Ama deih bangbang saan ding ka ut hi”20 ci hi. Pasian’ khutsunga om a niamlut nuntakna sangin a vanglianzaw bangmah om lo hi. “Tua ahih manin Pasian kiangah nang le nang a bupin kipia in.”21
Nuntakzia ding lampi hoihpen. Mi khempeuh pen a tawptawpna ah bang hiamkhat ahihkeileh kua hiamkhat kiangah niamlut tek uhhi. Pasian kiang hilo ahihleh na niamlutna pen midangte’ ngaihsutna tungah ahihkeilleh lam-etna tungah, sum le paai tungah, khasiatna tungah, launa tungah ahihkeileh na kiphatsakna, na lunggulhna, ahihkeileh na angsung lungsim tungah kinga ding hi. Nang pen Pasian a bia dinga hong kibawl hi a, Pasian biak ding na pelh leh na nuntakna na piak theih nading nadangte (milimte) na piangsak ding hi. Na niamlut nading mun teeltheih nading suahtakna na nei a, ahi zongin tua na teelna huhau-a piang thute pan na suakta theikei hi. E. Stanley Jones in, “Khrih kiangah na niamlut keileh kisiatna mun ah a niamlut na hihi” ci hi.
Niamlutna pen nuntakzia ding lampi hoihpen hi lo a, nuntakzia ding khat bek a om lampi hi. Lampi dangte, khat zong kimang lo hi. A dangte khempeuh in lungkiatna, lungkim lohna, leh ei le ei kisuksiatna ah hong tun hi. Lai Siangtho King James Letkhiatbu sungah niamlutna pen “thulam a tawn, na nasepna”22 ci-in min kivawh hi. Letkhiatbu dang khat ah “Pasian’ na sep nading lampi a lekkimpen”23 kici hi. Na nuntakna tawh na niamlut pen a haivai, lungsim phuutna banga gamtatna hilo-in a pilvai, thulam a tawn gamtatna khat hi a, na nuntakna a thupi theipen leh a lekkim theipen dinga na zatna hi. Tua hangin zong Paul in, “Tua ahih manin amah lungkimsak ding cih pen i lungtup kungpi dingin i nei hi”24 na ci hi. Pasian kiangah “himah” (yes) na cih hunte pen na pilvangpen hunte hi ding hi.
Na nuntakna sungah Pasian’ thupha na ngah ding hong khaktanpi pen midangte hilo-in nangmahmah na hihlam -- na angsung theihna, na kiphatsakna leh nang’ aituam ngimna, cihte ahihlam -- na theih nading kum tampi kisam thei ding a, ahi zongin a tawpkhakna ah na theikhia veve ding hi. Nang’ aituam geelnate bek mitsuanin na neihleh na nuntakna aading Pasian’ geelsa ama ngimnate na cin zokei ding hi.
Na sungah Pasian in ama nasepna thukpente hong seem ding ahihleh tu-a bangin hong kipan ding hi. Tua hi a, a beisa huna na khasiatnate, tu laitak-a na buainate, mailam hun aading na lungtupte, na launate, na sunmangte, na thaneemnate, na uuknate, na liamnate, leh na dongtuahnate, a vekpi-in Pasian pia in. Mawtaw hawl bangin kigenteh lehang, a hawlpa’ tutna ah Jesuh tusak inla a heekna zong na khutte tawh lawng sese kei in. Lau kei in; ama letcingna nuai-ah bangmah kitolkhia lo ding hi. Jesuh’ hong sinsakna hangin na khempeuh na zeeksiam ding a, Paul tawh na kibangto ding hi: “Ka sungah sunglam tha hong thunsak ahi Ama tungtawnin na khatpeuh aading zattheih dingin, leh na khatpeuh tawh kithakim dingin, ka om hi. Cihnopna ah Khrih’ kitangcinna sungah kei zong ka kitangcing khop hi.”25
Paul a niamlut kipat hun pen Damascus lampi tungah mit a mangsak khuavak khat in a kaptukna pan hi. Ei, a dangte aadingin ahihleh Pasian in tua sangin a neemzaw thu le late tawh i lungsim hong la hi. Bangbang ahi zongin niamlut cih ciangin khatvei thupiang bek hi ngeilo hi. Paul in, “Nisimin ka si hi”26 ci hi. Niamlut kipat hun a om mah bangin niamlut zat-kisin hun cih zong om a, tua pen hun khatkhit hun khat banah khan tawntung hi ding hi. A hingtang biakpiakna ah a kibuaipih thei thu pen biakpiak tau pan taalkhiatna hi a, tua hangin ni khat sungin na nuntakna sawmnga vei peetmah na niamlutsak kikkik ding kisam kha ding hi. Niamlutna pen na nisim nasep na hihsak ding kisam hi. Jesuh in, “Mite in ka nung hong zuihnop uhleh amau deih van le nate a nusiatloh uh phamawh hi. Ka nung hong zuih theih nadingun a nuntakna uh nisimin a nusiatnop ding uh kisam hi”27 ci hi.
Galphawnna (warning) khat kong pia nuam hi: A bupin a niamlut nuntakna tawh kalsuan dingin na khensat ciangin tua na khensatna hong kisittel ding hi. Tua bang i cih ciangin khatveivei a nuam khollo, mi’ utloh, a gimhuai, ahihkeileh a piangtheilo ding tawh kibang, nasep mabante sepna zong hi thei ding hi. Na sepnop khat tawh a kikeelki nasep khat sepna zong hi thei hi.
Kumzalom sawmnih sunga Khristian makai minthangte lakah khat pen Campus Crusader for Christ a phuankhiapa Bill Bright hi. Leitung mun citenga Crusade naseemte bangin a va pai “Kha Thukhun Thu Lite” (the Four Spiritual Laws) kici laidalno kihawmte, leh mi awn tulli val in a etkhak uh “Jesuh limhing lahna” (the Jesus film) tungtawnin awn 150 sangin a tawmzawlo mite in Khrih hong zuan uh a, tuate in vantung ah tawntung hunnuam ngah ding uhhi.
Khatvei, Bill Bright kiangah, “Pasian in bang hang’n na nuntakna hizahin ong zang-a thupha ong pia ai tam?” ci-in ka dong hi. Amah’n, “Ka khangno lai-in Pasian tawh thukimna khat bawl ing. Tua pen laidal khat ah gelhkhia-in a nuai-ah ka min thuh ngiat ing. Tua ka laigelh bel hih teng hi: Tuni-a kipanin Jesuh’ sila ka hihi.”
Tua bang dan Pasian tawh thukimna nam na bawl ngei hiam? Ahihkeileh na nuntakna sungah a lungkim bangbanga na hong seem thei Pasian’ thuneihna tawh kisai-in Pasian tawh a kinialnial lai peuh na hikha hiam? Tu-in -- Pasian’ hehpihna, hong itna, leh a pilna, cihte sungah -- na niamlut ding hun hong tung ta hi.
NI SAWMNI
KA NGIMNA TAWH KIPAWL LUNGNGAIHNA
Lungngaih Ding Thu: Biakpiakna a laigil pen niamlutna hi.
Phawk ding Khawkneu: "A thumaan ngimnate aading zattheih dingin
ama kiangah na hihna bup uh tawh niamlut un" Rom 6:13b (TEV)
Ngaihsut Ding Thudotna: Ka nuntakna bang mun tengah Pasian
kiangpan paikhia ka hi hiam?
Source:
Laibu Min : Ngimna' Tawsawn Nuntakna (The Purpose-Driven Life)
Laigelh : Rick Warren
Lailet : PLMangno (Power Translation Service) raymang@gmail.com
Laibu bawl kum : 2006
Laisim Mimalkim tungah Zotna :
Hih laibu pen ni 40 sung sim ding ahih manin nikhat in khatta(nikhat aita) Laibu Saal website (www.zomielibrary.com) pan hong suah toto ding hi ung…
Hih laibu, abu ngiatin a deihte’n Lailet, laibu bawl Sia PLMangno' email : raymang@gmail.com ah kidawp thei hi.
