Nangma Deihna Bangin A Gamta Dingin Kei Hong Hilh In (Late 143:10)
A gelh ~ Kap Za Khai
Hih Late 143 pen a gelh kitheician lo a, ahi zongin hih in lungkhamna pan suahtakna, lam khialhna pan lamman-ah Topa’ Khasiangtho in amakaih nadingin a thumna a kigelh la hi ci-in kisang hi. A lai sungah lai gelhpa in “Kei kua ka hiam?” cih leh “Koi bangin gamta ding ka hiam?” cih thu sangin “Kei koi bangdan mi hi zaw ding ka hiam?” cih lam-ah bulphuh zaw leh kilawm hi. A galte a launa, a nuntakna sungah launa leh lungkhamna bekbek tawh kidim den ahih manin a lampi mial in a kalsuan zia ding thei zo nawnlo ahih manin Pasian kiangah Khasiangtho lamlakna a ngen hi. Hih sungpan thu thum tawh en ni.
Nangma Deihna Bangin
Ama deihna bekbek a kibulphuhna pan Pasian deihna a bulphuh nuntakna ah kiheina ahi hi. Mihing deihna ahih leh mawhnopna, paktat nopna, guktat nopna, zulhzau nopna, phengtat nopna, thumang nop lohna, cihte vive hi a, tuate in ei leh Pasian kizopna hong kitatsak, hong kisiasak hi. Pasian tawh hong kigamla sak in tawntung sihna ah hongtun thei hi. Ahi zongin Pasian deihna sungah i ki-ap leh Pasian in i nuntakna lampi hong hilh den dinga, khuamial sunga meivak bangin i nuntakna sungah hong tang den ding hi. Pasian deihna i theih/ teel zawh loh hangin Pasian in na teel mahmah lel ahih manin upna leh lam-etna tawh lungmuang den ni. Pasian deihna a zuite Pasian in puksak ngeilo, lampial sak ngeilo, tuksak ngeilo, guallel sak ngeilo ding hi. Ei deihna sangin Pasian deihna thupisak zaw den ni.
A Gamta Ding In
Khristian nuntakna pen Pasian deihna theihna bek tawh khawlcip lo a, theihna bangin nuntak gamtat tawh zopsuak ding ahi hi. Late gelhpa in “Nangma deihna bangin a gamta dingin” a cih ciangin ama lungsim sungah ama deihna sangin Pasian deihna banga gamtat ding kician takin a khensatna ahi hi. Gamtatna kihel lo Pasian deihna theihna in upna si hi (James 2:26). Pasian i up leh ama deihna i theihden kul a, i theih mah bangin i nuntak pah ding pen thupi a, ahi zongin tua pen ‘tavuan’ bangin pom ding hilo a hamphatna khat in i ngaihsut ding hizaw hi.
Kei Hong Hilh In
Amah leh amah bangmah hi/thei kisa lo ahih manin Pasian kiangah thu hilhna (pilna leh theihna) ngetna ahi hi. Khanglui pawlpi makai khat ahi Origen in “Creation itself is some kind of a fall” na ci hi. Piansaknate mawhna sungah puk hi a cihna pen mawhna hangin tuate mahmah sungah kiciangtanna (limitation) nei cihna ahi hi. Tua banga kiciangtanna (mihing’ pilna, theihna leh sepzawhna cihte) hangin mihing in na khempeuh theikim zolo hi. Tua ahih manin mihing in kiciangtanna a neilo ahi Pasian kiangah pilna leh theihna a nget hamtang akul na hi hi (1Kum.3:5-9). Khristian nuntakna Pasian theihna tung bekah kinga hi. Tua theihna pen lungtang sungah zungthukkha in hong nuntak ciangin “Nangma deihna bangin ka gamtat theihna dingin” cih ahi Khristian nuntakna hong luangkhia thei pan hi. Tawntung nuntakna pen Pasian theihna tungah kinga hi (John 17:3). Tua ahih manin i nuntakna ah Pasian kiangpan hong pai pilna leh theihna i ngah theih nadingin Pasian kiangah i nget kul hi. Amah i kihilh sakden kul hi.
Late 143 sung i etcian takciangin laigelhpa’ hong laknop ahi Khristian nuntak kalsuanzia ding thu kimu thei hi. Mihing theihna leh hihna sangin Pasian tungah kibulphuh zawk ding ahihna, leitung nuntak haksatna sungah Pasian deihna bangin i kalsuan theih nadingin Pasian kiangpan Kha siangtho lamlakna i nget a kul denna, tua bangin kalsuanna in ei leh Pasian hong kizomsak in khuavak sungah a nungta Pasian tanu/tapa hong hong suaksak cih thute hong phawksak hi. Pasian theihsawm masa ni. Tua khitciangin ama deihna bangin i nuntak theih nadingin hilhna leh lamlahna ngen ni. I ngah khit ciangin zui pah, gamta pah ciat ni. Tua hi leh Amah in eite hun khempeuh leh mun khempeuh ah hong ompih, hong tonpih in lam hong lak den ding hi.
