NA LELH KHAT
Agelh ~ CK Khai
Gam sungah Humpi nelkai khat kigualzo sak in ham buabua in a dang gamsate a utut in simmawh bawl in a tawpna-ah, a sa ne in kigualzo sak mahmah hi. Tua man in gamsa khempeuh in kihta, lau in a om na ciat ah ling keuhkeuh in om khikhe uh hi.
Nikhat, tua a kihatsak mahmah humpi nelkai deihtak hong ham in hong kilum letlet in a nung amai a pumpi, singbul suangbul te tawh taat zel in lei ah kilum khuk in hong kipeipei a, gamsa dang ten, bang hong suak mawk tam ci-in lau lua ahihmanun a gei neh ngam lo-in dai khikhe uh hi.
Humpi nelkai in thuak lah mahmah khat nei-in, hong kipeipei a, lei lak ah hong ki taattaat leh a luzang, singbul zum khat tawh hong sun kha in, a si luangin a tawpna ah si hi.
Ganhing dangte in lamdang sa in, a si humpi nelkai a velvel uh leh a nungzang mulkawm ah miksi san khat na om in. Tua miksi san i pehna thak sa lua a, a kikhuatna in a kipeipei leh a si nahi lel hi.
Ganhing dang teng khempeuh tungah gual zo a kisa mahmah humpi in miksi san khat a lel mahmah nahi mawk hi. Tuamah bangin ei mihing te zong i thahatna mun tek om a, mun kim ah kihat khin lo thei hi. A thahat mahmah khat in a zawh vet loh, hamsa a sak khat pen, a zawngkhal khat ading in a baih mahmah khat na hi thei lel hi.
Lasiam khat adingin mi mai-ah lasak pen ol sa mahmah dinga, la-uk lo, mi mai ah a ding ngei lo khat adingin mi mai ah lasak ding sangin kaalkhat lo khawh baih sa zaw tham ding hi. Ei thahatna mun pan in midang te i hawmthawh bawl ding hilo a, ei hatnamun lian ah hat i sak lohte zong, i bat lohnamun tampi om hi cih phawk siam ding hi zaw hi.
Bawlung siam a minthang mahmah Messi pen bawlung suihna-ah i bat zawh loh hang in vok kuang suii sak leng ei sangin siam zaw tuan het lo ding hi. A ki banglo siamna leh kivakna khat ciat ki nei a, a ki simmawh tuan ding omlo hihangh. I neih hatna leh i siamna te angtan ding hi a, ahizong in ki phatsak pih ding hilo hi. I hatna leh i hihtheih nate mite’ phattuam nading in zangh khia in i thanemna kisapna te kipanpih siam ding a hihi.
Humpi-in a kam leh a khete zangh in gamsa tampi a thahlup theih hangin a neu mahmah miksi san khat that lum zolo in miksi peh tawh sihlawh hi.
Khat vei lawhcinna leh gualzawhna tawh a hat pen a pil pen a siam pen kihi sam lo hi.
Gual zo ing i kicih pen laitakin ih lelh khat na om gige thei tawntung hi cih phawk huai hi. Na hauh ciangin simmawhna tawh mi zawng khat neubawl zawkna, napil ciangin nang sang a hai zaw khat neumuh kha in simmawh bawl na lungsim na neih leh tua pen ngaihsut na hoihlo khat a lel na hita hi.
Laisiangtho sungah Kumpi nu Vashti (Esther 1:12) kumpi pa in a ma kiangah pai dingin a sapteh, hong painuam lose a hihman in kumpi pa hong heh in kumpi nu Vashti hem khia in tua mun ah melhoih Esther in kumpi nu hihna hong luah to hi. Kumpi nu Vashti pen midangte sangin amel zong hoihzaw in minthang zaw kimlai kiphatsakna kiau khat, hong lel kha in tua hang bek tawh Kumpinu kimlai mi mawk mawk khat hong suak hi, a min than mahmah laitak in a lelh khak pen kiphatsak na, thuman lohna hong hi ziau hi. I mel hoih na i hihtheih na khat peuhpeuh kisaktheih pih khak leh ei lo khat tawh Pasian in zingvai hawm thei lua hi.
Tua man in i gennop bul pi in...
Ih hauh teh i kiphatsak leh
Ih pil teh i kiphatsak leh
Ih gualzawh teh i kiphat sak Leh
Kiphatsakna lungsim (miksi san khat) a lel kihi ta a, gualzawhna sawt khom het lo-in a kipum kiat kik thei lua hi.
Humpi nelkai khat miksi san khat lel dingin a kilawm loh mah bangin, a gualzosa khat in zong kiphatsakna lel tawh leitang kidenna kik ding cih pen kilawm lo hi. Ih lelh khem peuh pen a gol alian teng hi tuan lo a, a phawk taak lo, thu nengno a neupen khat zong hi thei lel hi.
Kiphatsakna in mite neu bawl sak a, mite neu bawlna in midangte simmawhna hi. Midangte simmawh khakna in mite itna hong ngah sak lo a, mite itna i ngah kei leh muhdah na bek ki ngah ding hi.
Gualzo sa khat kiphatsakna hanglel tawh gual lelh kik sawm ken.
Mual tunga ding khin sa kiphatsakna hang lel tawh nuai kiat kik sawm ken.
Mi itna a ngah khin sa kiphatsakna hang lel tawh muhdah thuak kik sawm ken.
Hau mahmah in citak kei peuh le teh a citak mi zawng khat a lel na hita hi.
Pil mahmah in ki niamkhiat kei peuh le teh a ki niamkhiat pilna neilo khat a lel na hita hi.
Hat mahmah in mi tawh kilem kei peuh le teh mi tawh a kilem thei a zawngkhal khat a lel na hita hi.
"Na thanemna en in lungkia ken la,
Na hatna mu in kiphasak tuan ken."
Source:
Laibu Saal / Zomi eLibrary
