NI SAWMLI NI
NGIMNA NEI NUNTAKNA
Mihing’ lungsim sungah geelna tampi om a,
ahi zongin a tangtung pen TOPA’ ngimna hi.
Paunak 19:21 (NIV)
“Banghanghiam cihleh David in...ama khanghun sungin
Pasian’ ngimna bangin naseem hi”
Sawltak 13:36 (NASB)
Ngimna nei-a nuntak bekmah nuntak tattak theih nading lampi hi. Thudang nadangte khempeuh pen a om pong ciangbek (just existing) mah ahihi.
Mihing a tamzawte pen nuntakna sunga thu guipi thumte tawh kilaai kinuai den uhhi. Khatna ah, hihna dinmun (identity) hi: Kei kua ka hi hiam? Nihna ah, thupitna (importance) hi: Kei ka kul hiam? Thumna ah, butna (impact) hi: Nuntakna sungah kei’ mun bang ahi hiam? Hih thudotnate a dawnna pen nang aadinga Pasian’ hong geelsak ama ngimna ngate sungah kimu thei hi.
Inndei Tungnung (Upper Room) sungah Jesuh in a nungzuite tawh a nasepna mahialni hun a zatkhop laitakin etteh lim dingin nungzuite’ khe silsak a, tua ciangin “Tu-in hih thute theita nahihman un mite tungah hih bangin na sep uhleh thupha na ngah ding uhhi”1 ci hi. Na sep dinga Pasian’ hong deihsak thu natheih khit leh tua nasep na sep takpi ciangin thupha hongtung hi. Tu-in i ni sawmli kha khualzinna a mongdong i tung ta a, na nuntakna aadinga Pasian’ hong deihsak ama ngimna zong theita nahihman in tuate na sep leh thupha na ngah ding hi.
Tua i cih ciangin thudang nadangte seem nawnlo ding cihna zong hithei hi. Na khan sungin na septheih ding “na-hoih” tampi om khathei ding a, ahi zongin Pasian’ ngimnate pen na sep hamtang ding thu phamawh ngate hi. A dahhuai khat ah, a thupipen thute pan kilampial-in tuate kimangngilh pahpah thei hi. A kitangsampipen thute pan kitaalkhia-in damdamin a nawl kitung thei hi. Tua bang ahihloh nadingin na nuntakna aadingin ngimna thu pulakna khat bawlin tua mah maanmaanin na etkikkik ding kisam hi.
NUNTAK NGIMNA THU PULAKNA I CIH BANG HIAM?
Nang aading Pasian’ ngimnate a tomin hong lak hi. Na nuntakna aading Pasian’ hong geelsak ngimna ngate seem dinga na ki-apna nangma kam mah tawh na kipsak hi. Ngimna thu pulakna pen lungtup teng gualhsukna hilo hi. Lungtup kungpite tomno kal sung bek kimang a, ngimnate ahihleh tawntung kimang hi. Lai Siangtho in, “Ama geelnate a tawntungin kip hi; ama ngimnate kip paisuak hi”2 ci hi.
Na nuntakna a manawhna lam hong theihsak hi. Na ngimnate laidal tungah gelhkhiatna in na nuntakna na lampi a tuam vilvelin hong ngaihsunsak ding hi. Lai Siangtho in, “Koilam manawh cih kithei in. Tua hileh leitang taksa tungah na omsuak ding hi”3 ci hi. Nuntak ngimna thu pulakna in na hun, na sum, na nuntakna, cihte bangci zat ding cih hong genkhia bek hilo-in na seploh dingte zong hong theisak hi. Paunak laibu sungah, “Mi lungpil in pilvang gamtat ding ngim a, mi lungmawl in mun tampi manawhin kipan hi”4 ci-in kigelh hi.
Nang aading “lawhcinna” a cih a khiatna hong gualhsak hi. Tua in, leitung mite’ thupitsakdan hilo-in nangmahmah in thupi ci-a na up thu, hong gen hi. Na thupitsak thute hong kitelsak hi. Paul in, “A kul taktak thute mah na theihtel ding uh ka deih hi”5 ci hi.
Nang’ mapanna mun hong kitelsak hi. Khan khat sung dinmun (stages) tuamtuam ah mapanna mun (roles) tuamtuam nanei ding a, ahi zongin na ngimnate ahihleh kikhel ngeilo ding hi. Tuate pen na mapanna mun tuamtuamte sangin thupizaw hi.
Na melpuakzia hong lakkhia hi. Tua in, Pasian’ na a seem dingin Pasian mahmah in nang a tuam vilvelin hong bawlzia thute kilangsak hi. Na nuntak ngimna thu pulakna gelhkhiat nadingin hun a tuamin la in. Khatvei tut tawh zawhsawm pah kei inla khatvei gelhkhiatna tawh a cingtaak pah dingin lam-en kei in; na ngaihsutkhak masaksak gelhkhia pahpah in. Ngaihsutna a thak khat phuat (create) ding sangin a omsa khat puahphat (edit) pen baihzaw den hi. Na thu pulakna gelhkhiat ding na kithawina ah na ngaihsutkak ding thudotna nam nga om hi:
NUNTAKNA SUNGA THUDOTNA LIANPEN NGATE
Ka nuntakna ah a phungpi ding bang ahi hiam? Hih pen biakpiakna (worship) vai thudotna hi. Kua aadingin nungta ding na hi hiam? Na nuntakna sungah bang teng na lamto ding hiam? Na nuntak zonna nasep, na innkuan, kimawlna khat ahihkeileh uukna, sum, gualnopna, ahihkeileh vai dang tuamtuam tampi, cihte phungpi-in nakoih thei ding hi. Hihte pen a vekpi-in a hoih mah hi a, ahi zongin na nuntakna a phungpi ding hilo uhhi. Lungsim kitapzanna a pian ciangin hihte lakah hong dingtangsak zo taktak ding khat zong omlo hi. A kip a kho phungpi khat naneih ding kisam hi.
Asa Kumpipa in Judah mite kiangah “a nuntakna uh ah Pasian a phungpi-in a koih nadingun”6 gen hi. Taktakin na nuntakna ah a phungpi-a nakoih peuhpeuh pen na pasian ahihi. Khrih kiangah na nuntakna na kipiak ciangin amah a phungpi hong hi ding a, ahi zongin biakpiakna tawh amah na letkipsuak ding kisam hi. Paul in, “Na lungsim uh ah Khrih hong teektang seemseem nadingin thu ka ngen hi”7 ci hi.
Na nuntakna ah Pasian a phungpi ahih le hihloh bangci theih ding na hi hiam? Pasian a phungpi hong hih ciangin amah na bia hi. Ahihloh ciangin na lungkham hi. Lungkhamna cih pen Pasian kinawlkhiin khinta ahihlam phawnna meitang (warning light) hi. Pasian a phungpi ah mun napiak lian ciangin lungnopna na ngahkik pah ding hi. Lai Siangtho in, “Pasian’ kicinna tawh kidimna lungsim...hong tung ding a, no hong lungnuamsak ding hi. Na nuntakna a phungpi ah Khrih in lungkhamna a hepkhiat ciangin tua-a thupiang pen lamdangin nuam mahmah hi”8
Ka nuntakna ah ka gamtatzia ding bang ahi hiam? Hih pen thuzui hihna (discipleship) vai thudotna hi. Bangci nam mi na hi ding hiam? Na sepna sangin na hihna Pasian lunglutzaw tham hi. Tawntung mun sungah na kensuak ding pen na nuntak zonna nasep hilo a, na gamtatzia ahihlam ciamteh in. Na nuntakna sunga naneih ding leh nazat dinga nadeih gamtatzia ci-hoihte gualsuk in. Tua aadingin Kha Siangtho gah9 tawh ahi-a Mualtung Thuhilhna sunga Thupha Ngah Mi10 tawh ahi zongin na kipan thei hi.
Peter in, “Na upna masa uh tungah gamtatzia hoih, kha tawh kidim thu theihna, kisekna citak, lungduaina gina, lipkhap takin zahtakna, maingaphuai dingin thunopna leh itsik lo-a itna, cihte behlapna tawh note hong kipiasa thu lamtohna ah minit khat zong mawkbeisak kei un”11 ci hi. Na tuk ciangin lungkia kei inla tawpsan kei in. Khrih tawh kisun gamtatzia lamtohna pen khantawn sep ding nasep hi. Paul in Timoti kiangah, “Na gamtatzia leh na thuhilhna thu, a nihin kiptak lencip in. Kiheikhia kei in. Tua mun ah omkip in”12 ci hi.
Ka nuntakna ah ka piakkhiat ding bang ahi hiam? Hih pen sepkhiatna (service) vai thudotna hi. Khrih’ Pumpi sungah nang’ sepkhiatna bang ahi ding hiam? Na kha khuttawite, na lungsim, na hihtheihnate, na sungpua melpuakzia, leh na sinkhak thute, tu-a teng kigawmkhopna (Melpuakzia -- SHAPE) na hihlam natheih leh Pasian’ innkuan sungah nang’ mapanna mun a hoihpen bang ahi ding hiam? Na-a kimang ding thu bangci septheih ding nahi hiam? Pumpi sungah na ka sepsak dinga hong kiseh beelpawl tuam khat a om hiam? Na nasepna (ministry) na cinsakna pana hong piang ding hamphatna hoih mahmah nih, Paul in hih bangin hong gen hi: “Tu-a na sepkhiat uh nasepna in Pasian’ mite’ kitangsapna a cingsak bek hilo-in Pasian tungah nakpi-in lungdamkohna zong piangsak hi.”13
Midangte’ na a sepsak dingin hong kisui himah taleh Jesuh nangawn in leitung ah a omlai-in mi khempeuh’ kitangsapnate a dipsakzo hi tuan saamlo hi. Na melpuakzia leh hong kisuihzia dungzui-in kua huh theipen ding cih na teelkhiat ding kisam hi. “Kua huh nuampen ka hi hiam?” ci-in kidong in. Jesuh in, “Note a vapai dingin leh a kip paisuak ding gahte nagah nadingun kong sawlkhia hi”14 ci hi. Eite khatciat in gah a tuamtek i gah hi.
Ka nuntakna ah ka genkhiat genkhiat ding bang ahi hiam? Hih pen thu-umlo mite tungah na thupuak nasepna (mission) vai thudotna hi. Na thupuak nasep thu pulakna (mission statement) pen na nuntak ngimna thu pulakna (life’s purpose statement) ii khen khat hipah hi. Tua sungah na teci panna leh Lungdamna Thu mite tungah genkhia ding ci-a na ki-apna zong nahel ding kisam hi. Nuntakna sunga na theihkhiat thute, leh leitung mite kianga genkhiat nopna lungsim ahi Pasian’ hong piak Pasian’ zia tawh kituak na lainatnate, cihte zong gualhsuk-huai hi. Khrih sungah khanglian seemseem lecin Pasian in paikhia-a na kuanna ah na mitsuan deuh ding mipawlte hong theisak theikha ding hi.
Nang pen nu (tunnu) ahihkeileh pa (zuapa) khat na hihleh nasep ding thupuak nasepna lakah na tate Khrih a theih nadingun khansuah ding, amaute’ nuntakna aading Pasian’ geelsak ama ngimnate a theihtel nadingun lamlak ding, leh leitung ah amau sep ding thupuak nasep a seem dingin sawlkhia ding, cihte kihel ding hi. Na thu pulakna sungah Joshua’ thu pulakna zong na hel thei hi: “Kei le ka innkuanpihte in ahihleh TOPA’ na ka seem ding uhhi.”15
Maan hi. I genkhiat thu pen i nuntakna tawh i lahkhiat ding leh i taksuaksak ding kisam hi. Thu-umlo mi a tamzawte in Lai Siangtho muantaak hi ci-in a saan ma-un ei, muantaak maw muantaaklo cih hong thei masa nuamzaw uhhi. Tua hangin zong Lai Siangtho in, “Khrih’ Lungdamna Thu a kizahtak theih nading namin nungta hamtang un”16 hong ci hi.
Ka nuntakna ah ka khua le tual ding bang ahi hiam? Hih pen kilawmtatna (fellowship) vai thudotna hi. Thu-um midangte tungah na kipumpiakna leh Psian’ innkuan tawh na kizopna thu, bangci bangin na lakkhia ding hiam? Koi mun ah “khat le khat” cih thupiakna Khristian dangte tawh zat-kisin ding na hi hiam? Koi pawlpi innkuan ah na-a kimang sungmi khatin kihel ding na hi hiam? Na picin seemseem ciangin Khrih’ Pumpi na it seemseem ding a, tua aadingin na kipiakhia nuam seemseem ding hi. Lai Siangtho in, “Khrih in pawlpi itin pawlpi aadingin a nuntakna pia hi”17 ci hi. Na thu pulakna sungah Pasian’ pawlpi na itna thu lahkhiatna khat nahel ding zong kisam hi.
Hih thudotnate dawnkikzia ding nangaihsut kawmin ngimna khatta tawh kisai Lai Siangtho kammal hong thaksuakte zong gualsuk pahpah in. Hih laibu sungah Lai Siangtho kammal tampi kihel hi. Na nuntak ngimna thu pulakna, nang’ deihdan nam nangah dong na gelhkhiatna, ah nipi kal tampi ahihkeileh kha tampi zong bei theikha ding hi. Thungen in; ngaihsun in; lawm-itpente tawh kikum in; Lai Siangtho kammal lungngai in. Na lungkim tawp, a nunungpen khat, na ngah ma-in zong at zeel, puah zeel, phiat zeel, atkik zeel, cihdan tamveipi na tuakkha thei ding hi. Tua kawmin Pasian’ lamlahna dungzui-in Pasian’ hong suihzia, nang’ melpuakzia tawh kituakpen khat na ngahkhia ding hi. Midangte’ sepzia ettteh theih ding nadeih leh zong nong email thei hi.
Nuntak ngimna thu pulakna a kicingin gelhkhiatna banah tua ngimna ngate tomlakin kamngah theih leh lungsima teeng thei nam dingin thuciin tomnonote suah lecin tua zong noptuam mahmah ding hi. Tuate tawh nisimin nang le nang na kiphawksak thei hi. Solomon in ngaihsut a piakna ah, “Hih thute na cihkik theih pahpah nadingin na lungsim sungah ciamteh lecin hoih ding hi”18 ci hi. Etsakna tawmkhat en lehang:
“Ka nuntak ngimna pen: lungsim takpi tawh Khrih bia ding, ka melpuakzia dungzui-in ama na seem ding, ama innkuan tawh kilawmta ding, gamtatzia ah amah tawh kisun ding, ama minthan nadingin leitung ah ama thupuak nasepna cingsak ding, cih teng hi”
“Ka nuntak ngimna pen: Khrih’ innkuan sungmi khat hi ding, ama gamtatzia etsakna lim khat hi ding, ama hehpihna thu a seemkhia mi khat hi ding, ama kamtai palai khat hi ding, ama minthanna a kilangsak khat hi ding, cih teng hi”
“Ka nuntak ngimna pen: Khrih it ding, Khrih sungah khanglian ding, Khrih’ thu genkhia ding, Khrih’ pawlpi tungtawnin ama na seem ding, ka innkuan leh midangte zong tua bang ahihtheih nadingun makaih ding, cih teng hi”
“Ka nuntak ngimna pen: Thukham Lianpen leh Sawlpina a zui a mang dingin Ki-apna Lianpi khat nei ding, cih hi”
“Khrih tawh kisutna pen ka lungtup; pawlpi pen ka innkuan; __________ pen ka sepkhiatna; __________ pen ka thupuak nasepna; Pasian’ minthanna pen ka lungdeih”
Na lungsim sungah “Ka nuntak zonna nasep, ka innkuanpih, ka teen nading mun, ka sangkah nading mun, cihte tawh kisai Pasian’ deihna bang ahi tam?” ci-in zong na lunghimawh kha ding hi. Sianggen lehang, hihte pen na nuntakna sungah a dawl nihna thute hi pan a, a vekin Pasian’ deihna tawh a kituak zong ahihtheih nading thu tampi om lel hi. A thupipen ah bangbang na seem zongin, koikoi ah na teeng zongin, kuakua tawh na ki-innkuan zongin, a tawntunga kip Pasian’ ngimnate a cingsak na hih ding ahihi. Tua na thu khensatte pen na ngimnate a cingsaktuam ahih ding kisam hi. Lai Siangtho in, “Mihing’ lungsim sungah geelna tampi om a, ahi zongin a tangtung pen TOPA’ ngimna hi”19 ci hi. Na nuntakna aading Pasian’ hong geelsak ama ngimnate kip paisuak ding ahihman in tuate mah mitsuan inla nang’ geelnate mitsuan kei in.
Nuntak ngimna thu pulakna ah, na sih ciangin nang’ thu le la tawh kisai midangte in hong tuaci genle-uh ci-a na utna teng bulphuh in, cih ngaihsut piakna khat kazangei hi. Nang hong kipahtawina kammal a hoihpen ding teng ngaihsun inla tua ciangin na thu pulakna gelhkhia in, cih hi. Tua pen, sianggen lehang, geelna hoihlo khat hi. Na nuntakna a beikhit cianga nang’ thu le la midangte’ honggen teng pen thupi masalo hi. A thupi, a phamawh thu, khat bek om a, tua pen nang tawh kisai-in Pasian in bang gen cih thu hi. Lai Siangtho sungah, “Kote’ ngimna pen mite’ lungkim nading hilo-in Pasian’ lungkim nading hizaw hi”20 ci-in kigelh hi.
Hih nuntakna thudotpite na dawnzia teng Pasian in ni khatni ciangin enpha kik ding hi. Na nuntakna ah Jesuh a phungpi-in na koih hiam? Ama gamtatzia na neito hiam? Mi’ na a sepsak dingin na nuntakna na ki-ap hiam? Ama thu genkhia-in ama thupuak nasep na cingsak hiam? Ama innkuan itin tua sungah na kihel hiam? Thu-a kisim ding pen tu-a thute bek mah hi. Paul in, “Kote’ lungtup pen kote aadinga Pasian’ hong geelsakna ciang cinto ding cih ahihi”21 ci hi.
PASIAN IN NANG HONG ZANG NUAM HI
Tu ma kum sawmthum lai-in Sawltak 13:36 sunga laigual tumtawng khat in ka lungsim hong la a, tua in nuntakna-a ka manawhna mun hong kikhelsak hi. Tua laigual tomno sungah kammal sawm bekbek om a, ahi zongin ka lungsim sungah siktulsa tawh vuhvang bangin tua kammalte kipden hi: “David in ama khanghun sungin Pasian’ ngimna bangin naseem hi.”22 Tu-in Pasian in David “ka lungsim hong tuakpa”23 a cihna hang zong ka theitel ta hi. David in leitunga Pasian’ ngimnate a cingsak dingin a nuntakna na kibup-ap hi.
Hih thu pulakna sanga a thupizaw mualsuang omnawnlo hi. Na hankhuk suangpek tungah tua bangin a kiciamteh danin kingaihsun dih in. Nangma khanghun sungin Pasian’ ngimna bangin na seem takpi hiam? Ka sih ciangin mite in kei’ thu le la tu-a bangin a gen ding uh, cihpen ka thungetna hi. Nang’ thu le la zong tua bangin mite in a gen nadingun thu kangen hi. Hih laibu, nang aadinga ka gelhna zong tua hang mah hi. Hih kammal tumtawngno in nuntakzia a hoihpen i cih bang, cih hong lakkhia hi. Hun ciangtan omlo tawntung mun tawh kisai thu (Pasian’ ngimna) pen hun kiciangtan, tomno kal (nangma khanghun) sungah a seem na hihi. Tu-a teng khempeuh pen ngimna’ tawsawn nuntakna i cih pen hi. A beisa khangmite ahi-a mai-a khangmite ahi zongin amaute in tu khanghun sungin Pasian’ ngimna bangin naseem theilo uhhi. Ei bek in i seem thei hi. Esther mah bangin nang zong Pasian in “tu-a bang dan hun aading mahin”24 hong piansak ahihi.
Pasian in tu dongin a zat ding mite zongzong lai hi. Lai Siangtho in, “Topa in ama kiangah lungsim khempeuh tawh a kibup-ap mite a thakhauhsak nadingin leitung bup tengah zong kawikawi hi”25 ci hi. Nang, Pasian’ ngimnate aadinga ama zattheih mi khat na hi ding hiam? Nang’ khanghun sungin Pasian’ngimna bangin na seem ding hiam?
Paul pen ngimna’ tawsawn nuntakna tawh kalsuan hi. Amah’n, “Kalsuan simin ngimna tawh kung lamah tang takin ka tai hi”16 ci hi. Ama nuntakna a hang bulpi pen ama aadinga Pasian’ geelsak ngimnate cingsakding cih hibek hi. Amah’n, “Banghanghiam cihleh ka nuntak leh Khrih aading hi a, ka sih leh a hampha ka hihi”27 ci hi. Nuntak ding leh sih ding vai Paul in kihta lo hi. A hing-a a si zongin Pasian’ ngimnate a cingsak ding hi lel hi. Amah’n silel lo hi.
Ni khatni ciangin thupiang tangthu a beihun tung ding a, ahi zongin tawntung hun ahihleh om paisuak ding hi. William Cary in, “Mailam hun pen Pasian’ kamciamte zah mahin lam-et om hi.” Na ngimnate cinsakna ah a haksat hun a om ciangin lungkiatna-in neikei in. A tawntunga kimang ding nathaman phawk in. Lai Siangtho in, “Banghanghiam cihleh a thuneu, a sauveilo i gimnate in tuate khempeuh sangin a thupizaw pek tham, tawntung minthanna khat eite aadingin hong ngahsak hi”28 ci hi.
Eite ni khatni ciangin i vekpi-in Pasian’ kumpi tokhom mai-ah ding in, i nuntaknate Khrih tungah nakpi lungdamna leh phatna tawh i ap ciangin bangzahin nuam ding cih ngaihsun dih in. Tua hun ciangin i vekpi-in, “Nang na kilawm hi, Topa! Aw, kote’ Pasian! Minthanna, pahtawina, vanglianna ngah ta in! Na khempeuh nangma piansak hi; Kisam na sak manin kipiangsak hi!”29 i ci khawm ding hi. Ama geelna hangin amah i phat ding a, ama ngimnate aadingin i nungta tawntung ding hi.
SAWMLINI
KA NGIMNA TAWH KIPAWL LUNGNGAIHNA
Lungngaih Ding Thu: Ngimna nei-a nuntak bek mah nuntak tattak theih nading lampi hi.
Phawk Ding Khawkneu: “Banghanghiam cihleh...David in ama khanghun sungin Pasian’ ngimna bangin naseem hi” Sawltak 13:36 (NASB)
Ngaihsut Ding Thudotna: Nuntakna sunga thudotna lianpi ngate ka dawnkikna bang hun ciangin gelhkhia ding ka hi hiam? Cik ciangin ka ngimna laidal tungah gualsuk ding ka hi hiam?
Source:
Laibu Min : Ngimna' Tawsawn Nuntakna (The Purpose-Driven Life)
Laigelh : Rick Warren
Lailet : PLMangno (Power Translation Service) raymang@gmail.com
Laibu bawl kum : 2006
Laisim Mimalkim tungah Zotna :
Hih laibu pen ni 40 sung sim ding ahih manin nikhat in khatta(nikhat aita) Laibu Saal website (www.zomielibrary.com) pan hong suah toto ding hi ung…
Hih laibu, abu ngiatin a deihte’n Lailet, laibu bawl Sia PLMangno' email : raymang@gmail.com ah kidawp thei hi.
