Lungsim Ngaihsutzia Kipuahna
Agelh ~ LTTuang @ Lian Than Tuang
(1)
Mihing khat hong piangkhiat nading pen baihlo hi. Ta neih nading thungen mi tampi om hi. A deih khempeuh in zongh ngah khalo hi. Nau haih cih a kitheih ciang nulepate le ulenau pilepute pen kinuam thei mahmah hi. Naupai sung gamtat annek, cidamna aa kipan lungsim dong aa kidop theih zahin kidawm tek hi. Sumlepaai zongh tampi mah bei hi. Nausuak ciang zongh, sunlezanin kibuaipih aa, ihmut cim zolo kigim kitawl mahmah hi.
Hih zahtakin buaina, sum beina, haksatna le nuamkawm kidopkawmna tawh hong khangkhia mi khat pen, baihno takin i gensiat khak ding, a nu a pa dinmun ah om lehang thuaklah huai mahmah hi. Bangzah takin a sia aa a hoihkei zong a it, a ngai, a khual, a hehpih nuam na om veve ding ahih manin olno takin i ko ziauh khak ding khasiat huai mahmah hi. Tagah khat nangawn singhawm lohawm pan aa piang omlo hi. Ulenau neilote nangawn Pasian piansak, a it mite mah ahi hi.
Mihing ii manphatna thei semsem lehang, mi khatpeuh pen bangbang dan ahi zong, kuakua ahi zong, simmawh bawl ngam huailo ding hi. Minleza dinmun, pilna siamna, theihna hauhna cihte bek enlo aa mihing hihna ngiat i zahtak theih ding kisam pha mahmah hi.
Mi khangtote in mihing bek thamlo, ganhing nangawn it thupisak uhhi. Singkung lopa nangawn it bawl thei uhhi. Nuntakna neilo, tuipite, mualte aa kipan tuikhal mualte dongin a thupit lam tel mahmah uh ahih manin, limtakin it bawl kep bawl don bawl mahmah uhhi.
(1.1)
Hih bangin mihing hihna thupisak aa zahtak theih ding a hoih kawmkal ah, mihing tektek lak pan zongh Pasian nasemte, gam makai, minam makaite, i uzawte, i nu gual i pa gualte nangawn kici ekek, kiko giapgiap cih bang dinmun ah tualniam takin a nungta gamta kampaupau lai kiom hi. Mite in ek a nek vua leh nekpih tuanlo ding i hih mah bangin, hih banga mi gensiasia, mi zahtak theilote tawh kipawl ding, tha piak ding, kikholh ding hoihlo hi. Hih bang thusia gennate lakah i kihel khakloh ding kidop siam huai hi. A hoihlohna, a khialhnate sangin a hoihna, a thupitnate mu theizaw aa gensiatna sang’ pahtawina lam zat siamzawk ding thupi mahmah hi. A hoihlohna a om hangin a hoihna zongh na tamzaw thei hi. I bat zawhlohna zongh tampi na om thei lai hi.
(2)
I vaksa uino khat nangawn sat kha lehang, hong hapkik thei lai ding hi. I vaksa, i huhsa zongh ahi hetlo mi khat pen i neubawl, i kobawl, i zahpih, i gensiat theih nading thu omlo hi. Amau adingin ei bang hi tuan peuhmah i hi hiam? Bangzah ta-in i pil i thei zong, amau hong cial hihkei naak leh, thu hilh ding aa zongh i kilawmkei hi. En zongh na i sak theih bang lian mahin, mi dangte in zongh na nasa thei uhhi, khasia thei uhhi, na thangpai theilua uhhi.
I huhsa, i pattahsa khat ahi zong, amau pen ei neihsa hi tuanlo lai hi. I nu i pa, i zi i pasal, I tate nangawn Pasian aa ahi hi. Ei mahmah nangawn Pasian aa i hi hi.
(3)
Luahsuk mawhna tawh a piang mihingte i hi hi. A kicing kuamah omlo hi. Siatna tawh kihelh leitung aa om i hi hi. A hoihkim cih bang om theilo hi. Tua ahih manin i deih bangin na khempeuh hong pianglo ding hi. I ut bangin thu khempeuh kivaihawmlo ding hi. Hoih i sak bangin thu kigenkimlo ding hi. Maan i sak bangin mite in maan nasa tuanlo thei hi.
Hih bang lak ah, ei ii ngaihsut dan bek a maanpen, a hoihpen i sak khak leh kikhial kha thei hi. Ei sangin a theizaw pen mi na om veve ding hi. I mai aa pai, thu mu masazaw, thu thei masazaw atawm tam mah na om veve ding hi. Tua ahih manin ei deih danin mi dangte in zongh a deih dingin sawmsawm ding hilo hi. Hoih i sak dan bekin mite in a sep ding, a gen ding uh i deih khak ding hilo hi. Ei mah kigim lel ding hi. Ei mah kival lawhzaw thei lel hi. Ei mah kiminsiazaw thei lel hi. Ei mah mi gensia kitangzaw thei lel hi. Ei mah mi neumuhna kithuakzaw thei mawk hi.
I lungkim tawh lungkimloh tawh a kihelh ziazuana lakah, a guh teng pai-in, a sa teng i nek theih ding kisam hi. Hoih i saklohte gengen seloin paihkhian lel ding hoih hi. I deihloh teng pai-in, I deih teng laak siam ding, nek theih ding, nuntakpih zawh ding kisamzaw hi.
Khat veivei ciang, hoih i sakloh, dik i sak hetloh thu pawlkhat pen, kinung teltheih pan hi. Mi khatpeuh i telkhialhna zongh damdamin kitelsiam zo pan thei hi. Maan i sak phatloh khat zongh, i theihna a kibehlap ciang kisangsiamkik cih bang zongh om thei hi. Tua ahih manin, i ngaihsutna tawh a kituaklo khatpeuh a om ciang pau pah, gen pah, nial pah ding sangin kan beh lai phot ding pen khialhna tawmzaw thei hi. Thu hilh ding, encik ding, khialhnate pholak dingin panmun nei, sehna ngah, Pasian sapna om ahih leh bel thutuam hi.
(4)
Thusia thupha cih pen a om den ding ahi hi. Thu hoih tawh hoihlo tawh kihelh ding, tonkhawm ding, kidem ding hi. Tua bang hun ciangin asia apha i khen theih ding kisam mahmah hi. Thumaan le thumaanlo i khinkhai theih ding thupi mahmah hi. A hoih le hoihlo theih theihna nei-in, a hoihte i teel theih ding kisam hi.
A hoihlote thei khinkhian lel aa, hici koihsuk lel ding ahi hi. Ei tawh kisailote i va buaipihluat leh, i va kitulmawhluat leh, I hamphat nading sangin i sup nading piangzaw thei hi. A tawmpen bel i hun manphate sum ding hi hang.
Thumaan le thumaanlo thei khinkhian lel aa gengen seloh ding hoih hi. Hong hazate, hong deihsak kineih aa i siat nading hong genpihte, hong langbawlte, i kiamsuk ding, i gualzawhloh ding, i daupailoh ding a deihte thei khinkhian aa, va kitawng ding, va kinial ding, va kidawngdawng ding cih thadah, i theih lam zongh amau theihsakloh ding hoihzaw hi. Gul bang aa pilin vakhu bang aa dik ding kisam hi.
Siatna khatpeuh nialnial selo ding, va dawng, va kitawng selo aa pelh theih ding hoihzaw hi. Gencianloh a phamawh, vai thupi, thu lianpite ah ahih leh, a hun lem en aa lungsim daitakin awnem tak, kamzol tak tawh hilhcianna i neih theih ding kisin huai hi.
(5)
I mit tawh kituaklo, i ngaihsut dan abanglo, i theih zah thei i saklohte i gen nop leh zongh, amau tung hiam, a innkuanpihte tung hiam khat ah gen khiankhian ding hoih hi. Deihsak man ci aa mi teng ii theih dingin genkhiatna pen daisak nopna hiam, hazatna hiam, mimal khasiat thangpaih man hiam khawng hizaw ding aa, lungsim hoihlo, sinsiat vaizaw hi. Itna deihsakna in thukhual aa mawhna khialhna hoihlohnate selsakzaw hi.
Hoihlohnate pen mimal tungah kigenpih aa, hoihnate pen mimal tung le midangte tungah kigensak ding kilawm hi.
Mimal tungah gen aa hong thusimlo, hong awlmawhlo ahih leh, amah thu a hilh dingin ei pen ki fit nailo, ama thusimh ding zahin bangmah hi nailo, hong awlmawh ding level zongh hi nailo cihna a hi kha mai ding hi. Tua bang hilo aa, thu kihilh theilo, a kipantah theilo khat ahih leh, a thuak ding pen amah hizaw ahih manin, ei le ei kisin gimsak, kisin sosak khakloh ding hoihzaw hi. Thukhen ding pen Pasian hi. Pasian khutsungah i ap ding, thu i ngetsak ding ahi hi.
(6)
Leitung pen a kipeipei hi. Leitung thulelate pen a kippai suak omlo hi. Ni khat aa nai tamlo nangawn a sat zah ahun hunin kikhel hi. Lawhcin hun lawhsap hun, daupai hun beidong hun, hauh hun zawn hun, nopsak hun gentheih hun, nuam hun dah hun cihte pen a om theilua hi. Khuamial hun om aa, khuavak hun zongh om hi. Guah zuk hun om aa, khua phat hun zongh om hi. Bangmah a tanglo, a maan hetlo nai nangawn amaan hun khat om veve lai hi.
Tua ahih manin, tu le tua aa i dinmun tawh gamta kampaulo aa kuam kua i khual siam ding kisam hi. Bangmah hong cih zokei inteh, bangmah hong cih theikei inteh, bangmah hong cih ngamkei inteh ci aa a kuamah peuhmah simmawh khak ding, kobawl neubawl, gensiat daisak khak ding hoihlo hi.
Tulaitakin, hong baan zokei phial zong, hun khat ciang, i phak zawhloh zongh a suak theilua thu hi. Amau khangah ahikei zong i tate khang ah khang kilumlet theilua hi. Pian kilamdang theilua hi.
I bat zawhlohte bek suang tawh kideng hikhin tuanlo hi. I nuai aa om, bangmahlo khat zongh kisimmawh kinuainet kienneu kha theilua hi. I bat zawhloh ahi hetlo, i neumuh, bangmahlo aa i sim, thu aa zongh i koihloh khat pen kihawmthawh kipaupih kigensia, a kiko, a kitai kha theilua hi. Lungsim siangtho tak le deihsakna tak tawh ahih ding bel kisam hi.
I bat zawhlohte bek suang tawh kideng hilo aa, i bat zawhloh dingte zongh suang tawh a deng kha kisuak thei hi. I mai aa paite bek kigensia hilo aa, i mai ah a pai dingte khawng a gensiasia kha kisuak thei hi. Tua ahih manin, mailam hun ding saupi khual aa gamtat kampau thugen laigelh kidop siam ding kaankaan omlo hi.
(7)
Mi gensiasiate, pawlpi taihtaihte, siate kokote, mi simmawh cihte pen amau le amau damdamin a lung uh na zingzingzaw thei hi. Mi tawh kitawngtawng i cihte zongh a innkuan sung uh, a nuntakna uh a eng huailo tamzaw thei hi. Tuletu-in ahi pahkei zong damdamin a lungsimte uh keu semsem, tat le heeknate toi semsem thei hi.
Thulela khatpeuh, van le na khatpeuh pen tulaitakin a hoihpen a maanpen abang phial zong, hoihpen denlo, maanpen denlo hi. Tua bek thamlo, a hoihpen a maanpen kicite zongh, mikim adingin hoihpenlo, maanpenlo lai hi. Tua ahih manin, hoihpen i sak, maanpen i sak khat mittaw sialkhau let bangin let teta ding hilo aa, thulela tampi khinkhai siam ding kisam hi.
(A)
I nuntakna ah Pasian bel masak ding theihsa ci phot ni. Ei mah i kimasak ding kisam hi. I cidamkei leh i masak nop dangte zongh bangmah kimasak thei tuanlo ding hi. I neih masakkei leh, i piak nopte zongh kipia zolo ding hi. I theih masakkei leh i hilh nopte zongh kihilh theilo kigen theilo ding hi. I siam masakkei leh i sep i bawl nopte zongh kisem theilo kibawl theilo ding hi. Tua ahih manin ei mahmah kilamkip masak ding thupi hi.
Mi khat in hong awlmawhkei leh, hong gensiat leh, hong neubawl hong simmawh leh, hong nuainet leh, amau pen i masak ding hilo limlim uh ahih manin, lungsim nawngkaisak taaklo hi. En zongh thudonloin i masak dingte masak san ding ahi hi. I mailam ding i ngimna i tupna mah mitsuan aa i mabaan mah I khuat san ding ahi hi.
(B)
Mite' phat ding utluat kullo hi. I hihna hoih peuh leh, a hoih a deihte in hong phat ding hi lel hi. Mite ii thupitsak ding deihluat kullo hi. I hihna thupi peuh leh, thupitna a telte in thupi hong sa ding hi lel hi. Mite ii thukimpih ding aa, thu gen kullo hi. Ei ii dinmun kiptakin len aa dinpihin thu i gen ding hizaw hi. Ei ii ngaihsutna tawh kituak, hoih i sak dan a kibang mi na om veve ding aa, tuate in hong thukimpih ding hi. Tua ahih manin, mite deih dingin thugen ding, mite paktat dingin nasep ding kullo hi. Thuhoih, thumanpha, mite ading phattuamna nei a gen, a sem i hih ding a thupi hi ziau hi.
(C)
Hong langpan, hong gensia, hong zahpih, hong neubawl, hong koko cihte a vek phialin pen I nuntakna ading a kisamlo vive hizaw thei uhhi. I khantoh nading phattuamna hong pia tamlozaw thei hi. Tua bangte pen a manpha i hunte bei lawh aa va buaipih ding hilo hi. I nuntakna pen hun tawh a kilam hi. Tua ahih manin i hun pen i nuntakna hi aa manpha mahmah hi. Sum i cil zat tentan theih danin i hunte i cil zat theih ding hoih mahmah hi. Sum I hawmthawh bnagin i hunte i hawmthawh theih ding hoih mahmah hi. Bangmahlo teng peuh tawh i lungsim a nawngkai khak ding, hun i mawk beisak khak ding pammaihlua hi.
Ldam
LTTuang
30 June 2023
