MAKAI PIANGTHAK PIANDANG NA
Agelh~ Lian Muan Kim
Bang in piangthak makai khat piandang sak hiam, a pian zia limlim hiam, a ngaihsut zia hiam, a kampau zia hiam, a gamtat zia hiam, a mimal hihna mahmah hiam, a sep zia a bawl zia, a makaih zia mahmah hiam, cih thute kikup ding thupi kasa hi.
Makai sa-a Suak maw Suaka Makai
Mi pawlkhatte in makaite pen a suah lim ua makai siamsa-a suak hi, ci uh hi. Tua ahih manin piangthak makai ding khat zong a suah limin makaih theih na ding siamna neisa-a suak hi, ci uh hi. A cihzah khat un makaih siamna ngiat a nei mi pawlkhat om takpi hi. Makaih dan kihilh ngei takei leh a neulai ua kipan a kikholhpih peuhpeuhte' makai a suak zong mi pawlkhat om hi. Pawlkhatte leuleu lah tuabang hilo napi, makaih dan sinsinin makai siam hong suakthei uh hi. Tua hi-a makai sa-a suak omin suaka makai zong om hi. Tua ahih leh piangthak makai te e leh, hite tawh a kibang diam, a tuam pianna a om diam!
Piangthak makaihna taktak pen Khasiangtho letsong ahi hi. Zeisu Khazih i san ni, i pianthak ni-in Khasiangtho letsong a tawm pen khattek kingaha, tua letsong teng lakah makaihna letsong a ngahkha, mi pawlkhatte pen makai sa a, suak hi takei le uh tua letsong a punsak uh ciangin piangthak makai hong suak uh hi. Pawlkhatte leuleu lah makai sa ngiat a, suak bek thamlo-in makaihna Khasiangtho letsong zong ngahin pungsak uh ahih manin piangthak makai hoih taktak hong suak uh hi.
Khasiangtho letsong ngahlo makai sa-a suakte zong makaih siam mahmah uha, Pasian a dingin a zat ua leh Pasian in thupha piakbeh in, Pasian a ding a zat kei ua le lah Pasian minthanna piang tuanlo-a, khat veivei Pasian hehna peuh piangthei zawsop hi. Khasiangtho letsong ngah napi-a, a pungsak lo makaite ahih uh leh bel piangthak makai hoih suak ngeilo ding uha, makai hi na pi khantohna om lo-in, a zui ding mi tawm semsem ding hi. Tua ahih manin piangthak makai suah theih na dingin Khasiangtho letsong i ngah ding leh tua letsong punsak ding a thupi pen ahi hi.
Etkakna
Piangthak makai khat pen na dang tuamtuam hang hi masa lo-in Zeisu Khazih hang bekin piandang vilvel hi. Leitung lam makaite tawh a kibatna pawlkhat a om hang a huamin enkak lehang kilamdang mahmah hi. Bang taktak in kilamdang sak hiam cih leh piangthak makai khat in Makai (Zeisu) khat nei tawntunga, tua Makai Pa' deihna bek tawh kizui-in na sem hi. Leitung makai ahih leh ama mun ah amah a lian pen hi pah ahih manin thuneihna khempeuh ama aa ahi hi. Ama cihcih zuih loh phamawh a, nialtheih ding zong hilo hi.
Piangthak makai pen Pasian teel hi-a leitung makai pen mite' teel ahi hi. Davuih pen Pasian teel hi-a Sawlu pen mipite' teel ahi hi. Piangthak makai pen Pasian laptoh hi-a leitung makai pen mite' laptoh hi. Makai dang ding peuh a om loh hanga makai suakkhapak zong hi thei hi. Piangthak makai in Pasian a muan laitakin leitung makai pen amah le amah kimuang hi. Piangthak makai in Pasian le midangte thei-a leitung makai in midangte bek thei hi. Piangthak makai in Pasian deihna bang hiam cih kan masa-a, leitung makai pen ama deihna bekbekin gamta hi. Piangthak makai kiniamkhia-a, leitung makai kiphasak hi. Piangthak makai in Zeisu khekhap zui-a, leitung makai in lampi tuamtuam zongtawm hi. Piangthak makai in Pasian thu manga, leitung makai pen ama thu kimang den leh ut hi. Piangthak makai in Pasian le midangte it ahih manin piakkhiat ding hanciama, leitung makai in ngah nading bekbek ngaihsun hi. Piangthak makai pen Pasian tungah kinga tawntunga, leitung makai in ama tha bek muang hi. Pasian in piangthak makai a nusiat ngeiloh laitakin leitung makai pen amah kiabek omin kuamah’n dinpih lo thei hi.
Piangthak makai hoih khat in thumaanna, itna le diktatna nei-a leitung makai ahih leh tuate a nei ding kikhaat mahmah hi. Piangthak makai in Zeisu mah mitsuan gige a, gamtat hoihin a gamtat laitakin leitung makai tampi takte in pumpi kikhaal zolo, sum le paai deih lua, a inn kuanpihte zong don manlo-in om thei uh hi. Piangthak makai in Pasian deih bangin mite makaiha, leitung makai in ama deihna bang in makaih hi. Piangthak makai in a tupna a tun na dingin Khasiangtho thabek muanga, leitung makai in ama tha le a nungzuite' tha muang hi. Piangthak makai in Khasiangtho nasep na hang tawh mite thuzawh sawma, leitung makai ahih leh ama hanciamna tawh mite thuzawh sawm hi. Piangthak makai in ma kaihna pen mite' nasem ahih na phawka, leitung makai in mite ama nasem ding bekin tuat hi. Gengen le hang hong bei thei paklo ding ahih manin a tawp nading khat bek gen lai ni. Piangthak makai in Pasian' minthan nading bek tup in nei-a, leitung makai in ama minthan nading bek gelgel hi.
Tua ahih manin piangthak makai khat in a ma Makai Pa thei-a, piallo hoilo-in a nung a zuih tawntung ding kisam hi. Piangthak pipi leitung makaite’ makaih zia bangin a makaih sawm leh a hoih ding tawh a kibat hang hoih tuanlo ding hi. Banghang hiam cih leh piangthak khempeuhte makai lian pen suak ngeilo hi. Makai Pa nungzuihna ah midangte hoih taka a tonpihte bek makai hoih a suak hi. Tua banah, piangthaklo makai khat in zong piangthak makai khat bangin a makaih nop hangin a piang thei ngei ding hilo hi. Banghang hiam cih leh amah’n Makai Zeisu nung zuilo hi.
Khat veivei piangthak makai hihna pen baih mahmah le kilawm hi. Banghang hiam cih leh amah pen ama tuute ih makai hilo-a, a Makai Pa' tuute a makaih ahih manin haksatna khat peuhpeuh a tuah ciangin ama a ding lungkham kul selo hi. Puakzawhloh ding van hong kisuan ngeilo dinga a gik peuhpeuh Zeisu tung kisuansawn mengmeng theilai hi. A patauh huai khat zong omlo-in kilungmuang tawntung thei hi. Leitung makaite ahih uh leh bel a sia a pha khempeuh, amau lutung tu ahih manin vangik lelin puk thei uh hi. Langpanna khat peuhpeuh om leh patauh huai-in lungmuanna omlo hi.
Source:
Makaih Pilna – Laibu
Lian Muan Kim
Laibu Saal / Zomi eLibrary
