Na Bukmun Khan In
Agelh ~ En Khat Thang
Ni dang lai-in muvanlaino melhoih nih Kumpi pa kiangah hong kipuak hi. Kumpi pa in zong hoih sa ahih manin, a huang sunga singkung khat tungah a nasemte khawi sak hi. Nasemte in muvanlaino nihte nisimin an le tui pia in hoih takin hong khan suah uh hi. Muvanlai gel zong hong zualin tua singkung inn bangin hong nei uh hi.
Hun hong paipai-in, kum khat bang hong cin ciangin, muvanlaite hong gol sim ta hi. Sun hun simin muvanlai khat pen van sang dawnah leng denin khualmial ciang a Inn kumpipa huang singkung tungah hong ciahkik zel hi. Kumpipa in vasa khat bek lengin a dang vasa a len loh ciangin lung nuam lo ahih manin, a nasemte kiangah "hih vasa a lenna dingin vaihawm dih un" ci-in sawl hi.
Kumpipa nasemte le a mipil thudotte in tua vasa tawi-in lawn to ta le uh vasa leng tuan lo-in a singkung tungbek mahah hong tukik pahpah hi. Kumpipa in zong hi gam vasate zialetong a tel zaw deuh dingin khuata lama om lokhomi khat dot dingin sam sak hi. Zing khua hongvakin kumpipa hong khanglo hi. Kongvang neu panin hong khuadak leh muvanlai nih vantungah a leng khawm hong gal muh hi. Kumpipa in "Lokhopa ka kiangah hong paipih un" ci-in a galkapte sam sak pah lian hi.
Lokhopa kumpipa' kiang hong tungin, zahtakna hong pia hi. Kumpipa in "Hih muvanlai bang ci bangin lengkhia sak zo na hi hiam?" cih hong dong pah hi. Lokhopa in zong, "kumpipa aw, na khansau ta hen, hih vasa a len ding pen haksa peuhmah lo hi, a tuanna sing kung ka phuk sak leh leng pah vingveng hi, vasa in a tuanna singkung bekah a nungta thei ding kisa kha hi" ci-in dawng hi.
Eite mimal khat ciat zong Pasian in a sang dawnah leng zo dingin thupha hong piaksate ihi hi. Mihingte in i sep theihna taktak pen a lamdang, a nasialua mahmah na hi gige hi. Ahi zongin, eite mun khat bek ah tutu in i tualbialna sa sung bek ei tawh kisai i sa kha hi. Mihingte’ hihzawhna, sep zawhna pen mong nei lo zah dongin lamdang ahih lam phawk huai hi. Nuam i sakna, gualnopna, na khat peuhpeuh olno taka ngahnate bek ah i kipingpei manin a sangpi khantohna i mu kha kei hi.
Tua ahih teh, i tuanna i singkung phuk a kul leh phuk in, a sangna lamah lengin hong bawl Pasian a minthang sak i suah ding i kihanthawn nuam hi.
Leitungah mihau penpen khat a, min nei ngei John D. Rockefeller in "Don't be afraid to give up the good to go for the great" ci hi.
A minthang vangvang Apple company co-founder le CEO zong ahi khawm Steve Jobs in "Stay Hungry. Stay Foolish" cih thugen minthang khat 2005 kumin Stanford University ah gen hi. A deihna ahih leh mun khat bek ah lungkim lo ding, nuam sa hilhial a na tualbialna panin lengkhia ding, pilna zon beh ding, kan beh ding, theih beh ding, a thak bawl beh ding, a sang zaw ah len sawm den ding cihna ahi hi.
A hizongin leitungah hi bangin comfort zone pan a paikhia pen 3% bek ki om hi ki ci hi. 97% pen comfort zone sungah kitual bial tek hi. Tua 3% sunga om khate bek mah leitungah a lamdang takin khantohna, muhkhiatna thakte a hong nei zo uh ahi hi. Khangthak Zomite zong a sang dawnah i len zawh ding i lunggulh mahmah hi.
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
