NGIMNA # 4
PASIAN’ NA A SEEM DINGIN
NANG HONG KISUI
Kote pen Pasian’ silate ka hilel uh a,...Kote khatciat in
sep dinga Topa’ hong piak nasep a seem ka hi uhhi:
Ke’n khaici vawhin Apollos in tuibuak a,
ahi zongin a khangliansak pen Pasian hi.
1 Korin 3:5-6 (TEV)
NI SAWMNIH-LE-KUA NI
HONG KIPIA NASEP SAANNA
Eite i hihna bang hong hisak,
Khrih Jesuh kiangpana nuntakna thak hongpia pen
Pasian mahmah hi: tu-a i nuntaknate
midangte huhna-in i zat dingin amah in
a beisa khanghun tampi lai-in geelna na neikhin hi.
Efesa 2:10 (LB)
Ka sep dinga nong piak nasep a tawpna dongin
zawhsiangna tawh
leitung ah na min ka thangsak khin hi.
Johan 17:4 (Msg)
Sepkhiatna khat anei dingin leitung ah nang hong kikoih hi.
A omsate a zangding -- an a ne ding, huih a diik ding, mun a la ding -- bekin nang hong kipiangsak hilo hi. Na nuntakna ah vai lianpi a seem dingin Pasian in hong seek hi. Laibu kitamkhot pente sungah nuntakna sungpan a hoihpenpen “ngah” nading ngaihsut piakna cihte a om hangin tuapen nang aadinga Pasian’ deihna hi masa lo hi. Leitung ah nang hong kipiansakna pen nuntakna sungpan a la ding bek hilo-in nuntakna a behlap ding cih ngimna tawh hi. Piakkik na neih ding Pasian in hong deih hi. Hih pen na nuntakna aadinga Pasian’ hong geelsak ama ngimna lina hi a, tua pen “Pasian’ na sepkhiatna” (ministry), ahihkeileh mi’ na sepsakna (service) kici hi. Hih thu, Lai Siangtho in a kicingin hong gen hi.
Pasian’ na a seem dingin nang hong kipiangsak hi. Lai Siangtho in, “(Pasian in) eite’ hih dinga a na bawlkholhsa, gamtat hoihte tawh nuntakna aadingin eite hong piangsak hi”1 ci hi. Tua nasep hoihte cihpen na hihding sepkhiatna hi. Mite aading na khatpeuh na sepsak ciangin Pasian’ na a seem na hi a,2 nang aadinga Pasian’ hong geelsak a ngimnate lakah khat a cingsak na hihi. Tua ngimna tawh Pasian in nang, limtakin hongsuih ahihlam mai-a khenpi nihte ah i kikumto ding hi. Jeremiah kianga Pasian’ gen thu pen nang aading zong hi pah hi: “Na nu’ naubu sungah nang kongbawl ma-in kong teel khin hi. Nang na suahma-in nasep a tuam vilvel khat aadingin kong tuamkoih hi.”3 Nasep a tuam vilvel khat a seem dingin hih leitung ah hong kikoih ahihi.
Pasian’ na a seem dingin nang hong kihonkhia hi. Lai Siangtho in, “Eite hong honkhia-in ama nasep siangtho a seem dingin hong teel pen amah ahihi. Tua pen eite’ kilawm kituakna hang hilo-in ama geelnasa ahihna hang hi”4 ci hi. Ama “nasep siangtho” na sep theih nadingin Pasian in nang hong tankhia hi. Sepkhiatna hangin hong kihonkhia hilo a, sepkhiatna aadingin hong kitankhia hizaw hi. Pasian’ Kumpigam sungah na dip dingin mun khat, ngimna khat, panmun khat, leh kimanna khat na nei hi. Tua thu in na nuntakna nakpi-in thupisak a, nakpi-in manneisak hi.
Hotkhiatna na ngah theih nadingin Jesuh in a nuntakna tawh khek hi. Lai Siangtho in, “Nang aading Pasian in manh tampi na pia hi. Tua hi a, na pumpi Pasian pahtawina-in zang in”5 ci-in phawksakna hongpia hi. Kisuanna lungsim ahihkeileh launa lungsim ahihkeileh mawhpuakna lungsim, cihte tawh hilo-in lungdamna, eite aadinga hong sepsaksa thute hanga nakpi lungdamna tawh Pasian’ na a seem i hihi. Ama tungah i nuntakna bup zah leiba i nei hi. Hotkhiatna thupha tungtawnin a beisa hunte hong kimaisak, tu laitak hunin khiatna tawh hong kidimsak, mailam hun aading lungmuanna hong kibawlsak, khinzo hi. Hih zah-a lian hamphatnate lungngai kawmin Paul in, “Pasian’ hehpihna lianpi hangin...Pasian’ nasepna ah ki-apin ama mai-ah a hingtang biakpiak van bangin no le no kilui un”6 hong ci hi.
Sawltak Johan in itna tawh midangte aading na i sepsak ciangin tua in hotkhiat taktakte i hihna lakkhia ahihlam honghilh hi. Amah’n, “Khat le khat i ki-itna in eite sihna pan nuntakna ah tung khin i hihna kipsak hi”7 ci hi. Midangte tungah itna nei lo-in amau aading ka sepsaknop keileh kei kitangsapna teng bek akin ka hi a, ka nuntakna sungah Khrih om takpi maw, takpi lo, cih ka kidot ding kisam hi. Hotkhiat a ngah mi cih pen midangte’ na a sepsak nuam mi ahihi.
Pasian’ na sepna cih thu ah mi tampite’ telkhialh dang khat om a, tua pen Pasian’ na sepkhiatna (ministry) hi. Hih “Pasian’ na sepkhiatna” cih kammal a kizat ciangin mi tampite in pawlpi sya, siampi, leh hunbit biakna naseem, cihte bek a mitkha uh-ah mu uh a, ahi zongin Pasian in ama innkuan sungmi khempeuh naseem sya (minister) ahihlam hong gen hi. Lai Siangtho sungah mi’ na sepsakna (service) leh Pasian’ na sepkhiatna (ministry), hihte nih a kibang ahih mah bangin sila (servant) leh naseem sya (minister) cih kammalte zong a khiatna kibang hi. Khristian khat na hihleh naseem sya na hi a, na a seem, sya a seem, na hihi.
Peter’ sungnu in Jesuh’ damsakna a ngah ciangin tua a ngahthak cidamna zang pah a, thakhat thu-in “dingto-in Jesuh, lengla do hi.”8 I sep ding pen tu-a ahihi. Midangte a huh dingin eite hong kidamsak hi. Thupha a hi dingin eite thupha hong kipia hi. Tu hiithiatin vantung bek a ngak ding hilo-in midangte’ na a sepsak dingin hong kihonkhia ahihi.
Pasian in ama hehpihna i saan phetin bang hangin vantung gam ah hong lato pahlo ahi tam, ci-in na ngaihsun ngei hiam? Bang hangin a cingtaaklo leitung ah hong omsak lai ahi hiam? Ama ngimnate a cingsak dingin eite hong omsak lai ahihi. Hotkhiat na ngah ciangin Pasian in ama lungtupte aadingin nang hong zatsawm hi. Pasian in a pawlpi sungah nang aading nasepna (ministry) khat leh leitung ah nang aading thupuak nasep (mission) khat nei hi.
Pasian’ na a seem dingin nang hong kisam hi. Na khangliatto kawmin na lungsim sungah, Pasian’ “sapna ngah” cih thu pen thupuak naseemte, pawlpi syate, RC nungak siangthote, leh hunbit pawlpi naseemte bek’ sinkhak thu hi dingin na ngaihsunkha thei ding hi. Ahi zongin Lai Siangtho in Khristian khempeuh a seemkhia dingin hong kisam, ci hi.9 Hotkhiat ngah dinga hong kisapna sungah a seemkhia dinga hong kisapna zong kihel hi. Tuate nih a kibang hi. Bang nasep, bang maban na nei zongin nang pen hunbit Khirstian sepkhiatna phual ah hong kisam hi. Tua tawh a kilehbulh kammal pen “sepkhiat a neilo Khristian” hi.
Lai Siangtho in, “Ama mite ahi dingin amah in eite hong honkhia-in hong sam a, tua pen i sepsa thute hang hilo-in ama ngimnate hang ahihi”10 ci hi. Peter in zong, “Nang hong sampa Pasian a hoih mahmahna thute a genkhia dingin note hong kiteel hi”11 ci-in hong genbeh hi. Pasian’ hong piak na siamnate na zatkhiat simsimin nang hong kisapna thu a cingsaksak na hihi.
Lai Siangtho in, “Tu-in ama aa na hi uh a,...tua pen Pasian’ nasepna sungah eite na-a kimangthei i hih nading hi”12 ci hi. Pasian’ nasepna sungah bangzahvei na-in na kimang hiam? Sen gama pawlpi pawlkhatte ah thu-um thakte muakna a neih uh ciangin, “Tu-in Jesuh in a et nading mittang a thak kop khat, a zak nading bil a thak kop khat, a huh nading khut a thak kop khat, midangte a it nading lungtang a thak khat, a nei hita hi” cih tawh hopih uhhi.
Pawlpi innkuan khat tawh na kizop ding a kulna a hang khatpen thu-um midangte’ na a sepsak dinga hong kisapna thu, muibun takin na cinsak theih nading hi. Lai Siangtho in, “Note khempeuh na vekpi-un Khrih’ pumpi na hi uh a, note khatciat pen a omloh a phamawh, pumtung na a tuamtek na hi uhhi”13 ci hi. Nang’ sepkhiatna pen Khrih’ Pumpi sungah kinak sap mahmah a, tua pen tualsung khua pawlpi khat va dong lecin nathei ding hi. Eite khatciat in i pan nading panmun khat tek i nei a, panmun khatciat zong thupi thei mahmah hi. Pasian’ na sepna ah a thuneu cih bang omlo a, a vekpi-in kisam tek hi.
Tua mah bangin pawlpi sungah thupitna neilo nasepna cih bang omlo hi. Nasep pawlkhat muhtheih pah dingin kilang a, pawlkhat kilang lo ahih hangin a vekpi-in manpha hi. A taktakin a neusuah, a kilanglo nasepnate in khantohna lianpipi piangsak theizaw lai hi. Ka inn uh-ah lengla khan-a kithuah meivak bawkpi sangin zan kathawh cianga bangmah ka palkhakloh nadingin meitaang kiukiau-a, khua hong musak meivakno pen meivak thupipen ahihi. A golna zah (size) leh a muibutna zah (significance) cih thunih pen a tuamtuak mah ahihi. Na-a i kiman theih nadingin eite khat le khat tungah i kingap ding kisam ahih manin nasepna khempeuh a vekin thupi hi.
Na pumpi tunga pumtung na khat, ahihkeileh na pumpi sunga om na sungkuate khat, na-in hong kimang keileh na bangci ding hiam? A cina na hi a, na pumpi bupin natna na thuak hi. Pumpi sunga sin (liver) in a dangte kiangah, “Kei, gim peuhmah phot ing ei. Pumpi aading naseem nuam nawn ke’ng. Kum khat khawng tawlnga nuam ing. Kei le kei ka kivakthau phot keileh hoih kei inteh” a ci ding danin ngaihsun lecin bangteng hong piangding hiam? Pumpi si ding hi. Tuni-in naseem nuamlo Khristiante huhau-in tualsung pawlpi tampitak si kuanin om uhhi. Pumpi in natna satna thuakin a om laitak tua mite a gei lamah tu hiithiatin pawi etin en lel uhhi.
Pasian’ na a seem dingin nang, thu hong kipia hi. Jesuh in, “Na lungsim puakziate uh kei’ aa tawh a kibat ding kisam hi. Banghanghiam cihleh Kei, Messiah, pen kei’ na hong kisepsak ding hilo-in mi’ na a sepsak dingin leh ka nuntakna a pia dingin kong pai hi”14 ci sinsen hi. Khristiante aadingin ci lehang mi’ na sepsakna cih pen deihteeltheih thu, hun i piak zawhleh i hun geelna sungah behlap ding thu, hilo hi. Hih pen mah Khristian nuntakna thu laigil hi pah hi. Jesuh pen “mi’ na a seem dingin” leh “a pia dingin” hong pai hi a, hih tatna kammal (verb) mal nihte leitunga na nuntakna ah zong a dawkkhiat ding kisam hi. Mi’ na sepsakna leh piakna cih pen na nuntakna aadinga Pasian’ hong geelsak a ngimna lina tomlakna hi. Mother Teresa in, “Nuntak siangtho cihna sungah Pasian’ na maitaii takin sepna zong kihel hi” ci ngei hi.
Kha picinna cihna ah tua ciang dingbek hi ngeilo ahihlam Jesuh in honghilh hi. Picinna cih ciangin Pasian’ na sepna aading hi. A piakhia dinga a khanglian i hihi. Theihna kibehlap toto cih bek kicing nailo hi. Theih bangin i gamtat ding leh i up bangin zat-kisin ding kisam lai hi. Lahkhiatna (expression) omlo lunglutna (impression) in lungkiatna (depression) piangsak hi. Mi’ na sepsakna kihello thusinna in kha awkcipna hong tun hi. Galilee Tuipi leh Si Tuipi thugentehna pen tu dong mahin maan lai hi. Galilee Tuipi cih pen a sunglam ah tui a lut bek hilo-in a pualam ah zong luangkhia kik ahih manin tuisung ganhingte tawh a kidim bualpi suak hi. Si Tuipi ahihleh a sunglam ah tui a lut bek omin a pualam ah a luangkhia om lo ahih manin bualpi khawlcip khat suak a, tuisung ganhingte nungta theilo hi.
Tuni-a thu-um mi tampite’ kitangsap masak thute lakah Lai Siangtho thusinna dang khat neihding pen a nunungpen hi ding hi. Tu-a a zatzah uh sangin a tamzaw tham theikhin lel uhhi. Amau kitangsap pen mi’ na sepsak ding nam hizaw a, tua hileh a kha sagolhte uh kisaalin thahat ding uhhi.
Mi’ na sepsak cih pen i pianpih utna lungsim tawh kikeelki liinlian hi. A tamzaw ah eite pen mi’ na sepsak ding sangin ei’ na hong kisepsak ding ki-utzaw hi. “Lungsim khualumna ong pia thei ding, thupha ong tun thei ding pawlpi khat a zongzong hi veng aw” a ci kitam a, “Mi’ na ka sepsak theih nading mun leh thupha ka hihtheih nading mun a zongzong hi’ng” a ci kitawm hi. Ei aading mi’ hong sepsak ding i lam-en a, mi aading i sepsaksawm kei hi. Ahi zongin Khrih sungah i picin ciangin i nuntakna zong mi’ na a sepsak nam ah hong kilaihtoh ding kisam hi. Khrih’ nungzui a picingte in, “Kei’ kitangsapna teng kua’n hong dipsak thei ding hiam?” ci nawnlo uh a, “Kua’ kitangsapna dipsak thei ding ka hiam?” cizaw uhhi. Tua bagnin na kidong ngei hiam?
TAWNTUNGHUN AADING KIGINKHOLHNA
Leitung na nuntakna a bei ciangin Pasian mai-ah nading ding a, tua ciangin Pasian in mi aadingin na nuntakna na zatzah leh na zatzia hongsit ding hi. Lai Siangtho in, “Pasian kiangah eimau gamtatna thu i genciat ding hi”15 ci hi. A cihnopna ngaihsun in. Eimahmah aadinga hun leh tha i zatzah leh midangte’ na sepsak nadinga i piakkhiatzah, hihte nih ni khatni ciangin Pasian in tawikhai ding hi.
Tua hun ciangin angsung bulphuh lungsim tawh, “Manlah lua kaih cianga” ahihkeileh “Ke’n zong kei’ aituam lungtup pawlkhat nei hi’ng” ahihkeileh “Nasep vai, gualnop ding vai, pensen (pension) lak ding vai, cih teng tawh buaikhop ing” ci-in paulap i zon hangin hawmsuak lel ding hi. Tuate khempeuh Pasian in, “Nong dawnzia khial mawk ciei. Mi’ na a sepsak dinga kong piansak, kong hotkhiat, kong sap, thu kong piak, himah hi vecin” ci-in hong dawngkik ding hi. A koi munteng tello na hi hiam? Lai Siangtho in thu-umlo mite kiangah, “Amau aading bekin a nungta mite tungah amah in a hehna leh a lungsona buaksuk ding hi”16 ci-in galphawnna pia a, ahi zongin tua pen Khristiante aadingin ahihleh tawntung thaman suplawhna cih khiatna nei ding hi.
Midangte i huh ciang bekin a dim takin a nungta i hihi. Jesuh in, “Na nuntakna kihotkhiat ding bek na masak leh na suplawh ding hi. Keima aading leh Lungdamna Thu aadingin a nuntakna a paaikhia mite bek in nungta cih a khiatna taktak thei ding uhhi”17 ci hi. Hih thupen thupilua ahihman in Lungdamna Thubute sungah ngavei vilvel kigen phapha hi. Nuntakna cih pen Pasian’ na sepkhiatna aading kibawl ahihman in mi’ na na sepsak keileh a om-a, om pong (just existing) na hiding hi. Pasian in angsung bulphuh lo-in midangte na it theih ding, leh mi’ na na sepsak theihding, hong deih hi.
MI’ NA SEPSAKNA LEH A THUPITNA
Bang hiamkhat teeiteei aadingin na nuntakna napiak kul hi. Tua pen bang hiding hiam? Nasep maw, kimawlna maw, uukna khatpeuh maw, minthanna maw, hauhna maw? Tu-ate khat mahmah in zong tawntung thupitna neilo ding uhhi. Mi’ na sepsakna pen thupitna taktak tun theihna zawi hi. I nuntakna ii a khiatna i muhkhiatna mun pen Pasian’ na sepkhiatna ah hi. Lai Siangtho in, “Eite khatciat in ama pumtung na hihna ah i khiatna leh i kimanna i mukhia hi”18 ci hi. Pasian’ innkuan sungah na i kisepsak kawmin i nuntaknate in tawntung thupitna ngah hi. Paul in, “Note pumtung na na hihna mun uh hangin tua in note hong thuneusakzaw lo-in hong thupisakzaw ahihna thute na ngaihsut ding uh kadeih hi”19 ci hi.
Pasian in ama piansak leitung ah kikhelna a tunsak nadingin nang hongzang nuam a, nang tungtawnin naseem nuam hi. Na nuntakna sunga a thupipen a hun sauna tan (duration) hilo a, a piakkhiatzah (donation) hizaw hi. Bangtanvei nungta cih sangin bangci nuntak cih mah a thupipen ahihi.
Pasian’ na sepkhiatna ahihkeileh mi’ na sepsakna khat mahmah ah zong a kihel nailo na hihleh bang paulap teng zangzang na hi hiam? Abraham teeklua a, Jacob lungmuan neilo a, Leah ngaihbaanglo a, Josef mi kiangah kizuak a, Moses pau-awk a, Gideon mizawng hi a, Samson zi muangkhial hi a, Rahab numei kizuak hi a, David mi’ zi tawh mawhin innkuan buaina tampi tuak a, Elijah amah le amah kithahsawm a, Jeremiah lungkia a, Jonah tuantual a, Naomi meigong hi a, Tuiphumpa Johan amah le amah kineugen mi namtuampi hi a, Peter lungtomin pau vatvat thei a, Martha in lunghimawh hau a, Samaria numeinu in pasal tampi nei ngei a, Zakkhias mi’n pakta lo a, Thomas muanlahna tawh kidim a, Paul cidam lo a, Timoti kamtawm hi. Hih teng pen thaneemna namkim hi a, ahi zongin Pasian in ama nasepna sungah hih mite khatciat na zang hi. Nang zong, paulap zongzong nawn kei lecin Pasian in hong zang ding hi.
SAWMNIH-LE-KUANI
KA NGIMNA TAWH KIPAWL LUNGNGAIHNA
Lungngaih Ding Thu: Mi’ na sepsakna cih pen deih teeltheih thu hilo hi.
Phawk Ding Khawkneu: “Banghanghiam cihleh eite Pasian’ khutsiamna ma i hi a,
i sep dinga Pasian hong’ koihkholhsak ahi nahoihte a seem dinga Khrih Jesuh
sunga hong kipiangsak ahihi” Efesa 2:10 (NIV)
Ngaihsut Ding Thudotna: Ama na a seem dinga Pasian’ hong sapna ka saanloh nadingin hong lehkaihkaih pen bang ahi hiam?
Source:
Laibu Min : Ngimna' Tawsawn Nuntakna (The Purpose-Driven Life)
Laigelh : Rick Warren
Lailet : PLMangno (Power Translation Service) raymang@gmail.com
Laibu bawl kum : 2006
Laisim Mimalkim tungah Zotna :
Hih laibu pen ni 40 sung sim ding ahih manin nikhat in khatta(nikhat aita) Laibu Saal website (www.zomielibrary.com) pan hong suah toto ding hi ung…
Hih laibu, abu ngiatin a deihte’n Lailet, laibu bawl Sia PLMangno' email : raymang@gmail.com ah kidawp thei hi.
