Mipi mai ah siangtho, a guk a mawh nei:
(Saint in public, sinner in private)
Agelh~Khansuan T. Guite
“Phatna deih lo om lo hi” a kicih bangin mite’n i thu leh la te a hong gen teh i hoih lohna teng honggen uh sangin i hoihna khat leh nih hong gen uh ciangin nuam kisa zaw hi. Pasian muhna ah mi khempeuh mawh nei vive hi a, ahi zongin mihing te in mawhnei mi i hihna san ding hamsa kisa hi. Mawhna leh khialhna i bawl ciangin “mi mawh/ mi khial hi’ng” ci a sang (confess) ding sangin, “banghang a tua bang a gamta”, a hih kei leh kei ut man a gamta hi lo hi’ng ci’n ki hepkhiatna ding lampi i zong hamtang zaw hi. A hoihlo pen a gamta mi that a thonginn (jail) a om mi te nangawn in zong mawhna leh khialhna nei in mite muh ding ut lo uh ahih manin a gamtatna uh pan in a kisut zawhna dinguh paulap tuamtuam zongin na nial lai uh hi. Mawhna leh khialhna bawl mi khempeuh in paulap ding khat i zong hamtang thei hi. Hih pen mihing te lungsim puak zia khat hi a, mipi theih in mi dik leh mi hoih hih ding utna ahi hi.
Mihing khat’ nuntakna sungah i gamtatna khempeuh mite mai ah i pulak ngam loh gamtatna tampi tak om hi. A hoih leh i thupha bawlna tawmno khat te mite theih ding in i pulak ngam bangin, iguk gamtatna khempeuh mite theih ding in i pulak ngamloh leh pulak ding in a kilawm lo (mihing te ngaihsutna ah) tampi i nisim nuntakna ah i tuak den hi. Mi’ theih ding i deihloh gamtatna tampi nisim in i bawl manin tuate seel na ding mite mai ah a kilawm pen dinga i ngaihsut gamtatna tawh i gamta hi. Mipi muh in na hoih sem leng i guk gamtatna teng kisel thei ding i sa hi. Tua ahih manin mipi muhna ah na hoih khatpeuh i sem thei zel hi. A hoihlo a i gamtatna sa khempeuh a selcip zo dingin na dang khatpeuh i sem hi.
Mawhna leh khialhna i bawl khak ciangin mawh maina ngah kik na dingin mihing te in lampi tuamtuam i zang hi. Kawlmi te (a diakin Buddhism) in mawhna leh khialhna a neih uh ciangin tua mawhna gu leh gau (thaman) athuak kik nawnlohna ding un mipi muhna ah thupha khat bawl in kisiang sak uh hi. Pawlkhat te in Phongyi (Lu tol) te tenna tattung ah pai in mawhmaina ding in kisian suah uh hi. Tua bang abawl uh ciangin a mau leh a mau lungsim sianthona ngah kisa uh ahih manin mipi mai ah mawh neilo bangin ki koih kik thei uh hi.
A nungta Pasian um mite in mawhna leh khialhna i bawl khak ciangin siampi te (biakna pawlkhat ah) leh Pasian kiangah mawh suut in mawh maina i ngen hi. Tua bangin mawhna thaman ding gamtatna khatpeuh i neih ciangin a siangtho in i kikoih hi. (Hih thu pen upna tawh kisai hi a, tam i gen kei ding hi)
I gamtatna hoihlo te mipi te theih ding lau in mipi muhna ah a hoih gamtat kineih in i gamta hi. I gamtatna hoih lo te a kilang lo thei ding penin kampau in thu i gen hi. (Mipi te’n hong thei in hong mu kei peuh leh a guk in a hoihlo i gamtat hang in). Mipi te pen thukhen tute bangin koih in a hoihlo gamtatna khempeuh kidok kei peuh leh dik i tangsak hi. Mipi te’n zong a sungtawng dong enlo in, a puatham bek en i hih manin mihoih leh mihoihlo i tel khial thei tawntung hi. (A puatham etna bek tawh thugen pen man tawntung lo hi).
Mawhna leh khialhna i bawlte selna dingin vanzat tuamtuam i zang hi. Pawlkhat te in gamtatna sia khempeuh a khuh zo ding thupha bawl uh a, Pawlkhat te leuleu in Laisiangtho zang in Pasian min paulap uh a, pawlkhat te leuleu in tomkhat sung kampau hoih tawh thu i gen hi. Mi pawlkhat te in thupha a bawl uh ciangin mi hoih hi, ci’n sang pah ding zong hi lo a, Lai siangtho tawi a biakinn lam zuan khempeuh zong midik hi khin pah hetlo hi. Pasian thu leh thu hoih gen a om mi pawlkhat te in amau zuih ding leh zat ding thu sangin midang te zuih ding leh zat ding thu gen thei zaw lai uh hi.Gentehna khat ka zak ngei : Pastor khat nipi zingsang biak inn sungah thugen a, Thukham (10) sung lim a guk takna a hoih loh zia lim gen mahmah hi ci. Tua leh a zi zong inn ah ciah pah vingveng in zingsang a, a ak guk uh ak bawm sung pan na khah hiau. Tua leh Pastor pa inn a tunteh ak go ding in ki thawi a, a zi kiangah ak om na a dot leh a khah khitna thu gen hi. Pastor pa’n zong biakinn sunga ka thu gen te ei a ding a kigen hilo, mi a ding a ka gen hi cih san hi, ki ci hi. Tua bangdan in biakna sungah Lai Siangtho tawi in thuhoih thei na pi a zui lo Pasian na sem a kici mi pawl khat om thei mawk hi. Dah huai mahmah!
Ahih hangin mipi muhna ah a hoihlo leh mawhnei a hong kimuh ding pen i dah mahmah tek hi. Mipi mai ah a hoih pen hih ding i ut veve hi. Pasian nasem taktak Pastor te thugen khat ka phawk hi. Tua pen: A beisa a na gamtatna khempeuh uh limlahna (cinema) bangin a en kik ding hi le uh ci’n kua teng na en sak ngam uh diam? cih pen thugenna tom ahih hangin a kicing mahmah thu ahi hi. Gamtatna hoih leh thumanna pen mihing te nuntakna ah a kisam pha mahmah thu khat ahi hi. A nungta Pasian um mite hi in, biakna dang a bia mite hi ta leh ahoih gamtatna in lam zang zaw hamtang hi.
A tawpna ah mihing khempeuh pen mawhnei vive i hi hi. Ahi zongin Pasian in mawhna bawl ding leh a ma min a dai sak ding nasep sem dingin hong deih lo hi. I sepna zui a thu a piang pawl khat om a, na khempeuh Pasian sehsa hi khinlo hi. A hoih leh a hoihlo khentel theihna Pasian in mihing te hong pia khin zo hi.
