Na Gualzawh nadingin Laisim in
Agelh ~ Job Cinpi
Zomi khangnote aw laisim hahkat mahmah ding a kisam mahmahte hi hang. thuthei mahmah hang a, i tel tawm mahmah hi. Lai simsim a, khuak muat om lo hi. Laisimna in khuak hoih sak a, lai simsimte in thuthei bek hi lo thu zong tel pah uhhi. Khuak pen zang kei leng hai lam manawh hi. Tua ahih manin na khuak pen na sem sak in. Laisim in la thu ngaih sunsun in.
Na khempeuh ah kei a thei pen hi'ng na cih lai teng, a thei nailo na hi zaw hi. Na theih taktak ciang, nang le nang bangmah nahih lohna nakiphawk ding hi. Thuman gending na kipat ni pen zuaugen mi na hih lam naki theih ni hi a, thu kan ding na kipat ni zong thu natheih loh lam na kitel ni a hi pah hi. Tu ciangciang leitung ah thu thei lua cih mihing om nai lo hi. Tu' a na dinmun ciang bek tawh na lungkim ding hi lo hi. Laisim in thu kankan leng kipuah phat ding zia le mailam kalsuanzia ding tampi tak hong hilh khol hi.
Hong kihilhnate zui-in pilna ngah unla, thudon loin ommawk kei un.
Paunak 8:33
Laisiangtho sung ah pilna thupit zia kitamgen mahmah hi. Laisiangtho a khiatnapen mihing nuntak a kipat na bulpi cih na ahi hi. tua ahih manin Laisiangtho sim pan kipat ding ahihi. Laisiangtho simna in Vangam hongtunlo ding aa, ahih hang in Vantunggam tun nading lam pi hong lak ding hi.
Mipil a tam mahmah hang in acim (micim) tawm mahmah hi, pilna pen zontawm hi aa cim na pen pianpih hi zaw deuh hi. Laisimsim le teh nakam na kem zo pah lelding hi. Thungaih hahkat in la, nakampau ding ngaihsun pha mahmah in. khangham te thudong in la, na neuzaw te hawmsawn in. (Ci pen al mahmah aa ahih hang in Ci omlo in sa lim lo ci in paunak i nei hi.) na thugen a ngainuam lo te kiang ah thu nagengen leh hai hong sa lelding uh hi. (Ci al mahmah aa, ahih hang in sial in duh mahmah hi.) Na thu gen zak nop asa te kiang bek ah thuhoih thumanpha gen in, bang hang hiam cih leh thuthei te bek in thuhilh na ngai nuam uhhi.
A hoihzaw ging ahi nak leh naupang khat ii thugen ahih hang in naman zah ding thupi hi, thuhoih hong ki gen ciang in lungdam ko tawntung in. Na khialh na ahih nak leh na neuzaw te ahi zong in khial ing ci'a na thum ding lungiang kei in. Pil nop na pen natna hilo aa, apil ki neih napen natnapi khat ahihi.
Munthak khat peuh na tun ciang in nakim napam thu kan masa in, tua in na gamtat zia ding tampi hong hilh ding hi. Mi khilh na nakawk pahpah leh thutang na thei kei ding hi, bang hang a khialhiam cih kan phot in la, hilh theih dingte ahih leh tuamun ah tuaci khial teh va ci zaw in. khem a thuak ding mi khat mu gige (hon khia thei) napi in na om hithiat leh a khem pa tawh ki lamdang lo nahih lam phawk in.
Maitang zahtak neilo in munkhempeuh ah thu agen ziahziah te pen mipil hi aa, (Thutheih na) cim na tawh athuah te in mun le gam khen tel thei uh hi.
“Tua ciangin amah in mihingte tungah thu genin, ‘Topa zahtakna, pilna hi a, siatna pelhna pen thutheihna hi,’ ci hi,” Job 28:28 a ci hi.
Thutheihna pen pilna nei lo te tung ah zong a om ahihi. Pilna neilo a hau'h sang in pilna a nei thuah te kip zaw hi.
Tua ahih man in Zomi khangno te aw, sang na kah nawn kei zong in, laisim ding pen bei ngeilo ding hi.
Zomite mainawt ni.
