Makai Mi Masate Mangngilh Ngei Kei Ni
Agelh ~ Awn Za Pau
Thupatna
I gen i kikup ding thu pen Tedim Baptist Church – Yangon kiphut zawh kum (25) cinna mikang pau in Silver Jubilee thu a gen ding i hihi. Tu tung pen Tin Jubilee i bawl khit ciangin anih veina Jubilee kibawlna hi a, laibu khat bawl ding kivaihawm akicih ciangin kei zong ka lungsim sungah hong phu vinven khat om den ahih manin ka suahkhiat lohin ka lungnuam thei mahmah lo hi.
Mun dangah kum hi tanta ka om khitzawh hangin i TBC-Y pen i pumpi tawh sawtveipi kigamla mahmah hi ta se leh lungsim sungah hong teng den hi. Tua ahih mah bangin TBC-Y kum 25 Cinna thu kidotnate ah i Siapipa Rev Dr Enno leh Church Senior Pastor Sia Paupute in dawnna hong nei ciat uh a, a tawp dong mah ka na ngai khikhe hi. Api ni-in Dr Lian (Rev Dr Thang Cin Lian GS, MBC) in Jubilee Message hong nei leuleu a tua zong a tawp dong mah ka na ngai hi.
Thupulaakna
Thu kigen khempeuh thu hoih vive hi a, ko a ngai a za khate a’ding in zong pilna kilamthakna tawsawnna tampi mah ka na ngah lawh uh a, Pasian upna leh muanna lam ah hong thahatsak lawh tuam semsem hi. MBC GSpa Sya Lian in zong i Siapipa thu gensate leh Adoniram Judson Jr ii missionary nasepnate mah bulphuhin thugil thu manpha vive mah hong gen phapha a, kilunglut tekin zaknop zong kisa mahmah hi.
Ahi zongin TBC – Y hong piankhiatna leh kiphutkhiatna tawh kisai gen dia kilawm penpen hi tazuk, tawmcik ahiauhau khat beek kipulaak ding gengen loh a muinam khat mahmah zong kiza kha lo hi. Sepna om lo van laizang pan hong kia suk tawm bang keek khatin Pasian bawl Pasian deihna om bang a piang hi hongci suk ziauziau lel mawk uh a, mihing lam pan mapanna hong pulaakkhia peuhmah lo uhhi. MBC GS Sya Lian inh Pa Zamte nupa min hong lawh kiau khak pak cih loh buang, i Leikha Mangpi ahi hong nusiasa Pu Thawng Kho Zam akipan a pawlte thu tawm khat beek hong pulaak kha tei ta um ka cih leh khatvei talek zong pulaakna nei lo in akiciamsa bang liangin hong sip dide tuak mawk uhhi.
Makai mi masa diak a i ciapteh leh i vawh mimal 7te lakah i Siapipa leh Pa Khaat (Pa Kam Khua Khaat) tawh amau gel bek in hong dampih lai bek uh a, a dangteng bel Pa Khup Khan Dal lo buang i biakinnpi zong mu man lo liang a, hong nusia khin vive uh hi ta khong uhhi. TBC-Y piankhiatna tawh kisai khempeuh atom kimin December kha 2007 a kithoh Tedim Baptist Church -Yangon, Tin Jubilee Magazine page 6 to 18 dongah Siamtepa’(Rev Ngul Cin Thang) in na gelh hi.
Athu i sim ciangin biakinn a tuam a neihna dingin, biakna nasem sia khat peuh in mission(assignment) nasep dan a hong vaihawm tawm masak peuhmah hi lo hi. I biakna leh minam a’ding a deihsak leh a it mahmah thu um upate makaihna tawh hong piang khia ahih lam anuai a bangin hong kilanghkhia ding hi.Tua hun lai in akuamah peuhmah in biakna nasep sem nuam lo zaw tek uhhi. Misionary nasep ding vai peuhmah zong a tam zaw in ngaihsut in zong kinei thei nai lo lai meek ding hi. Hih munah RZBC Senior Pastor Sia J Zel Khua Suan leh Assistant Pastor Sia Cin Sian Paute gel in galkap pan tawpin biakna lamah akipiakkhiat zawh himhim uh pen zahtaakna lianpi ka pia hi.
Rangoon Zomi Baptist Fellowship (RANZOBF) kici min tawh 1959 kum January kha pekpek in kiphut a, Zomi (Chin) kici Tapidawte U Naw Baptist Church panghbeel in kikhawm uhhi. Tua zawh kum kua a sawt ciangin (1968) Rangoon Zomi Baptist Church ci in puahpha leuleu uhhi. Ahi zongin kum 1980 zawh ciangin biakinn tuam neih ding mah lungulhna kinei thei panpan tei napi, a madawk kician om thei vat lo ahih manin a lunggulhna uh nau paai in na paai niloh uhhi. Kum 1996 December kha bei ciangdong nau suak thei lo in U Naw Baptist Church panghbeel in kikhawm niloh uhhi. Mundangah biakinn tuam neih ding kilunggulh tekin kigengen ta leh taksuah zo mahmah nai lo hi.
1997 January kha hong tun ngawngaw ciangin, Tedim gam uksung Laibung khua pan Pa Thawng Kho Zam inh Yangon Zomi Baptist Church ah President sep hong kipan hi. A mah’n hong sep tak ciangin biakinn tuam neih ding lunggulhna thu gengen thapaiina bek tawh mapang lo in, ataksuah takin sep leh geel thuah in hong kalsuanpih hi. Ama makaih siamna leh khentat siamna banah veina kineih tekna hang tawh kha 6 sungin gualzawhna a ngah i hihi. A taktak Sia Suan inh i paipaina ah hong zui nuam hi leh pawlpi min zong kikheel masa themthum tadihdih masa het lo ding hi. Tua ahih mah bangin, a lehlam in Sia Suan zong TBC-Y phut masa khat mah cih theih zanzan ding keek khat ahihi.
President Pa Thawng Kho Zam makaihna tawh TBC – Y akiphut ding thukimna a om khit ciangin YZBC ah Assistant Pastor a sem leltak Sia Cin Sian Pau lah kihopih ngam pah lo a, Pastor thak a sem ding kizong leuleu hi. Tua kawmkalah Pastor sem ngei sasa leh pilna kicing a nei mahmah Tedim SHS ah sangkahpi neu lawm it mahmah ahi, i deih penpen Dr Simon Pau Khan En Yangon ah a om laitak tawh kituak kha zenzen ahih manin, amah i ngah theih khak pen Pasian Thupha taktak mah ahihi.
Ahi zongin tua hun sung tengin i Senior Pastor Sia Enno lah MBC ah GS hong sep khitteh MIT ah hunbit in nha sem suaksuak a, Assistant Pastor ahi, aki nungsap kik Sia Paupu lah pawlpi upate deihsakna mah tawh MIT ah M Div kah lailai hi. Kop leh kai thuah tuak vive uh ahih manin nipi ni sunsun cih loh buang pawlpi upate vaihawmna peuhah hong kihelthei khollo uhhi.
Biakinn mun leh mual ngahna ding a kipan i pawlpi vaii khempeuh ah pawlpi makai Pa Zam (Lunnopa) leh upa a om thei teng in ama makaihna leh lamlahna vive mah tawh akigamta ahihi. Tua hun lai a, Secretary (Thuzeekpi) a sem Pa Khup Khan Dal, Assistant Secretary Pa Kam Khaw Khaat, Accountant Tg Sian Khaw Paute in zong khasum pya khat zong sang lopi thasial hetlo takin asun azanin ma hong pang den uhhi. Biakinn kikhopna dingin Telegu te biakinn i zatzat kim lai na-ngawn in zong kim leh pam holhtuahna tuamtuam hang tawh innteekte in a biakinn i sut ding lau in kibuai mahmah man hi. Tua vaii in athu saipi Methodist Church Pastor Saya Mawi-a nadong takin phak lohna na nei lo uhhi. Biakinn khuhnate leh a ceilingte akulkulna ah kilaihsak zawh ciangin nuamtakin kikhopna a nei thei kik pan i hihi. Yangon khuasungah Green Land ngah theihna dingin a nupa in S-2 Tin Oo inn nadong a na pha man ngei uh ahihi. Tua hi a, pawlpi nasep khempeuh pen ama company nasep banah hunbit mahin ana semsem tangtang mah ahihi.
Presidentpa pen Tedim State High Scool ah tan 8 lai ka sangkahpih mah uh hi a, Fulbright Teacher Herbert Wehrly in Tedim, Falam, Thuklai High School teng Manglai tawh ‘essay’ gelh hong kidemsak lai in akhatna a ngah khat ahihi. Cihnopna ah a neu akipanin Manglai siamin a thu thei a thu mu mahmah khat ahihi.
Anuai a bangin gamsung gampua ah nha na sem ngei kawikawi a, Zomi sungah a madawk masa pen khat mah ahihi.
(1) 1964-1978 dong Galkap sem
(2) 1970-74 dong Military Naval & Air Attached Office, Tokyo, Japan Myanmar Embassy zumte tawh kithuah a nha a sem khawm ngei khat hi
(3) 1985-1988 dong Township Peaople’s Council (Inspection) ah member
(4) 1991- 1994 Administration Officer, IDEMITSU, Japan Company, Yangon
(5) 1995-2004 dong Human Resource and Administration Manager UMW, SDN, BHD (Malaysia Branch) Yangon, Laibung Middle School ah Sang Siapi, Tedim Soldier Board ah Assistant Secretary, cih akipan Township Co-operative Society khawngah zong LDC, UDC, BC cih khawng sem kawikawi ahih manin muhna theihnate zong tangzai mahmah hi. Zum lai at dan leh zum pai zia zong na thei kawikawi hi. Tedim ah TPC(Inspection member) a sep lai in Thangmualvum (Kennedy Peak) ah TV tower kiphut hun tawh kituak a, amah zong kihel in, Laibung khua-ah khuaphelep mei ngah lawhsak lai hi. Zomi lakah gamdang companyte tawh nasem masa dollar sang masa khat zong ahihi.
Galkap ahi a civil lam ahi zongin ulian uneu kitheihpih na hau in a munmunah na tualtel kawikawi hi. Mi khat peuh tawh kizop kitheih kilawmtat theih ding zong ama pianpih akivakna mahmah khat ahihi. MBC mahmah zongah ‘Fund Raising Committee’ danin member khat in na kihelkha thei lailai ahih manin na teektang thei mahmah veve kawikawi hi.
Dam lo pipi mah in mual hong liamsan dong mah amah’n biakinn tawh kisai khempeuh a kul bangbangin dai na na nawk masa pahpah a, ama lamsialsa vive mah tawnin akinungzui lingling bek mah ahihi. Pawlpi upate lakah a seppih phadiak Pa Khup Khan Dal, Pa Kam Khaw Khaat leh Tg Sian Khaw Paute lah galkap Sgt clerk lui vive ahih manun nasep zong hanciamin a sun a zan ci lo in akisam bangbangin sem tangtang ngiat uhhi.
Hun hong paipai a Pasian inh hong thukimpih in abanbanin thupha hong luangsak toto a Zangkong khuapi huam Sanchaung khuasung laizangpi a om Green Land kici Karen tapidaw(Home Mission)te neihsa leitang tung tektek mahah a mun kingah hi. Hong piakhia Karen vaiipuak neite tungah i lungdam mahmah hi.
Biakinn Lam Theih Nang’ Sani Sim Thungen
Biakinn lamtheihna ding phalna thu pen ei ngaihsut hong bang hetlo in ei deihhun ei gitneih hunin hongtung thei peuhmah lo hi. Mihingte ngaihsutna lam pan cihna ding lampi a omloh ciangin, ih Topa Pasian in hihlah neilo ahihteh thungetna mah tawh mapang ding ci in, sani ni zingsang nai 8:00AM pan 9:00AM sialin TBC-Y biakinn ah kinei hi. Kitatsat lo a, thu ngetnate zong tawh maa kipang tangtang hi.
Tua bang kimlai mah tawh kumnih bang hong cingta a, phalna ki-ngah tuan pah zok hetlo hi. Hih lam ka khualzin ma diakin TBC-Y siate leh upate (EC)te thu kimna mah pansan in, Building Committee Chairman, Upa Kapno (Pa Kap Khen Pau) tawh lampi tuamtuam zongin biak inn lam theihna ding phalna (permit) ngah nang ka hanciam kawikawi uh hangin bangmah kilamdanna om tuan lo hi.
Pasian in Thu Ngetna Hong Dawng
Ahi zongin Pasian lamlahna mah ahi “ Ama Gam leh Ama Dikna Zong Masa In” acih tawh kizui in Pasian lah kinuak ngam sam lo, hamsiat samsiat ding lah Pasian deihna hi lo zaw ahih manin, thusia lam peuhmah kisawm ngam peuhmah sap lo hi. A sawtsawtteh kilungkia in Pasian a nuaknuam zong ki-omta mai hi. Hih bang a hong deihsak lo gambup makaite thupha piakpiak ding sangsik in Pasian min tawh hamsiatna sam siatna pia zaw ni zong aci pawl khat ki-om maita hi.
Ahih hangin hong pia thei gam makaite thupha mah pia kawmkawmin thu akingetnget tangtang takciangin, i upmawh hethet lohna ih phawk khak hethet lohna pan Pasian in pawlpi mi pawlpi upa Bo Pau (Cpt Neng Lian Pau) mah hong zangin phalna a ki-ngah pen kei aituam ding bangkhat mahin ngaihsun in Pasian phat lo in ka om thei kei hi. Ka kan thuahthuah ciangin Dr Kap Thang hong panpihna huhau in a zawi a lampi ding hong kihong hithit cih zong ka thei thuah hi.
Kei zakna dan tawh akibat leh, Tainghmu pa’ Yangon Command - Commander Genaral Win Myint – kiangah biakinn lam theihna phalna piak ding vaii a gen piatpiat leh nang tawh kisai bek gen in! nang tawh kisai bek hong huh thei ding hing.., ci napi’n ta tuan mang tuan mahmah lo in, ih mipih ih sapihte a’ ding mah a khualna in duai piatpuat a, a ngak tentan takteh, hih bang thu hoih la hoih hong piangpan ahihi.. ci in akigen sawnsawn ka thei hi. Tua hi a, pawlpi upa a sem laitak ahi a, a hi kei zongin, Bo Neng Lian Pau pen pawlpi tangthu sungah Pasian hong zatsak Hero khat in ciapteh huai mahmah kasa hi. (Source: 2017 kum a kihawmkhia ‘Ka Pian Sinthu Vol I’ page 690 – 691)
Leitang ngah zawh ciangin lam theihna ding phalna kingen leuleu hi. Biakinn lam theih nang phalna 2005 kum kipat lamin ngetna lai kiphah a, atung a kigelhsa om bangmahin, 28/7/ 2009 ni ciangin phalna kingah pan hi. 2013 kum July 7, ni in corner stone cianna kinei thei pan leuleu hi. Galkap kumpi uksung hi a, i pawlpi sung a galkap lui teng mah in nha hong sep ciangin vaii khempeuh ahong lem toto na hi gige mawk veh e ka ci simsim hi.
Thu Khupna:
Yangon khuapi khua laizangah dawl li a pha biakinn gol mahmahpi khat i dinsak zawhna pen, TBC-Y pawlpi mite tha leh ngal sum leh paaite hanciam zawhna bek tawh hong piangkhia hi peuhmah lo hi. Pasian thu-um thuzui Christian akuamah peuh hong panpihna tek banah, a diakdiakin gamsung gampua a om Ciimnuai Zomite akuamah peuh in deihsakna leh veina tawh hong panpih ciat tekna uh hangin hi ciang akitung thei ahihi. Tua hi a, i TBC-Y biakinnpi in Ciimnuai Zomite kithutuak a lom khat a i om vilvelna alak i mualsuang lianpi khat ahihi.
Pasian in na asep ciangin mihingte mah zangin hong sem hi. A teel mite muk leh kam lungsim ngaihsutna leh khut leh khe mah zangin sep khiatna hong nei hi. Tua mah bangin ama kiangah lungdam koh kik ding zong diksa hi. Vangam i tun ciangin leitung a i Pasian a’ding a i sep i bawl ikipiakkhiatna tawh kituakin pah tawina hong kipia lai ding cih zong Laisiangtho in na gen hi. Tua dung zui in a khangtosa leitung gam tuamtuamah zong aituam gualzawhna banah, adiakdiakin tangpitangta a’ding a kipiakkhiatna gualzawhnate kipah tawi in lubawk kiguan tangtang ngiat uh hi.
Tu laitak a TBC-Y pawlpi upa vaiipuak neite in, TBC – Y hong piankhiat ni pan kipan tuni ciangdong i pawlpi sep leh bawl leh khantoh ziate a banbanin kicing takin hong pulaak ding ahih manin, ka sim ding kal bang ka na ngahlah liang hi. Banghang hiam cih leh kum 25 kum sung sepkhiatnate hi a, missionary nasepna akipan kiu a tuamtuam pan tampi takin kikhangto mahmah ding cih ka lamen hi.
Tua hi a, i tu i tate khang dongin a etteh taak, ciinh taak, leh zuih taak i suah theihna dingin i sep zawh i bawlzawhte zong thu maan thutang taktak mah tawh kicingtak a pulaak ding kisam kasa hi. I pawlpi sungah pahtawi taakte pahtawi in a sem a bawl taktak i makai i mi masate mangngilh bawllo in i phawk i gen kikkik ding mah veina lianpi tawh hih thuluii hong gelhkhia ka hihi.
