Mualsuah Khopna
Agelh~ Khup Lian Thang
Thukizakna baih mahmah ahih manin thusia thu hoih zong kizel baih mahmah hi. Covid, Ukna buluhna, nuntakna haksatna le mailam kalsuanzia ding theilo in gambup phialin lamet bei in i om laitak ahi hi. I lungsim buai in kingak nading nei lo-in adik akhial nangawn kikhen theilo kha thei mai hi. Theihloh kalin i lungsim sungah gitlohna khawng, a diklo thungaihsutna tuamtuam zong hong lut mai ta hi. Hih bang bilbial taksa le lungsim galdonate i thuak ngeingai laitak in picin vai takin mimal kim ciat gamta kampau ciat in kalsuan khawm liailiai hilehang i lunggulh mahmah hi. Tua hileh i minam bup zong a picing a ettehtak minam le thu-umte hito ding ihih manin khatvei lungngai kikin i lungsimte daisakin thuman thutak ah itna bulphuh in ciah kik dih ni.
Sum le Pai Neite
Sum le pai neite in i mipih a genthei a haksate, nasep khawl in a mapangte, gal le sa hangin a cimawh a dongtuakte, natna satna hangin a cimawhte khempeuh tungah itna i lahkhiat hun hi a, hihzawh zahzah tawh itsit hetlo in nong mapan nading uh i lunggulh mahmah hi.
Gam le Minam Makaite
Gam le minam adingin hong diangkhia, galkap ukna pan suahtak nadingin a hanciam makaite le kipawlnate khempeuh aw, i nawk ding gal pen thahatlua ahih manin khatlekhat khut kilen in ma I pankhoploh phamawh hi. Bek tham lo-in, veng Ieh pam tawh khut kilen in kidinpihloh phamawh dinga, gambup khuahun 1uanna zia tawh zong I kalsuan siam ding thupi zaw lai hi. Ei le ei tung peuhmah ah khutlum kinga hetlo in, a kician I ngimna tungah lungsim pumpi le I hatna khempeuh zatsawm zaw ding hihang. A mangthang ding minamte bangin gamta lo-in a khangto a picing minamte bang kalsuan sawm dih ni.
Mundang aa om Mipihte
Gamdang mun dang aa om mipihte khempeuh in Zogam, Myanmar gam sunga I laizomte’ thuakna hoihtakin hong telsiamin hong veipih ngiat in, a kisam bangbang tawh nong panpih ding uh zong kilunggulh mahmah hi. Sum le pai, thulela, ngaihsut piakna tuamtuam sungkhia-in i gam i lei adingin pankhop ding kisamlua hi. Tha nakpi takin hong san lai dih uh. Ahih hangin I kidop mahmah ding khat ah, inn tualzang le amun a mual aa, thupiang pen a mun a mual a gam sunga om I mipihte in a telzawkna om kha thei ding ahihmanin I kipanpihna ah zong kidop siam ding kisam mahmah ding hi. A phual a gam sunga omte muhna le sep nate I panpih ding hi a, a neng a tawng in a vallua in I va sawkluatloh ding zong hong thupi mahmah ding hi. Hawmthawhna zong tampi om kha mah ding hi. Tua bangte tungah simmawh zahpihna kammalte I zat hetloh ding thupi hi. Itna kam nem tawh hoihtak kiho in, deihna le deihsakna thute kikum liailiai in mual I suahkhop ding pen a picing minamte zia ahi hi.
Biakna Makaite le Mipite
Gambup mipite’ lungsim pumpi taksa a thanem penpen laitak ahih manin mipite ahi zongin thalengal sit hetlo-in sep theih bangbang tawh lampi tuamtuam zongin hanciam nasep hun ahi hi. A thanemte thapia siam in, a dah a kapte hehnem in, a genthei a haksate adingin lampi tuamtuam zonsak in huh ding kisam te kihuh liailiai ni. Ei sangin i gam sung, i mipihte sung, veng le pam, i pawlpi sungah daihna le lungnopna hong tun’ theih nadingin Pasian lamlahna tawh kalsuanin mapang hun ahi hi.
Hih hun siat mahmah sungin dingkhawm diangkhawm in, i haksatnate ah khatlekhat kipanpih diamdiam ding hanga thuman thutak in gual hong zawh dongin lunghiang hetlo-in leitung kiu li aa om Zomi khempeuh in Pasian deih lungtang paai ciat in ihih theih bangbang mapang khawm liailiai dih ni.
