Nangmah Tatkhiat Nading
I Gave My Life for Thee
(II Corinthians 5:15)
Agelh~Zam Khat Kham
Frances R. Havergal (1836-1879) Philip P. Bliss (1838-1876)
“Himah e, ‘Nangmah Tatkhiat Nading’ la bel kei’ phuah hi mah-in, leitung buppi ah kizel lo-a meikhuk sung a tun dektakna hoh theihnop huai sa kha thei bilbel niteh” ci-in hih laphuaknu Frances R. Havergal in hih la ama’ phuah mah ahi hiam ci-a a dong a lawmte khat’ tungah gen ngei hi. Miss Havergal in a gen ngei bang teekteekin amah mah gensak ni.
Tua hun laitakin kum 23 ka pha a, ka lawmte pawlkhat tawh hunnuam khat zangkhawm dingin Germany ka pai uh hi. A muhnop huai mun tuamtuam en kawikawi-in ka vakvakna un ka gim zawzen hi. Pastor minthang mahmah khat’ inn ah ka tung hi. Tua inn sung kawm tungah Topa Zeisu kikhailupna lim kisuanga, a lim nuai ah, “Nangmah Tatkhiat Nading Ka Nuntakna Kong Pia” ci-in kigelh hi. A nidangin tua lim leh tua lai ka muh ngei zel hangin ka lungsim hong lawngkha khol lo hi napi-in tua ni-in a lim leh a laimalte in ka lungsim hong sukha lua-in ka en gega kha hi.
Tua banga ka et gega kawmin, ‘Nang’ kei bang hong pia na hiam?’ci a hong dong aw bangkhat a za tawh ka kibang mawk hi. Tua hun lian mah-in hih lamalte hong suak detdet a, ka sumbawm sunga ka puak laihawm khat tunga a awnna muntengah hih lamalte ka gelhkhia semsem hi. Ka zawh ciangin ka simkhia a, la hoih khat zong suak zo ngap kei inteh, ci-in laidal gina khat tung nangawnah teikhiatkik ka sawm nawn kei hi. Tua khit teh, ‘A peuhmah-in bang nopmawh a zong kem zenzen ding ka hia?’ ci-in zialcipin ka mai-a meikhukah ka khul phei hi. Meikuang sung tu lo-in tap tungah kikhul valval hi. Tua banga ka laidal meikhuk sung tu lo a, tap tunga kikhul valval ka muh ciangin ka tawm kik nuangpong hi. Ton neinai-in kikhep liapluap hi. Ka sumbawm sungah ka guang kik hi.
England ka tunkik zawh tawlkhat khit ciangin, piteekte kikepna inn khat-ah piteek khat tawh kimu dingin ka hawh hi. Nidang khawnga mahbangin ama’n a Honpa’ thu mah hong kuppih pah hi. ‘Midangte in bangmah-a a man khol loh ding ka la phuah hoh a deih kha tam?’ ci-in ka ngaihsun hi.
Ama’ ngaih dingin ka simkhiat leh, lamdang kasak, hong lungdam lua mahmah a, kei zong ka nuam mahmah hi. ‘Dal khat hong hong teisak in’ ci-in hong ngen hi. Ama’ ading dal khat teisak-in ka pia-a, tua bek tham lo-in dal tampi teikhia-in mun tuamtuamah ka khak kawikawi hi.
Laphuaknu’ gen mahbangin meikhuka a kangtum ding hi lel napi-in Topa’ deihna om ahih manin leitung khempeuh ah kizel a, Miss Havergal’ phuah la ngaih tampite lakah a masapen hong suak hi. Ama’ phuah late lakah “Topa aw, Ka Nuntakna” (Take My Life and Let It Be), “Who Is on the Lord’s Side?,” “O Savior, Precious Savior,” “I Am Trusting Thee, Lord Jesus” cihte zong kihel hi.
Hih laphuaknu Frances R. Havergal pen “hymnody’s sweetest voice” kici a, England gam Astley, Worcestershire ah December 14, 1836 ni-in suak hi. Church of England pawlpi sunga minister Rev. William Henry Havergal’ tanu tumpen ahi hi. Hih siapa mahmah zong laphuaksiam church musician minthang khat ahi hi. A pianpih siamna vaknate banah Miss Havergal pen kampau lam leh music lama limtak-a kipantah khat hi sawnsawn hi. Hebrew, Greek a kipan tanglai kampau tuamtuamte banah German, French a kipan tuhun kampau nam tampi pau thei hi. Pilna sangpi a neih hangin a nuntak tawntung a Topa a um a muang den khat ahi hi. Thu ngen masa lopi-in la gual khat zong gelh ngeilo hi, kici hi. Kum 43 a phak ciangin si a, a nuntak tawntung mi siangthote’ nuntak ding banga a nungta mi ahi hi.
Hih la a aw a phuakpa Philip P. Bliss bel American church music tangthu ah mi minthang mahmah gospel la phuaksiam ahi hi. America gam Clearfield County, Pennsylvania ah July 9, 1838 ni-in suak hi. A neu lai-in zawng mahmah uh hi. 1850 kumin Zeisu Khazih a Honpa-in sanga Tioga County, Pennsylvania a Cherry Flat Baptist Church ah lut hi. A neu lai mah-in music lam uk-in va mahmah pah hi. Tawlkhat sung music a sin khit ciangin Chicago ah kisuan-a Dr. George F. Root tawh kithuah-in music hilh leh cialpi bawl-in kum 10 sung om hi. 1874 kumin D.L. Moody leh Major Daniel W. Whittle te in hunbit-a evangelistic nasep sem dingin hanthawnin zol uh hi. Tua huna kipan hun nai lo pi-a a sih dong, tua zawh kum nih sung cialpi kibawlnate ah kihel-in la makai-in om den hi. Christmas hun laitak a zi tawh Pennsylvania pan Chicago ah khualzin-a a pai na vuah a meileeng uh kibungin pi 60 a thuk guam sungah kiasuk-a, mi 100 si hi. Tuate lakah Philip P. Bliss-te nupa zong kihel kha uh hi.
Philip P. Bliss’ phuah late lakah hih la, “Mangmah Tatkhiat Nading” (I Gave My Life for Thee) banah, “Ka Kha Ading A Hoih Hi” (It Is Well With My Soul), “My Redeemer,” (Kei Ong Tanpa – Xtian La No. 485), “Free From the Law Once for All” (Thukham Pan Suahtakna – Xtian La No. 473), “Hold the Fort,” “Let the Lower Lights Be Burning” cihte kihel hi.
Nangmah tatkhiat nading
Nunna nangah nading
Kei nuntakna kong pia
Kasi pha kong buakhia
//Ken ka nuntakna kong pia zo
Nang kei bang nong pia zo?//
Khang tawntunga nuamna
Na ngah theih na’ng inah
Gentheihna kum sawtpi
Nang ading kong thuak hi
//Nang ading kum sawtpi kong gim
Kei hang bangtan na gim?//
A taang ka Pa inn nuam
Ka tokhom vanglian tuam
Nusia’n leitung kong tuak
Lungzuan dahna kong thuak
//Nang hang hizahta ken nusia
Kei hang nang bang nusia?//
Dawigam sungpan nangmah
Kong hotkhiat na’ng inah
Ka thuak gimna pite
Genkhin zo kei niteh
// Nang ading genzawhloh ka thuak
Kei ading bang na thuak?//
