MARY TUAMTUAM TE THU
Lai Siangtho thak sungah Mary min nei numei 6 ki mu thei hi.
Jesu gumpa hong pianna Mary (Matt 2:11; Sawl 1:14)
Magdelene khua mi Mary (Luke 8:13)
Bethany khua mi Mary (Martha leh Lazarus sanggam nu) (John 11:20,31)
Klopas zi Mary (Johan 19:25)
Jerusalem khuami, John Mark’ nu Mary (Kolose 4:10)
Rom khua pawlpi ah om Mary (Rom 16:6)
Hih 6 teng lak ah numei 4 teng khia in i en ding hi. A dangte thupi lo cihna hilo in, hih 4 te thu ki tam theihzaw cih na ahi hi.
MAGDALEN KHUA MI MARY
A Sung Pan Dawi Sagih
Akihawl khiatsak khitciang
Jesu azui Numei; Jesu Thawhkik A Thei Masa
Lu 8:2-3; Mt 27:55; Mk 15:41, 16:19; Lk 23:55; John 20
Hong Pianna
Hih i gen ding Mary pen Tiberias (Galilee) tuili kiangah om Megdalene khua mi ahi hi. Magdalene pan cih ciangin a dang Mary te tawh kikhen theih na ding agen ahi hi.
Abeisa kum zalom guk (6th century) lai in Pope Gregory in, hih nu pen a thangtat, kizuak numei, tua khit ciangin a mawhna kisikkik hi, ci hi. Catholic pawlpi in hih ngaihsutzia aman lohna anung ciangin phawk a,1969 kum in khel kik pan hi.
Nungzui suahna
Magdalene khua mi Mary’ tangthu hong dawk masakna Luke 8:1-3 ah; Jesu khuakhat khit khuakhat pai kawikawi a, lungdamna thu ahilh hi; Anung zui 12 te in zong a zui uh hi; A sungpan dawi aki hawl khiat sak numei pawlkhat in zong zui a, tua te lakah, dawi sagih aki hawlkhiatna numei Madalene khuami Mary zong a om hi. Hih numei te amau leh amau kivak tawm in Jesu nungzui ci-in kigen hi. Hih Mary pen Jesu Bethany a hawh lai a, Pharisai pa inn ah pak namtui thawl su kham a, Jesu khe sathau anilh nu hi ding cih pawlkhat ten um hi. Ahi zongin tua nu ahih lohna tel tak in kimu hi.
A sungpan dawi sagih a ki hawlkhiat khit a ki pan numei pawl khat tawh amau leh amau kivak in Jesu nung azui uh hi. Jesu nungzuihna ah zong a laizang khawngah laklawh khawl lo in atawp dong in azui uh hi.
Maka 15:40; Jesu a kikhai lai in numei pawlkhat ten zong a gal et hi. Tuate lak ah Mary Magadalene zong om hi, kici hi. Luk23:55 na ah, Jesu a kivui na mun Joseph in a geel sakna mun dong vazui a, a luang tungah theh ding paknamtui zong bawl uh hi, cih gen hi.
Jesu thawhkikna ah- Thawhkikni zing sang in Jesu han ah a pai masa penpen hih Mary ahi hi, ci-in Marka in na gen hi (Mk 16:9). Nungzui te lak-ah Jesu thawhkik athei masa, teti apang masa ahi hi. Jesu tawh a kimuh ciangin nak lungdam mahmah a, ho pihpih nuam hi. Topa Jesu kei tawh ki thuah ding hun tam na neikei hi. Ka pa ahi note pa, kei Pasian ahi note Pasian kiangah kaciah phot kul ding hi. Pai in la ka sanggamte kiangah hih thu teng vagen un ci hi.
Topa Jesu in thugentehna khat a gen na-ah, “Mikhat in leiba nih nei a, khat pa in 500 ba in khat pa in 50 ba hi. Anih tuak un loh zolo ahih manin a leibat na pa in maisak hi. Tua nih te lak ah kua lungdam zaw ding hiam? ci-in a dot ciangin, leiba tam anei zawpa lungdam zaw ding hi”, ci-in gen hi. Tua bang lian mahin Mary Magdalene in zong aci damna, Jesu kiang pan angah lianlua ahih manin Jesu a itna lian mahmah hi. Tua ahih manin adam ni pan kipan Jesu thawhkik ni dong Jesu khahsuah loin azui ahi hi.
Thukhupna
Pasian in mi thahatte zum sak nading ni thanem te teel hi. Hun khat lai-a, dawi in a luah, lungsim kicinglo, mite a paampaih khat pen Jesu tawh hong ki muh ciangin, mi manpha mahmah, Topa tawh kinai pen Jesu nung citaktak aa, azui khat hongsuak hi. Hih Magdalene khua miMary nuntakna tungtawnin Pasian in mihing te ninphual pan in laamto a, ulian te tawh an nekhawm sak hi, cih i mu hi. Jesu nungzuihna ah, mitampi in a kipat in zui napi atawp dongin zuisuak zolo hi. Mary Magdalene in a kipat pan atawp dong hoilo, piallo in zuisuak a, Pentecost ni-a, kamciamna ngak 120 te lakah zong kihel cih ih thei hi. A etteh tak mahmah nungzui ahihna I mu hi.
Dotna
Magdalene khua mi Mary bang mun pan hong ki pan hiam?
Bang cidan in Khris tawh ki mu a, nungzui bangci suah hiam?
Jesu thawhkikna bangci dan in tangko masa hiam?
Jesu nung bangci zuih hiam?
Ih etteh theih ding bang om hiam?
