NGIMNA # 2
PASIAN’ INNKUAN DINGIN
NANG HONG KIBAWL
Kei pen lenggah gui ka hi a,
note pen a hiangte na hi uhhi.
Johan 15:5 (CEV)
Khrih in eite pumpi khatin hong bawl a,...
khat le khat i kizom hi.
Rom 12:5 (GWT)
NI SAWM-LE-NGA NI
PASIAN’ INNKUAN AADINGIN HONG KIBAWL
Pasian pen na khempeuh a Bawlpa hi a,
na khempeuh pen ama minthanna aading hi.
Amah in ama minthanna, ta tampite ngahsak nuam hi.
Hebru 2:10a (NCV)
Vantunga i Pa in eite bangzahin hong it cih thei un.
Banghanghiam cihleh amah in ama tate a kici dingin eite hong phal a,
zong i hi takpi hi.
1 Johan 3:1 (NLT)
Nang pen Pasian’ innkuan aadingin hong kibawl hi.
Pasian in innkuan khat lam nuam a, tua takah a kihel dingin nang hong piangsak hi. Hih pen na suah ma-a a na geelsa, na nuntakna aadinga Pasian’ ngimna a nihna pen hi. Lai Siangtho bup pen Pasian’ nasepna tangthu -- amah a it ding, a zahtak ding, leh amah tawh a tawntunga a maangkhawm ding innkuan khat a lamna tangthu -- hi. Lai Siangtho in, “Eite Khrih tungtawnin ama kiangah hong la-in ama innkuan hong suaksak ding cih pen a kikhello ama geelna hi den hi”1 ci hi.
Pasian pen itna ahih manin kizopnate thupisak hi. Ama’ pianzia ngiat zong kizopna lamsang hi a, amah le amah innkuan sunga kisakna kammalte ahi Pa, Tapa, Kha Siangtho cihte tawh kipholak hi. Thumgawm Pasian cih pen Pasian amah le amah a kizopna hi. Tua pen a lekkim kizopna thu etsakna lim cingtaak hi a, a cihnopnate kikup-huai hi.
Itna tawh kiphut kizopna sungah Pasian amah le amah kizomin om den ahih manin amah lungleng ngeilo hi. Innkuan a kisap man hilo-in a deih man bekin eite hong piangsak dingin geelna khat nei a, a innkuan sungah hong tunin a neih teng khempeuh hong hawm hi. Tua teng a sep ciangin Pasian a lungkim hi. Lai Siangtho in, “Ama Kammal thumaan thutak tungtawnin eite tungah nuntakna thak hong piakni, leh ama innkuan thak sungah tanu tapa masate i va suahni pen ama aadingin lungdamna tawh kidim ni khat hi”2 ci hi.
Khrih i up ciangin Pasian i Pa hong suak a, eite ama tanu tapa, midangte i sanggamnu i sanggampa, pawlpi pen i kha innkuan, cih bangin hong suak hi. Pasian’ innkuan sungah a beisa hun, tu laitak hun, leh mailam hun, khang hun khempeuh-a om thu-um mi khempeuh kihel hi.
Mi khempeuh Pasian’ piansak hi a, ahi zongin mi khempeuh Pasian’ tanu/tapa hi kimlo hi. Pasian’ innkuan sungah luttheih nading lampi khat bek om a, tua innkuan sungah suahkikna cih lampi hi. Na suah khatveina tungtawnin na mihing innkuan sungah a kihel thei na hi a, ahi zongin na suah nihveina tungtawnin Pasian’ innkuan sungah a kihel thei ding na hihi. Pasian in “tu-in ama innkuan sungmite i hih nadingin suahkikna kici hamphatna eite tungah hong pia khinzo hi.”3
Pasian’ innkuan sunga kihel dingin kizotna kisapna pen mi khempeuh in ngah hi.4 Ahi zongin kalhna thu khat bel om a, tua pen Jesuh upna hi. Lai Siangtho in, “Note na vekpi-un Khrih Jesuh upna tungtawnin Pasian’ tanu tapa na hi uhhi”5 ci hi.
Na kha innkuan pen kip tawntung ding ahih manin na leitung ci le sa innkuan sangin thupizaw lai hi. Leitunga i innkuan ciat pen Pasian’ hong piak khuttawi (letsong) hoih mahmahte hi a, hi taleh tuate pen tomno kal sung bek kimangin kisia baih hi. Nupa kikhenna, omna kigamlatna, teekna, leh pelh theihloh sihna, cih thute hangin zong kikhenkham thei zeelzeel hi. A langkhat ah, i kha innkuan -- thu-um midangte tawh i kizopna -- ahihleh tawntung hun sung bup kizom paisuak ding hi. Tua pen sisan kizopna sangin a khauhzaw tham kipawlkhopna, a kipzaw tham kithukimna, khat hi. Paul in eite aadinga Pasian’ neih a geelna thu a ngaihsutkhak simsimin hih bangin phatna na nei den hi: “Ama pilna leh a geelna a zaizia ka ngaihsut ciangin khukdinsukin Pasian’ innkuan sungmi -- pawlkhat vantung ah om khinin pawlkhat hih leitung ah om lai -- khempeuhte’ Pa kiangah thu ka ngen hi.”6
PASIAN’ INNKUAN SUNGMI HIH A METNA
Pasian’ innkuan sungah kha thu tawh na suah hun lianin suahni khuttawi (birthday gifts) hoih mahmah pawlkhat na ngah pah hi. Tuate pen: innkuan min, innkuan tawh kisutna, innkuan hamphatna, innkuan kimaingapna, innkuan go le gamh, cihte hi.7 Lai Siangtho in, “Ama tanu tapa na hih manin ama neih khempeuh nang’ aa hi”8 ci hi.
Thuciam Thak in i luah ding “gamh” manpha thu hong limgen mahmah a, “Ka Pasian in na kitangsapna khempeuh uh Khrih Jesuh sunga a hauhna minthangte tawh kizui-in hong dip ding hi”9 ci hi. Pasian’ tanu tapa hihna tawh eite in innkuan’ neihsa lamsate i ngahkha hi. Hih leitung ah eite in “a hauhnate...a hehpihna...a migitna...a lungduaina..a minthanna...a pilna...athahatna...leh a thukhualna”10 cihte i ngah hi. Tawntung hun ciangin tua sangin a tamzaw i luah lai ding hi.
Paul in, “Ama mite tunga a piaksa gamh bangzahin lianin thupi cih na theihtel ding uh kong deih hi”11 ci hi. Tua gamh sungah bang teng teekteek kihel ahi hiam? Khatna ah, Pasian tawh a tawntungin i omkhawm ding hi.12 Nihna ah, eite a bupin kilaihin Khrih tawh i kisuun ding hi.13 Thumna ah, natna, sihna, gimthuakna cihte khempeuh tawh i kipelh ding hi.14 Lina ah, thaman hong kipia-in nasep vaipuak a thakte hong ki-ap ding hi.15 Ngana ah, Khrih’ minthanna i ngahkhawm ding hi.16 Hih zahin lianin thupi hi. Na telzawh zah sangin na hauzaw tham hi.
Lai Siangtho in, “Pasian in a tanu tapate aadingin manh kiseh theilo gamh khat hong siitsak hi. Tua pen kilaih kisia cih bang omlo, niin baangloin a siangtho-in vantung ah note aadingin kikoihcing hi”17 ci hi. Na ngah ding tawntung gamh pen manh sehtheihloh, a siangtho, a kip tawntung, a kikemcing khat hi, cihna hi. Kuamah in hong sutkhia theilo ding a, galte leh nuntak khuasakzia haksatna, ahihkeileh huihpi guahpi, cihte in susia zolo ding hi. Hih tawhtung gamh cih pen pensen (pension -- nasepna pan tawlngak cianga kingah ding huhna sum) hilo a, na lam-et ding leh na thalawh ding khat hizaw hi. Paul in, “Bangbang na seem uh zongin thaman dingin Topa kiangpan gamh khat ngah ding cih thei na hih manun mite aading a seem dan hilo, Topa aading a seem danin kingaihsunin na lungsim bup uh tawh seem un”18 ci hi. Pensen ciang lel lam-etna pen thu toimuhna hi a, nang na hihleh tawntung hun lam-etna tawh na nuntak ding kisam hi.
TUIPHUMNA: PASIAN’ INNKUAN SUNGMI KHATIN KICIAPTEHNA
Innkuan a gina a cidamte in a innkuan uh angtanpih uh a, tua innkuan sunga a kihel uh maizumpih lo uhhi. A dahhuai thu khat ah, thu-um mi hi napi Jesuh’ hong thupiak ahi tuiphumna a la lo, mipi lakah a kha innkuan a pulak ngeilo, tampi ka mu khin hi.
Tuiphumna cih pen deihteel theih thu hilo ahih manin khiintoh theih, sottoh theih hilo hi. Tuiphumna in Pasian’ innkuan sunga na kihelna lim a kilangsak hi a, “Pasian’ innkuan sungmi khat ka hih ka maizumpih kei hi” cia tangkona hi. Nang na kituiphum nai hiam? Jesuh in a kituiphum dingin a innkuanpihte thu hong pia khin hi. “Pai unla minam citeng khempeuh, Pa leh Tapa leh Kha Siangtho min tawh tuiphumin, thuzuite suaksak un”19 ci-in hong sawl hi.
Bang hangin Jesuh in a Sawlpina (Great Commission) sungah tuiphumna pen nasep vai lianpite ahi lungdamna thu zeekkhiatna leh kilamtohna cihte zah mahin thupisak hiam cih thu kum tampi sung ka ngaihsun hi. Bang hangin tuiphumna hih zahin thupi ahi hiam? A hang pen na nuntakna aadinga Pasian’ hong geelsak a nihna ahi, tawntung kilawmtatna Pasian’ innkuan sungah nang zong kihel, cihna limpuak ahihlam ka nungtel hi.
Tuiphumna pen a deihna, a khiatna tawh kidim hi. Na kituiphum ciangin na upna a pulak, Khrih a kivuina leh a thawhkikna a ciing, na nuntakna lui a sihna lim a pua, Khrih sunga na nuntakna thak a tangko, na hihi. Bek thamlo, Pasian’ innkuan sunga na lutna pawi a bawl zong na hi lai hi.
Na kituiphum ciangin kha sunga thutak khat, taksa pumpi tawh a lakkhia na hihi. Tua in Pasian’ innkuan sungah nang na tun hun liana a piang thu zong kawk hi: “Eite pen pawlkhat Judah mi, pawlkhat Gentail mi, pawlkhat sila, pawlkhawt mi suakta i hihi. Himah taleh Kha Siangtho khat tungtawnin i vekpi-in Khrih’ pumpi sungah hong kituiphum a, Kha Siangtho khat a kibangin i ngahkim hi.”20
Tuiphumna in Pasian’ innkuan sungmi hong suaksak lo hi; Khrih upna bek in hong suaksak hizaw hi. Tuiphumna in Pasian’ innkuan sungmi na hihlam kilangsak hi. Tua pen nupa kiteen lai-a kipia khutbuh bangin lungtang sungpana na khensat, sunglam ki-apna hong phawng kikkik ding, muhtheih kiphawnna khat hi. Vai patkhiatna (initiation) khat hi a, kha thu ah picin mateng ci-a na sottoh ding nam hilo hi. Lai Siangtho in hong kalh khat bek om a, um ding cih thu hi.21
Thuciam Thak sunga mite, a up khit phetun kituiphum uhhi. Pentekost Pawi lai-in mi 3000te Khrih a saan uh ni mahin kituiphum pah uhhi. Mundang khat leuleu ah, Ethiopia ulian khat a kikhel phet mahin kituiphum a, Paul leh Silas in zong Filippi khua thongcingpa-te innkuan zankim hunin tuiphum uhhi. Thuciam Thak sungah tuiphumna kisotto cih bang om lo hi. Khrih na upna, kituiphumna tawh a lakkhia nailo na hihleh Jesuh’ hong thupiak mah bangin a manlang theipenin kituiphum in.
NUNTAKNA SUNGA HAMPHATNA LIANPEN
Lai Siangtho in, “Jesuh leh ama siansuah mite a vekun innkuan khat ahi uhhi. Amaute, sanggampa sanggamnu cih ding amah a zumlohna zong tua hang mah hi”22 ci hi. Tua a lamdang thutak na sungah tumsuksak in. Nang pen Pasian’ innkuan sungmi na hi a, Jesuh in nang hong siangthosak ahih manin nang hangin Pasian angtang hi. Jesuh’ kammalte zong khial cih bang om theilo hi: “(Jesuh in) a nungzuite kawkin, ‘Hih mite ka nu leh ka sanggamte hi. Vantunga ka Pa’ deihna bang a seem peuhpeuh ka sanggampa, ka sanggamnu, leh ka nu, ahi uhhi’ ci hi.”23 Pasian’ innkuan sunga kihelkhak pen na ngah ding pahtawina sangpen leh hamphatna lianpen ahihi. Tua tawh a kinaih zong bangmah om lo hi. Thupilo, hong ki-itlo, ahihkeileh lunghem, na kisak hun simsimin nang kua’ aa cih kiphawk in.
SAWM-LE-NGANI
KA NGIMNA TAWH KIPAWL LUNGNGAIHNA
Lungngaih Ding Thu: Pasian’ innkuan aadingin kei hong kibawl hi.
Phawk ding Khawkneu: “Eite Khrih tungtawnin ama kiangah hong la-in ama innkuan hong suaksak ding cih pen a kikhello ama geelna hi den hi” Efesa 1:5a (NLT)
Ngaihsut Ding Thudotna: Thu-um mi a dangte ka innkuan sungmite bangin hopih ding bangci kipat ding ka hiam?
Source:
Laibu Min: Ngimna' Tawsawn Nuntakna (The Purpose-Driven Life)
Laigelh: Rick Warren
Lailet: PLMangno (Power Translation Service) raymang@gmail.com
Laibu bawl kum: 2006
Laisim Mimalkim tungah Zotna:
Hih laibu pen ni 40 sung sim ding ahih manin nikhat in khatta(nikhat aita) Laibu Saal website (www.zomielibrary.com) pan hong suah toto ding hi ung…
Hih laibu, abu ngiatin a deihte’n Lailet, laibu bawl Sia PLMangno' email : raymang@gmail.com ah kidawp thei hi.
