MEIGONG DIN MUN A HAKSATNA
Agelh ~ Rev. Job Thawngno
Meigong cih kammal limlim pen a hehpih huai, a khasiat huai, a langsam kammal, a pangpa kammal ahih mah bangin tanglai a kipan numeite in a pasalte uh si in a meigon’ ding uh pen a nak dah mahmah uh ahihi. Banghang hiam cih leh a pasal sihna sangin a nunga a nuntak zia ding teng uh a lungngaih uh teh nak dah lua in a kapkap uh ahihi. Tanglai-in meigong tagah cih pen na nak simmawh mahmah uh hi. Meigong limlim pen a min in sam nawn loin meigongnu ci-in na sam uh hi. A thugen a la gente zong na thusim hetlo uhhi. Zulim salim zong kipia nuam loin zuhawh sahawh zong kitan nuam khollo lai hi. Innsia losia khat om leh meigong tagah inn hi, meigong tagah inn tawh kibang ci-in na genteh se uh hi. Huangsung huangpua hah zolo, inn nin lonin pongpong pen meigong dinmun na hisak uh hi. Kah la 1:1-2
Tua banah tagahte pen na naksimmawh mahmah mawk uh hi. Tagah bilbing, tagah lubawk, tagah khuazalo, Nu hilhloh pa hilh loh, mihaite cih zah in paunak nangawn na koih uh a, mihing dinmun sangin a niam zaw dan in na tuat uh hi. Lawm leh gual kikholhna ah gual lel in, pampaihna leh nawlkhinna na thuak den uh hi. A gum ding omlo, a koh ding omlo ci-in na simmawh deuh uh hi.
Tua manin meigong nupite in a tate nuntakna ding, silh leh teen ding, sangkahna ding a kipan u leh nau sung kikawmna ding a tuamtuamte a lungngaih uh ciangin nak hamsat lua ding, nak thuak lua ding uh cih kimu khol ahih man un a pasalte sih ciangin nak dah mahmah uh hi. Tua mah bangin tanglai-in tagahte in tagah lote tate a batna ding hamsa mahmah takpi hi. Meigong khat kilim puah pian leh a khuaval hi, pasal deih kik hi, pasal zong nuam hi ci-in kigensia pah ngeeingaai lai hi. Khuasung nangawn ah vak ngam loin suakta hetlo uh hi. Lokhawh singpuakna ah zo lah leh meigong tagah lo hi bang mah hi, ci lai uh hi. Tua manin meigong leh tagah dinmun pen a hamsa lua mahmah ahihi. Pasal meigong leh zi nei kik pah a, “zi si hehnepna zi neih kikna hi” ci uh hi. Numei meigong pasal neih kik ding pen a haksa mahmah dinmun ahihi.
Source:
Meigongten Pasal mu ta! Tagahten Pa nei ta!
Laibu
Agelh ~ Rev. Job Thawngno
Laibu Saal / Zomi eLibrary
in hanciam in ki khenkik (type/typing) in hong ki suaksak ahi hi.
