Malaysia Ah Kum 10 Om ding Kisa Zen Leng
Agelh ~ Thang Zo Khai
Kei bang Malaysia katun zawh kum10 val, kum12 kiim bang pha khin hi. Kum10 val bang om ding kisa zen leng, ka gennop thulu 5 ong gualsuk ning.
Kagen Nop Thulu 5 Te:
1. Kipawlna ZRC card hing sak den ning.
2. Pawlpi lutna kician neih sawm ning.
3. Nasepna ah citak lawhcing sawm ning.
4. Off day ni, ah hih kei leh nasep nei lo a, ih om sungin, ih omna ih belhna, sanggamte ahi a, khuapihte ahizong, lawmte ahizong in, kagamlum mahmah hun tampi te, gamlum lo in, hoih tak in om sawm ning.
5. Ih makaite, pawlpi makai ahi a, biakna makai panmun nei limlim leh, ZRC committee makai sia/siamahte, lamkal khawngah ka kimuh vat leh, atam zong cingam keng niangtui man ding pek 1 pek 2 ciangciang pia ning. Banghang hiam cih leh, abeisa kum tampi sungah, kinlo donlo, ngaihsun lo, awlmawh lo a, ka om hunte tam mahmah hi.
1. Kipawl Na ZRC Card Hing Sak Den Ning
Bang hangin kipawlna ZRC card hing sak den ning, ci kahiam cihleh, Malaysia ka tuncil lai in, kei gelna leh ka ngaihsutna thu in, nasem ding senpi ding, innlam sum khak zel dingin, tua kawmkawm sumkhol ding, kum 2/3 sa’ng atamzaw omlo dingin, ciah pah ding ci-in ka ngaihsun kha ngei hi. Hih pen Malaysia katuncil lam in, kei mimal ngimna gelna leh ka ngaihsutna a hihi. Tua ka ngimnate leh kagelna ka ngaihsutnate, ka ngim kagel bangin, hong tangtung lo in, tua bang teng tawh omom in, na semsem in, kumte leh hunte ong pai toto hi. Tua ka ngimna ka sawmna kagelna bangin atangtung hi leh, Malaysia ah kum 2/3 om dingin, tua khit ciangin ciah pah ding, cih thu a hihi.
Tu a ih zumpite ahi, ih kipawlna card, ZRC cih te khawng zong, UN card lah hi kei e ci in, thupi ngaihsut se lo in ka om lel a, na sep senpi peuh leng, vaksuk vaktoh khawng kidawm in, sum khol kingkeng in, innlam ciah ziau ding, cih ka ngaihsut leh ka ngimna kagelna lian penpen a hihi.
Tua bang teng tawh hun hong pai toto in, kum 4/5 hong cing to ziau mawk hi. Kipawlna ZRC card cihte zong a gina mel bang mah tawi nei se lo in, katawi sunsun lah, tettaan bei cih khawng hi in, tettaan bei le zong, tettaan tuukik se lo in, kum 4/5 bang, tua bangin ka om om lel hi. Tua lai in, nasep lam ahih leh, ka senpi mahmah bilbel hi.
Tun ahih leh kum leh hunte zong hong pai toto in, tun kum10 bang hong cingto ta a, ken lah, awh! Tu ciang om lai ding kisa zen leng maw, ZRC committee card te, thupi sak in, hing sak den leng, UN neikhin ngelmah ding hiveng, UN nei khin bektham lo, gam thumna nangawn ah lengkhin ding khat kaive maw, ci in kei leh kei dotna kinei in kangaih sunsun thei zel hi. Tua ahih manin, kei nung a hong tung lawmte zong UN nei bek hi lo, gam thumna lam a lengleng khinzong pawl khat om khin zihziah hi.
2. Pawlpi Luutna Kician Neih Sawm Ning
Bang hangin, pawlpi luutna kician neih sawm ning ci kahiam cih leh, mihing ih hih manin, nopna dahna leh damlohna sihnate amai ngat vivete ih hihi. Nopna khat dahna khat peuh om leh Pawlpi kisam mahmah ahih lam katel phapha pan hi. Malaysia katun zawh kum 12 sungah, kum 4/5 kiim bang Pawlpi lutna mel neilo in ka om a, khualam hi ta leh hih Malaysia lam hi ta leh, nopna dahna khatpeuh om leh, hong nuampih hong dahpih ding Pawlpi mite akisap mahmah lam katel phapha hi. Nasep pih ih lawmte ahi a, ih meltheih lawmte ahi zongin, nopna khat dahna khat peuh atuak uh ciangin, a pawlpite in tutpih in noppih dahpih in a omnate kamuh ciangin Pawpi lutna kician neih ding thupi kasa mahmah hi. Tua ahih manin, hih tan om ding kisa zen leng Pawlpi lutna kician kanei ding hi.
3. Nasepna Ah Citak In Lawhcing Sawm Ning
Bang hangin nasepna ah citak in lawhcing sawm ning, ci kahiam cih leh, a citakte pen nasepna koikoi ah alawhcing tamzaw mawk uhhi. A citak mi khempeuh nasepna ah alawhcing kimloh hangin, a lawhcing sawmte citak in lawhcing takpi pah lel uh hi. Nakhat peuhpeuh ah lungkia pahpah lo in, citak tak in hanciam in, ngimna leh sawmna tupna kician tawh sem in lungkia kei peuh leng, damdam in ih ngimna ih sawmna ih tupnate, a tung zo ding ih hive maw! ci in kangaih sunsunzel hi.
Tangthu kazak ngei khat ah, mi khat in tuikhuk deihlua in leisung pi 30 bangto suk hi. Tui om tuanlo ahih manin lungkia thanem in om hi. A lawmte pawl khat in tua teng na tawh sangin hih mun to lecin tui om zaw ding hiveh aw ci hi. Tua ciangin atawhsa pi 30 tuikhuk to zom nawnlo in nusia a, alawmte cihna pi 30 va to leuleu hi. Tui om tuan lo ahih manin, eh! hih teng katawh sangin, hih pamkuak sung daamlak to zaw leng, ci in to kawikawi a, mun 3/4 atawh khit ciangin tuilah mutuan lo ahih manin mundang khat pi 30 mah to suk leuleu hi. Pi 30 atawh suk khit ciangin tui om tuanlo ahih manin, tua mun mah pi 10 khawng atawhsuk suak leh, tui om lian hi. Ka gennop in, na khat peuhpeuh ih sepna ah lungkia lo in citak takin hanciam leng lawhcinna leh gualzawhna kingah ding hi, cih ngaihsut khakna tawh nasepna ah citak in lawhcing sawm ning a ci ka hihi.
4. Off day ni, ah hih kei leh nasep nei lo a, ih om sungin, ih omna ih belhna, sanggamte ahi a, khuapihte ahizong, lawmte ahizong in, kagamlum mahmah hun tampi te, gamlum lo in, hoih tak in om sawm ning.
Bang hangin, Off day ni, ah hih kei leh nasep nei lo a, ih om sungin, ih omna ih belhna, sanggamte ahi a, khuapihte ahizong, lawmte ahizong in, kagamlum mahmah hun tampi te, gamlum lo in, hoih tak in om sawm ning, ci kahiam cih leh, Malaysia ah ka om, kum 12 sungah, kum 4 kiim bang, nasem zel senpi zel senpi lo zel in ka om a, ka senpi sunsun ciangin lah, offday kahawhna lawmte kiang zuu dawn in, om peek in, ka senpi loh ciangin kaciahna kabelhna ah, tuabang mah in zuu dawn in om peek in, tua bang a ka om gawpna hangin, amau aveng apam in mu dah uh a, amaulah keikiang hong gen ngamlo in, a sawtsawt ciangin keilekei a ka om dante leh ka gamtat dante, keilekei ka kitel a, Off day ni, ah hih kei leh nasep nei lo a, ih om sungin, ih omna ih belhna, sanggamte ahi a, khuapihte ahizong, lawmte ahizong in, kagamlum mahmah hun tampi te, gamlumlo in, hoih tak in om sawm ning, a ci ka hihi.
5. Ih makaite, pawlpi makai ahi a, biakna makai panmun nei limlim leh, ZRC committee makai sia/siamahte, lamkal khawngah ka kimuh vat leh, atam zong cingam keng niangtui man ding pek 1 pek 2 ciangciang pia ning. Banghang hiam cih leh, abeisa kum tampi sungah, kinlo donlo, ngaihsun lo, awlmawh lo a, ka om hunte tam mahmah hi.
Banghang in, ih makaite, pawlpi makai ahi a, biakna makai panmun nei limlim leh, ZRC committee makai sia/siamahte, lamkal khawngah ka kimuh vat leh, atam zong cingam keng niangtui man ding pek 1 pek 2 ciangciang pia ning. Banghang hiam cih leh, abeisa kum tampi sungah, kinlodonlo, ngaihsun lo, awlmawh lo a, ka om hunte tam mahmah hi, ci kahiam cih leh, ni dangin ka naseppihte khawng in, tua bangin makaite leh Sia te Lovegift khawng pia thei zel uhhi. Tuate’ nuntakna ka et ciang in, a lawmlegualte nuai ah omlo in, a lawmlegual sangin, cidam zaw in nasep zong senpi zaw pah lel uhhi. Boss hoih khawng tuak in a Boss te’ maipha leh itna khawng ngah deuh se uhhi. Siate leh makaite tungah thupha bawl zel pen hoih kasa mahmah a, Malaysia ah Kum 10 val ka om sungin, hih dan a nasemte ka eng a, kei zong mailam ah cidam in maban alem toh leh hih dan khawng a lunggulh mahmah khat ka hihi.
Malaysia Ah A Omlai Ding Te Leh Hongtung Thak Te A Ding Ka Gennop
Malaysia ah a omlai dingte leh hong tungthakte tungah ka gennop in, Kawlgam khuahun siatna tawh hongtung thak khang ih om hi. A thei zong om mah ni, thei a zui zo lo zong om kha mah ni, bangbang ahi zong, Malaysia pen kawl gam hilo cih ih theihsa ih telsa ahih manin, nu leh pa tawh om khawm nawn lo, hong thuhilh ding omlo, sianggen leng ei leh ei kisuak tasak lua kha in, nu leh pa tang’ a hong ding ding na sanggamte leh na u na naute uh, ahih kei leh, tanaute ahi zong, amaute thuhilhnate ngai in, hong deihsaknate zuihsiam sawm ding kisam mahmah hi.
Tulai khuahun pai dan tawh kizui in, akua mah tek, kitaitai in kithu hilhhilh, kideih sak luat cih khawng kua mah in kiza nuam nawnlo, aneu alian kei a kipan biakna thu ahi zong, innkuan sung thu a hi zongin, hong hilh hongtaaite, hong deihsak hi ci a, itna tawh telsiam a ih zuih siam ding kisam mahmah hi. Lawmlegual pen thupi mahmah a, lawmlegual tawh nopsak luat pen kipaikhial baih mahmah hi. Malaysia pen lawmlegual ding mitam mahmah hi. Chin tawh Zomi tawh Kawlmi tawh Rakhine cihte khawng ahizong, nasepna pan a kimu kilawmta, cikmah a kithei ngeilah hilo, ki maingap lel in, mi lungsim tel lopi, muanglua liang lo in, apaipaina ah zuizui, a giakgiakna ah giak cih khawng zong kidop mahmah ding kisam hi. Ih theih loh kal a zatui zangh a siatna tawh kidim zong mi tampi om ahih manin, tua dante ih tuak khakloh nadingin kidawm siamni, cih agen nuam ka hihi.
Nidang lai in lawmta mi 2, ki it mahmah ni, ih neek bang nekhawm ni, nasep ih khawl leh zong khawl khawm ni, kisih pih ngam ni, maw ci in kiciam uh hi. Tua leh, gam sung hong kuan khawm uh a, gam sung panin Vompi tawh kimu hi. Vompi in alawmpa khat bawh suk pah a, alawmpa in taisan in ciahsan vingveng hi. A galmual pan a et leh, alawmpa leh Vompi ki bawhbawhlai hi. Zawhngap nawn lo gim kisa lua ta ahih man in a si kineih hi. A si akineih leh Vompi in bangmah cih nawnlo in abil kiim khawng namnam lel in tua khit ciangin mual dawn lam zuan in Vompi paikhia hi. Tua khit ciangin amah tho to in innlam zuan in delzee in taipah vingveng hi. A lawmpa kiang atun ciangin alawmpa in, hong tung maw lawm, kei laulua kahih cianga natai vingveng ing ci ziau hi.
A den a Vompi in anap kawikawi pen agalmuh alawmpa in anam sa lo in athugen sa ahih manin dongkik a, lawm den a Vompi in bang thu hong gen ahia acih leh, na lawmpa lawm citakhikei, itna taktak nei kei, kithuah nawn ken hong ci, ci hi. Ka gennop in ahih leh, lawmlegual nei mah ni, haksatna taktak ih tuak hong thuakpih ngam ding lawm haksa hi. Lawhcing in ih nopsak laitak, ih neih laitak bek hong it lawm zong om thei hi. Tua dan a om mah bangin ih haksat hun in hong thuakpih, hong it takpi lawm zong om thei veve hi. Mite lungsimte tel phot in, a pawl’huaite pawl in apawl’huailote ih pelhsiam ding, cih a gen nuam ka hihi.
Malaysia ah bangtan om ding cih kigen theilo ahih manin, Malaysia na om sungin, hih anuai a teng thupisak mahmah in.
1. Kipawlna ZRC card hingsak den in, amakai sia/siamahte tawh kimai ngap inla ki contact den
in. (Kimat kihen haksatna khatpeuh tuak kha leng tampi phatuam noptuam hi)
2. Off day hi a, nasem lo ih hizong, ih ciahna ih belhnate ah, om dan siam in, siangtho tak in om den sawm in. (Mailam ah senpi lohna khatpeuh neileng zong, aciah dan nuam hi)
3. Biakna kipawlna, genvai te ahizong, pawllutna kician nei in, biakna bang ahih leh, amawk lut
hilo in, ih khasum pan 10/1 mah khia den zo leng hoihsa ing. (Nopna dahna khatpeuh tuaklo
ding kici theilo hi)
4. Nasepna ah, hunlap sawm den in, kiniam khiat in, nasep pihte makaite leh bosste, ahih theih
leh thu ummi khat ih hihna leh ki niamkhiatna tawh mai-et lel ni. (Nasep senpi ding khasum
pongman ih ngah nak leh, nasep pih milui leh gamdangmi leh makai leh bosste leh nasep pih
teng khempeuh tawh kilem in, thumang in, mai-et mai ni)
Kei mimal muhkhak theih khakna leh kisam kasak pawlkhat, thulu nambat 3 na tawh kizui in hih teng hong at ing. Ih biak Pasian in kum tampipi mipihte muanlesuan ZRC kumsawt cidam in, mipi a ding amuan huai semsem, alawhcing semsem minam kipawlna ahiding leh sawtpi akhoding in, Sian in thupha hongpia tahen.
Lungdam,
Laigelh: Thang Zo Khai
Fb: SianNu Pa Hing Ei
Email: zokhaicingneu.280@gmail.com
Ph: 01136681578
Lai-at uk mahmah khat kahihna tawh, hih kidemna ong vaihawm, ongbawl khia ZRC makai sia/siamah te tungah, athak in lungdam ong ko masa ing. Hih kidemna ah, thulu 4 ka et et ciangin, nambat 3 na, (Malaysia ah Kum10 om ding kisa zen leng) hih pen kei mimal leh kei dinmun leh keisin khak, kagen nop pawl khat om in, hih tawh kituaksa kahih man in, nambat 3 dotna pen, ong at nuam ing.
Source:
Zomi Refugee Committee
Page: https://www.facebook.com/ZomiRefugeeCommittee
ZOMI ZUMPI A HI ZRC 10 ANNIVERSARY LAIGELH KIDEMNA
Thulu - 4
1. Ka Khualzinna Malaysia
2. Malaysia Pan Zogam Phawkna
3. Malaysia Ah Kum10 Omding Kisa Zen Leng
4. Tuipi Gaala Teeng Hizen Leng
