NI SAWM-LE-LI NI
PASIAN A GAMLATSUAH HUN
TOPA pen ama mite kiangpan amah le amah kiseel a,
ahi zongin kei ka hihleh amah muangin
ama sungah lam-etna ka nei hi.
Isaiah 8:17 (TEV)
Bangbang na ngaihsunkha phial zongin Pasian pen taksuak den hi.
Na nuntakna sungah thu le late a paizia a hoih ciangin -- Pasian in an le tui, lawm le gual, innkuan, cidam ludamna, leh a lungnop-huai thuomzia, cihte hong piak ciangin -- Pasian biak ding baih na sa hi. Ahi zongin thu le la omziate a nopci den hi zenzenlo hi. Tua bang hun ciangin Pasian na bangci biak hiam? Pasian, gamlapi pek-a om tawh a kibat hun ciangin bang na hih hiam?
Gimna sungah Pasian phat, haksat hun sungin Pasian’ thu ngaihsun, zia-etna tuahkhak hun ciangin amah muang, gimthuak laitak ama kiangah niamlut, amah a gamlatsuah laitak amah it veve, cihte pen biakpiakna a dawl tuamtuamte lakah a thukpen hi.
Kilawmtatna cih pen kikhenkhiatna leh kiho lohna cihte tawh kisittel thei zeelzeel hi; taksa pumpi lampan na kigamla thei a, ahihkeileh pau theilo-in na om thei hi. Pasian tawh na kilawmtatna ah zong amah tawh kinaisuah na kisa den kei ding hi. Philip Yancey in, “Kizopna ahih nakleh kinai hun leh kigamlat hun om a, Pasian tawh kizopna ah zong bangzah tain sungmisuah ta lehang kinaina leh kigamlatna pen siallongtang bang den ding hi”1 ci-in tangzai takin gen hi. Biakpiakna a haksat hun pen tua hun hi pah hi.
Na kilawmtatna uh a picin theih nadingin Pasian in kikhenkhiatna a kisa kha thei ding hunte --amah’n hong nusia ta dan, hong mangngilh ta dan, na sak theih ding hunte -- tawh hong sittel ding hi. Pasian pen tai awn tampi gamlatna mun-a om tawh kibang hi. Tua bang hun -- kha lamah keugawtna, muanlahna, leh Pasian tawh kidangsuahna hun -- pen Mi siangtho Johan (St. John of the Cross) in “lungsim le kha, zan khuamial a bat hun” (the dark night of the soul) ci-in genteh a, Henri Nouwen in “hong ompihloh hun” (the ministry of absence) ci hi. A.W. Tozer in “khuamial hun” (the ministry of the night) ci a, midangte in “lungsim khuasik hun” (the winter of the heart) ci uhhi.
Pasian tawh a naipen-a kilawmta pen Jesuh banah David zong hikha ding hi. Amah pen Pasian in lungkim takin “ka lungsim hong tuakpa”2 ci ngiat hi. Himah taleh Pasian’ ompih lohna hangin David hih bangin phun thei zeelzeel hi: “Topa, bang hangin gamlapi ah tuam-om mawk na hi hiam? Nang kong kisappen hunin bang hangin bu na hi hiam?”3 “Bang hangin kei hong pampaih na hi hiam? Bang hangin hih zahin gamlat om thapai na hi hiam? Kiko-a huh kong ngetnate bang hangin awlmawh lo na hi hiam?”4 “Bang hangin kei hong paaikhia na hi hiam?”5
A taktakin Pasian in David nusia lo a, nang zong hong nusia lo hi. “Note kong nusia ngeikei ding a, kong paampaih ngeikei ding hi”6 ci-in kamciam hong piapia hi. Ahih hangin “Kong ompihna in hong sukha den ding hi” ci-in kamciam hong pia lo hi. Tua sangsikin Pasian in eite kiangpan khatveivei a maitang seel ding ahihna thu hong pulak hi.7 Na nuntakna sungah amah a mangthang (MIA -- missing-in-action) tawh a kibat hun om thei lua hi.
Hih thu, Floyd McClung in hih bangin gentelna nei hi: “Zingsang khat, na khanlawh teh nakha tha teng bei, ci ni. Thungen keei, bangmah kilamdang tuanlo. Dawi bang hawlkhia keei, tua in zong bangmah kilamdangsak lo. Tua teh, kha thasaanna tuamtuam nei...na lawmte thu kingensak...na phawkkhak mawhna kici teng pulak, mi na kitheihpih teng kiang mawhmaina ngen kawikawi. Antan thunget nei...kilamdang tuanlo. Hih, kha thabeina bang tanvei sawt ding, ci’n lungkham keei ta. A ni-in maw? A nipi kalin maw? A kha-in maw? Ahici den keei ding hoh ai tam?...na thungetnate innkhum kheng zolo-in ong tuankik lel tawh kibang. A tawpna ah cimawh bit ta-in, ‘Bang thu tuakkha mawk ka hiam?’ ci-in kikokhia hiteh.”8
A thu taktak ah, na khialhna bangmah om lo hi. Hih pen Pasian tawh na kilawmtatna sittel nading leh picinsak nadinga piang, a piang thei zeelzel thu khat, hi lel hi. Khristian a kici khempeuh in a tawmpenin khatvei peuhmah tuakkha hamtang uh a, tamveipi a kituakkha ding hizaw lai hi. Thuak-hakin nop hetlo himah taleh na upna a khangliat nadingin a thupi mahmah khat hi sese hi. Hih thu, Job in a tel manin Pasian’ ompihna in a nuntakna a sukkhakloh hun nangawnin lam-etna nei veve a, hih bangin pulak hi: “Nisuahna lamah ka pai a, amah om lo hi. Nitumna lamah ka pai a, amah ka tuakkha tuankei hi. Amah kiseel ahih manin leilu lamah zong amah ka mu kei hi. Leitaw lamah ka kihei leuleu a, amah ka tuakkha tuankei hi. Ahi zongin kei koi-ah pai cih amah’n thei hi. Tua hi a, mei tawh kihal kham bangin kei hong sittel hun ciangin mawh baanglo ci-in kei hong pulak ding hi.”9
Pasian a gamlatsuah ciangin nang tungah amah a heh, ahihkeileh mawhna khatpeuh hangin nang hong sek, na sa thei ding hi. Himah hi. Mawhna in Pasian tawh sungmisuah kilawmtatna pan eite hong khenkhia takpi mah hi. Thuman lohna, midangte tawh thubuai neihna, manlahna, leitung tawh kilawmtatna leh mawhna dangdang, cihte tungtawnin Pasian’ Kha i khasiasak a, amah tawh i kilawmtatna i kisiasak hi.10
Ahi zongin hih, Pasian in hong awlmawhlo ahihkeileh hong taisan cih lungsim, pen mawhna tawh a kimematna om vetlo hi. Tua pen upna kisittelna khat hi a, i vekpi-a i tuahkhak hamtang ding thu khat hizaw hi. Pasian’ ompihna ngahlo na kisak hun, ahihkeileh na nuntakna sungah ama nasepna a khutma muhtheih bangmah omlo na sak hun, tua bang hunte nangawnin amah itin muangin a thu mangin amah na bia suaksuak veve ding hiam?
Tu hun Khristiante’ khialhtheih mahmah thu khat pen Pasian zon ding sangin sinkhakna (experience) a zonzawk pen uh, hi. Lungsim sukkhak ding mah lam-en uh a, tua bang a pian ciangin a bia taktak ta-in kiseh uhhi. Tua pen khial hi. Taktakin, Pasian in lungsim sukkhaknate tungah i kingakkhakloh nadingin tuate hong hepkhiatsak zeelzeel hizaw hi. Lungsim sukkhak ding hanciamna kici peuhmah, Khrih hong nai om ci-a lungsim sukkhak ding hanciamna nangawn, pen biakpiakna hilo hi.
Upna thu ah na khangmoi hun lai-in Pasian in na kilamtoh theih nadingin lungsim sukkhakna tampi tak hong pia a, amah om ahihna thu na tel nadingin zong a picing hetlo, angsung theihna tawh kidim na thungetnate hong dawng zeelzeel hi. Ahi zongin upna thu ah na goltoh ciangin naupang an tawh a kibang tua thute hong pia nawnlo-in hong sek ding hi.
Pasian, mun khempeuh ah a om theihna (omnipotence), leh ama ompihna kilatkhiatna (manifestation of his presence) cih thu nih pen a tuam tuak hi a, kibanglo uhhi. A masa pen ahi taktak thu khat hi a, a nunung pen lungsim sukkhak thu hi thei zeelzeel hi. Pasian in na lungsim hong kisukkhakloh laitak nangawnin hong ompih den mah hi a, tua hong ompihna pen thuk lua, tangzai lua ahih manin lungsim sukkhakna ciang lel tawh kitehkak theilo hi.
Hong ompihna na sinkhak ding zong hong deihsak thu khat mah hi a, ahi zongin na lungsim hong sukkhak ding sangin amah na muan ding mah lunggulhzaw hi. Pasian a lungkimsak pen lungsim sukkhakna hilo a, upna hi bek hi.
Na upna hong khangliansak ding thu-omziate cih pen na nuntakna tavai-in Pasian koimah ah na muhkhakloh hunte mah hipen hi. Hih thu, Job tungah na piang hi. Ni khat sungin na khempeuh -- a innkuan, nuntak zonna nasep, a cidamna, leh a neih a lam khempeuh -- a vekin taisuah hi. A lungkiat-huai phapen ah Pasian in khenpi 37 sung vilvel hopihna bangmah nei vetlo hi.
Na nuntakna sunga thupiangte tel zolo-in na om laitak Pasian zong gamdai-in om sawnsawn leh amah bangci phat ding na hi hiam? Kiho kizopna om lopi-in kua tawh kikoici zop ding na hi hiam? Na mitte khitui bekbek tawh a kidim laitak Jesuh bangci et ding na hi hiam? Job’ hihdanin na hih ding hi: “Tua ciangin amah lei lakah boksukin, ‘Ka nu’ gilsung panin guaktangin kong paikhia a, guaktang mahin ka ciahkik ding hi. TOPA in piain TOPA mah in lakhiakik zo hi; Topa’ min kiphat tahen,’ ci hi.”11
Na lungsim hong sukkhak dan lianin Pasian kiang ko in. Ama kiangah na lungsim sungkhia hi. Na lungsim sunga hong sukha na khempeuh suahkhia in. Job in zong tua bangin na hih a, “Pau lo-in ka om theikei hi. Ka hehsuakin ka lungsim na hi. Ka paukhiatloh phamawh hi”12 ci hi. Pasian a gamlatsuah hun ciangin amah hih bangin thumin tau hi: “Aw, ka cihtheihpen lai hunte, Pasian tawh sungmisuah kilawmtatna in ka bangkua thupha hong piak lai hunte...mataw.”13 Pasian in na muanlahna, na hehna, na launa, na khasiatna, na lungbuaina, leh na thudotte hong phelsiangsak thei hi.
Lam-et bei dinmun na tunna thu Pasian kiangah pulakna pen upna lahkhiatna khat suak thei ahih thu na thei khin hiam? David in Pasian lah muang kawm, lam-et lah bei kisa kawm mahin, “Um ka hih manin, ‘Ka siacip ta hi’ ka ci hi”14 ci hi. Hih mun ah a thugen kitukalh (contradict) hileh kilawm hi: Pasian ka muang a, ahi zongin ka kisia hi! A taktakin David hih bangin thu a sianggen ciangin a upna thuk mahmah ahihna a kilangkhia hizaw hi. Khatna ah, amah’n Pasian um hi. Nihna ah, a thungetna Pasian in ngai ding hi ci-in um hi. Thumna ah, a lungsim sunga om bangbang a genkhiat ding Pasian in phal lelin amah it veve ding hi ci-in um hi.
Pasian’ hihna -- a kikhello ama pianzia -- mitsuan in. Thu-omzia bangbang hi-in na lungsim hong bangci sukkhak zongin a kikhello Pasian’ hihna tungah kinga in. Pasian tawh kisai a tawntungin a maan den dinga na theih thute ngaihsun kikkik in: Amah hoih hi, kei hong it hi. kei hong ompih hi, ka tuahkhak thute hong theihpih hi, kei hong kin hi, ka nuntakna aadingin geelna hoihnono nei hi, cihte. V. Raymond Edman in, “Khuavak sunga Pasian’ hong gen thute khuamial sungah muanglah kei in” ci hi.
Job in a nuntakna pukin Pasian in zong a hopihloh hunin Pasian a phat zawh nading thute hih bangin mukhia thei lai veve hi: y amah hoihin itna nei hi.15
amah vangliatna tawh kidim hi.16
ka nuntakna sunga thupiangte a neng a tawng dongin thei hi.17
thu le la ukzawhna nei hi.18
ka nuntakna aading geelna nei hi.19
kei hong honkhia ding hi.20
Pasian a kamciam kiplet dingin muang in. Kha thaneem hun sungin na lungsim sukkhaknate tungah kinga lo-in Pasian’ kamciamte tungah lungduai takin na kingak ding, leh picinna a dawl sangzaw khat ah hong tonpih ahihlam na theihtel ding, kisam hi. Lungsim sukkhakna tunga kinga kilawmtatna pen dai mahmah hi.
Tua hi a, buaina buaipih kei in. Thu-omziate in Pasian’ hihna laih zolo uhhi. Pasian’ hehpihna pen thakhauhna tawh kidim lai veve hi; na lungsim hong sukkhakloh laitak nangawnin amah pen nang aading mah hi lai veve hi. Job in thu-omzia a tha-ngahhuai bangmah a omloh laitakin Pasian’ kammal kiplet hi. Amah’n, “Ama muk pana a thupiakte ka nusia kei hi; ama kam pana kammalte ka nisim an le tui sangin manpha ka sazaw hi.”21 ci hi.
Hih bangin Job in Pasian’ Kammal muang ahih manin thu le la kikhel bangmah a omloh hangin amah citak suaksuak hi. Gimna sungah a upna khauh mahmah ahih manin, “Pasian in, zong hong that theikha mai ding a, himah taleh amah ka muang lai veve ding hi”22 ci hi.
Pasian’ hong sepsaksa thute phawk in. Pasian in nang aadingin bangmah hong sepsakbeh nawnlo hi phial taleh singlamteh tunga Jesuh’ hong sepsa thute bekbek hangin zong Pasian pen na khansung tawntung nang’ phatna a ngah dingin kilawm kituak lai veve ding hi. Nang aadingin Pasian’ Tapa si hi! Hih pen biakpiakna a hang thupipen hi.
A dahhuai thu khat ah, eite taang dinga Pasian’ vaihawm, a gimhuai mahmah biakpiak hong luina leh tua sunga kihel thu le late, i mangngilh ta hi. Thei naal lua khin i hih manin i koihkhong kha hi. Kikhailupna a thuak ma nangawnin Pasian’ Tapa in guaktangin kikoihna, a veizah sim zawhloh phial ding vuakna, satna, kona leh zahpihna, ling lukhu khuksakna, simmawhna tawh cilphihna, cihte thuakkha hi. Hehpihna neilo mite’ khutsung ah Jesuh in ganhing sangin a suuksiazaw dinmun tuakkha hi.
Tua ciangin sisan tam luankhiatna huhau-in sibup phialphial himah taleh singlamteh a gik mahmah khat kipuasakin mualtung lamah kipaipih hi. Mualtung a tun ciangin singlamteh tungah siktukilh tawh kikilhcipin kikhai hi. Na sa velval kawmin damdamin a si dingin kikoih hi. Tua bangin a nuntakna bei dingin a om laitak singlamteh gei-a ding mite in amah kosia gawpin a gimthuakna zahpih uh a, Pasian khatin a kipulakna thu totbawl tobawl uhhi.
Tua bangin Jesuh in mihingte’ mawhna leh khialhna khempeuh ama tungah amah le amah a kisuat ciangin Pasian in zong mu ngamlo-in nungngatsan hi. Jesuh zong nakpi lunggimna tawh kiko a, “Ka Pasian, Ka Pasian aw, bang hangin nang’n kei hong nusia na hi hiam?” ci ngeungau hi. Jesuh amah le amah a kihonkhia thei lua hi a, ahi zongin kihonkhia hileh nang hong honkhia theilo ding hi.
Tua hun liana lungsim sung khimzing banga a mialna thu, kam tawh kigensiang zolo hi.Bang hangin Pasian in hih banga a mulkimhuai ngongtatna phalin thuak lel ahi hiam? Tawntung meikuang sungpan nang na suahtak nading, leh ama minthanna sungah a tawntungin nang na om theih nading hi. Lai Siangtho in, “Khrih pen mawhna baanglo-in om hi. Ahih hangin amah tawh kipawlkhopna tungtawnin Pasian’ thumaanna i ngah theih nading cihna tawh Pasian in eite’ phattuam nadingin i mawhna amah ngahsak hi”23 ci hi.
Na khempeuh na ngah theih nadingin Jesuh in na khempeuh nusia hi. Tawntung na nuntak theih nadingin amah si hi. Hih thu bek zong nang aadingin lungdam a kohtaak, a phattaak hi khin hi. Tua hi a, lungdam kohtaak ding bangmah om kei, cih kikkik-huai nawnlo hi.
SAWM-LE-LINI
KA NGIMNA TAWH KIPAWL LUNGNGAIHNA
Lungngaih Ding Thu: Bangbang na ngaihsunkha phial zongin
Pasian pen taksuak den hi.
Phawk ding Khawkneu: “Banghanghiam cihleh Pasian in, ‘Note kong nusia
ngeikei ding, kong paampaih ngeikei ding hi,’ ci hi” Hebru 13:5 (TEV)
Ngaihsut Ding Thudotna: Pasian’ hong ompihna, a diakdiakin amah
a gamlatsuah hun ciangin, bangci bangin mitsuan den thei ding ka
hi hiam?
Source:
Laibu Min : Ngimna' Tawsawn Nuntakna (The Purpose-Driven Life)
Laigelh : Rick Warren
Lailet : PLMangno (Power Translation Service) raymang@gmail.com
Laibu bawl kum : 2006
Laisim Mimalkim tungah Zotna :
Hih laibu pen ni 40 sung sim ding ahih manin nikhat in khatta(nikhat aita) Laibu Saal website (www.zomielibrary.com) pan hong suah toto ding hi ung…
Hih laibu, abu ngiatin a deihte’n Lailet, laibu bawl Sia PLMangno' email : raymang@gmail.com ah kidawp thei hi.
