Na Muhna Laih In
Agelh ~ En Khat Thang
Hun khat lai-in, sum hau mahmah papi khat a mit hong na citciat ahih manin, lunggim, singim in hong om hi. A lawmlegual Siahuan, Siama te dong kawikawi in, a mit damna dingin kibawl sak hi. A muan mahmah mit lam siahuan pi te in zatui nuh ding, nek ding a piak banvuah, a theih tawp un a bawluh hangin hong dam thei tuan lo-in, hong suk semsem zawsop mawk hi.
Tua leh, a tawpna ah cihna ding a bei ciangin Biakinn a, Pasian nasem Father pa khat thungen sak dingin sam hi. Father pa in mihau pa' mit hong vel sak leh, a mit a hoihkik theihna ding thu khat hong mu khia hi. Tua in mihau pa mit pen green color (a eng) bek tawh kituak in color dang tawh kilem lo cih ahi hi. A eng bekbek tawlpi khat sung mumu leh dam ding cih thu ahi hi.
Tua leh, sum haupa zong innza zutte samin a Inn khan khempeuh sualpek a kipan, a vanzat tutna, sabuaite dongin a engza hong zut sak pah hi. Tua banah a muhnop, a etnop khat pepeuh a om simin, a nasemte a engza zut sak masa tangtang hi.
Nipikal khat khit pawl ciangin Father pa zong sum haupa veh dingin hong paikik hi. Huang kongkhak cingte in zong a Pu uh mit dam lohkik ding patua banah, a Pu kihta uh ahih manin Father pa puantual kangpi le a sam, a mai, a khut le khe teng a engza hong zut sak uh hi. Nasemte in "Father aw hong telsiam in, ka Pu uh a mit in a eng bek en thei ahih man hi" ci-in thum bawl dep uh hi.
Tua leh, Father pa zong sum haupa gei hong tun teh nui kawm sa in hopih a, "Na mit in na khempeuh a eng ding a muh theihna dingin, mitlimlang maan eng kituah khat lei ziau le teh hih zahin buai liang leh sum tampi bei-in, na inn le na vante a engza na zut kisam lo ding hi. Za zutin pan na hih leh, leitung bup a engza zut theih ding sa kha na hiam?" ci-in thu hilh hi.
Hih tangthu in eite hong hilh thu ahih leh, i kimle pam ah hoih i sak loh, i muh dah, i ettheih loh khempeuh eite mit tawh kituak dingin va bawl ding pen sumle pai bangzahta in i hau zongin, ahi zo ngei lo ding thu ahi hi. Tuate i ettheihna dingin i bawl theih ahih leh, eimah ciat mit, eima ciat muhna i laih ziau ding ahi hi. Tangthu sunga sum haupa in mitlimlang maan eng khat bulh ziau leh, a muh khempeuh hoih sa in lungsim, pumpi cidamin, a mit zong dam ding banah kua mah zong buai sak kul se lo ding ahi hi. Eite zong, lungnuam, sinnuam, pumpi cidam ding i ut leh i muhna, i mit laih a kul hun tampi om kha ding hi hang. Tua bang hi leh kua mah zong kikawkkawk kul se lo ding dan na hi gige hi!
Laibu Saal / Zomi eLibrary
