MAKAI LEH KIZOPNA
Agelh ~ Lian Muan Kim
Makaihna icih pen makai pa leh a nungzuite kizopna ahi hi. Tua kizopna om kei leh makaihna piang thei lo a, zong a mawkna suak ahih manin kizopna, kikholhkhopna a thupina i telsiam ding kisam hi.
Kikholhkhopna tawh Kizopna
Galphual ah Napoleon hong om peuh leh galkap tul sawmli tawh a omkhawm bangin ka kingaihsun hi, ci-in a galkap mang khat in gen ngei hi. I muan i suan khat tawh i omkhop a, ma i pankhop pen nuam ngeungau hi. Kilau nawn lo in kikhamuang mahmah hi. I nun zia leh i khuasak zia hong nuam pah a, haksa ta leh ma kinawt nuam veve hi. Ka neulai in kaci a nat ciangin zatui ka kisun zel hi. Siavuan pa a muanglo hilo na pi ing in ka kiangah ka pa a om mateng zatui ka kisun ngam kei a, ahi zongin ka kiangah ka pa hong om peuh leh ka lau nawn vetkei hi. I muan khat ih hong kikholhkhop pihna in na khat peuhpeuh hih ngamna lungsim hong guan hi.
Nungzui nautangte a khamuan theih na ding un amau tawh kikhawlkhawm a, kizopna a nei makai kisam hi. Reagan a khualzinna pan White House ah a ciahkik sim in a nasep pihte in: I pa hong ciah ta, ci-in dawn den uh hi. A nasep pihte tawh innkuan khat banga kikhawl uh ahih lam kiphawk thei pah hi. Nautang pawlkhatte bel a makaite uh tawh a kimuh uh ciangin lauthawng uh a, zahtakna sangin kihtatna tawh ai mitdeh bang thei uh hi. Makai pa’ lungsim takpi zong theilo uh a, makai pa’n zong amau lungsim theihpih lo hi. Banghang hiam cih leh kikholh khopna tawh kizopna tawm lua ahih man hi.
Vaikuanna, na sepna, innvai lovai le pawlpi vai khat peuhpeuh ah makai om kei leh nungzuite kipangpa in kipalang thei hi. Kikhamuang hetlo a, zong kimeidawi, kinehno in kipatau baih zaw hi. Khensat ding khat peuh ahi zongin gel ding khat peuh ahi zongin kinei ngam lo hi. Tua hi-a, makai khat in a mite makaih a, a mite tawh hun la-in a kikholhpih ding thupi hi. Ci le sa kizopna thupina phawksiam a, nungzuite a dingin sum le paai, thu le la bek hilo in a pumpi le a hun mahmah a piakkhiat theih ding zong kisam hi.
Makai khat pen a mite tawh lungsim kikhat in khut kilen a, na a sepkhop theih ma teng makai gualzo suak zolo ding hi. A mite lungsim a zawh mateng a pumpi uh zolo dinga, a lungsim uh zo khinphot le lah a pumpi uh zawhsa ahih manin a makaihna na ah a mite in zuiding uh a, zong tawsawn den ding uh hi.
Ahi zongin tua banga a tawsawn ding mi a neih theih na dingin kikholhkhopna tawh kizopna kisam hi. Hih kizopna omlo pi in mi lungsim kizo lo dinga, mi lungsim zo lo pi-in a khut a khe uh lawptakin kigamtang sak thei lo ding hi.
Nungzuite zawh theih na dingin amau tawh kikholh khop kul a, kilawmtat kul hi. Kimuh kul a, kiho kul hi. Tuucing pa aaw a tuute’n a theih mah bangin makai pa aaw zong nungzuite’n a theih uh kul hi. Innsung innpua ahi zongin gamsung gampua ahi zongin koimun koimun ah hita leh makai pa aaw pen nungzuite’n a theih lianlian ding uh kisam hi. Midangte aaw tawh khen thei sinsen zah donga kinaina a om ding thupi hi.
Tua ban-ah, lungsim kitheih kul a, thahatna le thanemna zong kitheih kul hi. Kikholhkhopna tawh kizopna omlo pi-in khat le khat ki-itna zong om theilo a, a ki-it sate na ngawn zong damdam in a ki-itna uh kiam thei hi. Tua hi-a, makai khat in a mite tawh kizom a, a vaan kul hi. Mipi tawh kizop kul a, mimal mahmah tawh zong kizop kul hi. Nopna dahna ah a phak kul a, natna satna ah a veh kul hi. A min a puam uh theih kul a, a nuntak zia uh le a tangthu uh zong theih ding kilawm hi. A gualzawhna uh lungdam pih kul a, a guallelhna uh zong puakpih kul hi. A tupna a ngimna uh theihpih kul a, thu ngetsak kul hi. A uuk uh theihpih kul a, a uuk loh uh zong theihpih huai hi. Kikholhkhopna tawh kizopna a om ciang bek in makai khat in a mite it semsem a, a mite’n zong amah it semsem uh hi. Makai a it takpi mi-in a pumpi leh a neihsa tawh tua makai pa zui hi.
Thu le La tawh Kizopna
Makai khat in gamlapi-a om a nungzuite a kepcing theih veve nading leh kha-an a muap theih na dingin laikhak a hanciam mahmah ding kisam hi. Lai kikhakna in khat le khat kizopna, ki-itna le kiveina khangsak a, laikhak pa/nu ih lungsim sunga om khat peuh zong kisimkhia thei sak hi.
Tua ahih manin makai khat in laikhak nading hun a lak ding thupi hi. Hun ngah ciang beka gelh ding hilo zaw a, seploh phamawh khat banga ngaihsut ding hi zaw hi. Laikhak atna hanga a bei hun in hun mawkbei hilo hi.
Makai hoih ahi Pawlu ih lungsim puakzia (Kawlentu nihna 2:4; 7:8-9), thuhilh zia, a cihtak zia, a tuamtuamte pen nadangdangte sangin a ma laikhaknate panin kimu thei zaw hi. Laikhak hat mahmah ahih manin Pawlu laikhakte' a kici Laisiangtho bu 13 bang om hi. Lai kikhak ngei lak ah a saupen pawl ding leh a thukpen dingin ka um hi. Tua ban-ah, i upna paizia tuamtuamte ahi zongin, i Tapidaw kalsuan dan tuamtuamte ahi zongin a tamzaw pen Pawlu laikhatte' sungpan a kibulphuh ahi hi.
Alexander the Great a ki-itna leh thupi a kisak mahmahna khat in laikhak a hahkatna ahi hi. A lawm a gualte leh a nasep pihte laikhak tangtanga a kisapnate khawng uh a dot khit ciangin a huh theih zahzah in huh in panpih hi. A omkhop loh uh hangin a omkhawm zahphial in a nungzuite'n ngaihsun thei uh hi.
Thugen minthang Spurgeon in kalkhat sungin laikhak 500 ta bang at hamtang hi ci-in kigelh hi. George Whitefield in zong mipi 20,000 val mai ah thu a gen khit sim in laikhak at in zansawt pipi tu thei hi. Piangthakcilte a picin semsem nading uh ahi zongin, piangthak sate zong khalam ah a zungkhak semsem theih nading uh ahi zongin laikhakna tawh nakpi takin hanciam pih hi.
I gensa mah bangin William Carey in India gamah kum 40 val sung tawntung England ciahkik het lo-a, na a sep zawhna leh a lungkiat hetlohna hang bulpi khat in England gama om a khe hoihlo a sanggamnu' laikhak tangtang na hang ahi hi.
Leitung gam tuamtuamte tawh tehkak le hang Kawlgam ah lailu lai-ip kiman mahmah ahih manin makaite in laikhak hanciam ding kisam hi. Tha dah hetlo, thasial hetlo-a pawlpi mite, naseppihte leh i makaih ngeite' kiangah laikhak tangtang ding zong thupi mahmah hi. Lai na khak ngeikei-a na hopih tangtang kei-a leh na mite a khahsuahsuah nahi hi. Mipi kizop theihna email leh telephone ahi zongin a dang tuamtuamte lem mahmahta ahih manin laikhak tangin tuate i zat theihna mun ah zong i zat ding thupi hi. Laikhak/hopih tangtang ding bek zong hilo-a hong kihopih nate leh lai hong kikhakte zong hoihtak in i thuhkik tangtang ding thupi hi. Laikhak kithuhkik lohna in kithupi sim lohna hi-a hong thupi sim lo makaite kizuizui nuam lo hi.
Hih thu le la tawh kizopna pen laileng i khah ciangin setkhau neu cieuciau vawh a, i khahkhiat tawh kibang hi. Laileng lenna sangin gamlapi tung ta leh khau tawh zom ihih manin ei kiang mah hong tung kikkik lel hi. Ahi zongin a khau kitat leh ei kiang hong tung nawn lo-a, kua ma om loh na gamlak peuh, mi huansung peuh ah na tu in ei-a hi nawnlo thei hi.
Source:
Makaih Pilna – Laibu
Laibu Saal / Zomi eLibrary
