Lungdamna Koi-ah Om?
Agelh ~ En Khat Thang
Ni khat, pawlpi khangno Pastor khat in, a khangnote kaikhawmin, thusinna khat neih pih hi. Khangno 200 tangkhawng pha in, gualnop theihna ding khat hong vai hawm hi.
Mutpuak a kibang vive khatta hong hawmin, khangnote mutpuak tungah a mau min ciat gelh sak hi. Mutpuak teng hong kaikhawmin, Innkhan dang khat ah a vekin va koih hi. Pastor pa in, "Khaileh guai, tunah minutes 5 sungin thakhat thuin no min tuang mutpuak ciat hong zong un," ci-in mutpuak koihna innkhan sung ah lut sak hi.
Khangnote zong kidelh ngeingai in, tua Innkhan sungah hong lut uh hi. Khatlekhat kiphu, kisawnin, kinawkin, ku ziazuain mangbang liangin a mau mutpuak ciat hong zonguh hi. Minutes 5 hong cinlian ciangin Pastor pa in, bell hong tum ta hi. Khangno khempeuh hong pusuak khia in, "kuatengin na mupuak uh mu?" ci-in hong dot leh khangnote dai dipdep in a mau min tuang mupuak a mu khat zong hong om lo hi.
Tua ciangin Pastor pa in, khangnote kiangah "tun Innkhan sungah lutkik ding, mutpuak na muh masak peuh uh tawm ding, tua mutpuak tung a tuang min neite pia pahpah ding" ci-in sawl leuleu hi. Minute khat sungin olno takin khangno khempeuh in a mau mutpuak ciat hong ngah kim uh hi.
Pastor pa zong thugen hong kipanin; “Kong it khangnote aw, mihingte i nuntakna ah i lungdamna ding thu pen tu a mutpuak zon lian mah tawh kibang hi. Eite in i lungdamna ding koi-ah om cih thei lo-in, saklekhangah i zong niloh zel hi. I lungdamna ding pen mi dangte lungdamna nuai ah ana kidelhphah kha na hi gige hi. Tua ahih manin nang lungdamna ding na muh nop leh mi dangte lungdamna ding pia masa in, tua hi leh nang lungdamna ding hong kipia ding hi” ci-in thusinna hun kipatpih hi. Eite in zong i nuntakna ah hi thu zat dingin i thusunna ahi hi.
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
