Muvanlai Thu
Agelh ~ En Khat Thang
Muvanlai pen kum 78 ciang bang nungta thei in, vasa nam sungah a khansau pen nam khatin kiciamteh hi. Hih bangin kum 78 ciang bang a nuntak zawhna dingun, a kum 48 pawlin a hamsa mahmah khensatna khat a neih dinguh a kisam nahi gige hi.
Muvanlaite kum 48 a phak uh ciangin, a khutcinte kisia ta banah, a muk uh zong hong saulua peuhmahta in kawi gawp phial hi. Amulte uh hong tam semsemin, a kha uh gik hong sa ta ahih manun saupi leng zo nawn lo uh hi.
Hibang hun laitakin mu vanlaite in hici om suak lel in si mai ding maw? ahih keh' a haksa le a na lua mahmah a pumpi uh kikhelna ding bawlin nungta ding maw? cih nam nih tel uh hi. Pawl khat in sih mai dingin tel uh a, pawl khat in ahih leh a na, a sa haksatna thuakin nuntak ding hanciam uh hi.
A nuntak suak theihna dingun mual sang dawnte ah bu tom masa in, a nek dinguh pawl khat koih uh hi. Tua a bu tomna vuah om cip uh a, a pumpi kikhelna ding natna thuak kipan uh hi. Natna thuak hun pen ni 150 (kha nga) sung phial sawt uh hi.
Amasa penin, a muk saulua-a kawi liang pen suang tungah deihtakin tat khia hi. Amuk kitan khit teh muk thak hong po dong ngak uh hi. A muk thak hong dawk ciangin a khutcin, khecinte khat khatin a muk tawh bot khiat kipan uh hi. Khutcin, khecin thak hong po khiat ciangin, a mul khempeuh uh bot khia in, mul thak, khathak hong po ciangin haksat, gim thuak hun ni 150 hong cin petpet ta uh hi.
Hi bangteng khit ciang, Muvanlai hong leng khiakik in kum 48 pan kum 78 bang hong nungta suak thei hi. Muvanlai thu ii deihna ahih leh kikhelna (change) thu a gen nuam pen hi hang. Ei mihingte in zong nuntakna thak i ngah theihna dingin a haksa mahmah khensatna i neih ding kisam thei hi hang.
I nuntakna gual zawhna, lungdamnate tawh i kalsuan theihna dingin, i gamtat hoih lo, ngeina hoih lo, ngaihsutna gina lote i paihkhiat ding kisam hi. Ngaihsutna thak kimlepam tawh kituak i zon kula, kei cihsa, kei upsa, kei patsa, kei kei kei cih lungsim luite i paihkhiat hamtang ding kisam hi. Ngaihsutna thak, lungsim siangtho thak, pianthakna te tawh i mai lam a ding i lamtoh ding kisam hi.
Muvanlai nangawn in a nuntak sau na ding, a pumpi tungah a kisam nawn lo, a kizang thei nawn lote, sutan, botkhia mang zo buang ahih leh ei mihingte in i khansau na ding, i nuntak nopsakna dingin, a lui nate khelin pianthakna tawh i kalsuan theih ding thupi mahmah hi. Muvanlai in ahih leh natna haksatna tampi kum lang phial thuakin kikhel zo buang hi.
A beisa hun sungah gitlohna, gamtat siatna, zulesa tawh kidiahna, kam eng pauna, mi zahko theihna a kipan gitlohna, thadahna apawlpawl le i pumpi tungah a hoih lo i neih tampite, i paikhia zo ding hiam? I kikhel zo ding hiam? Ahih kei leh kikhel sawm selo-in, ahi cipi-in i sih sawm mai ding i hiam? cih lungngai kawmin Muvanlai thu i phawk ding i kideih sakna ahi hi.
Nuntakna thak, pianthakna taktak tawh i nuntak zawhna dingin Pasian muang in i hih zawh lohte Pasian tungah nga in, Topa aw ka nuntakna hong puah phat sakin i cih theih ding kisam hi. Pasian in mu vanlai bangin a tate khathak a bawl dingin hong deih hi. Isaiah 40:31 "Ahih hangin tawntung Pasian a muang mite a tha uh dim dinga, Muvanlai bangin khathak a bawl dinguh hi. Amaute tai napi un tawl lo dinguh a, lampai napi in gim lo ding uh hi."
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
