Leitung Ading Kilemkikna A Nungta Pasian’ Thu
Agelh ~ Kap Za Khai (Photoh)
2023 kum, ‘Lai Siangtho Nipi’ adingin Myanmar Bible Society thu bulphuh in “God’s Word: Reconciliation for the World” (Gen. 45:1-15; Ps. 85:8-13; Isa. 11:6-9; 2 Cor. 5:17-21; Eph. 2:13-18; Col. 1:20-23) hi a, Zokam in, ‘Leitung ading Kilemkikna a Nungta Pasian’ Thu’ ci-in ka let a, tukum Lai Siangtho nipi hun ah Pasian’ kammal sungah nakpi-in thuklut in nuamsa khawm ding hihang.
Lai Siangtho nipi pen nungakno Mary Jones ii Lai Siangtho deihluatna leh Lai Siangtho bu khat a ngah dongin cihtak takin a hanciamna tungtawnin hong piangkhia hi a, ama tungtawnin tuhun ciangin Khristian khempeuh in Lai Siangtho nuamtak kizang thei ihi hi. Mary Jones tungah i lungdamna lian mahmah a, a kammal tuni dong hong nungtasak i biak Pasian tungah i lungdam in i pahtawi hi.
A Nungta Pasian’ Thu
Pasian’ thu kigelhna Lai Siangtho pen a nungta ahihna in tua pen Pasian’ humuap ahihman ahi hi (2Tim. 3:16-17; 2Pet. 1:20-21). Banghang hiam cihleh Pasian thu in nungta in vanglian a, langnih a hiam namsau sangin a hiamzaw hi. Lungsim le kha, guh le tang le guhngekte pailet in khentel a, lungsim ngaihsutna le tupna ngimnate zong a theitel hi (Heb. 4:12). Tua bangin Pasian’ humuap hihna leh nungta ahihna hangin Pasian’ Thu in leitung mite lungtang, ngaihsutnate khel thei in, khantohna pia thei takpi ahihna pawlpi tangthu sungah kimuthei hi.
Leitung Ading Kilemkikna Thupha
Piancil 3 sungah Adam le Eve mawhna sungah a pukna uh hangin leitang le mihing in Pasian samsiatna ngah bek tham loin mawhna hangin Pasian tawh kigamlatna, kilemlohna, gentheih haksatna cihte kithuak hi. Hih siatnate pan kiheikik theih nadingin mihing’ lampan bangmah kisemthei lo hi. Ahi zongin Pasian mahmah in mawhneite leh Amah kizop kilemkik theih nading lampi khat hong geel pah a, tua pen Tapa Jesuh hong sawl in, ama genthuakna, ama sihna leh a thawhkikna tawh leitung mite hong tankhia khin ahi hi. Hebrew laikhak deihna bang hileh Jesuh in a pumpi le a sisan tawh Pasian tungah khatvei biakpiakna a piak bek tawh a tawntung ading kicingsak cih hi. Tua Jesuh’ sisan hangin mawhneite in Pasian tawh kilemkikna a ngahkik ihi hi. Pasian’ thu in koi bangin hamphatna hong pia hiam cihleh;
1. Pasian’ Thu in mawhna dingpan hong kem hi (Late 119:11)
2. Thuman thutak zangin ama utthu tawh eite a hong piangsak tawm hi (Jam. 1:18)
3. Thuman in note hong suaktasak ding hi (Jhn. 8:32)
4. Ka hong thugennate hangin note a siang na suak khinzo uh hi (Jhn. 15:3)
5. Amah in thu vaikhak in amaute damsak (Late 107:20)
6. Na thute gentelna in khua vaksak in thu theihtelna hong guan (Late 119:130)
1. William Carey- India gammite tampi Pasian Kiang A Puakpa
1793 kumin William Carey in India gamah mission semin kuankhia a, India gam sunga a lipkhap huai innkuan nuntakna, biakna, pilna lam, kizopna, sibuazi, kumpi ki-ukna cihte a hoihzaw in na khelsak zo hi. Ama nasepnate in India gam khantoh kikhelna piangsak a, India mi tampi zong Pasian kiang tunpih in Pasian tawh kilemkikna piazo hi. Ama sepna huhau hang mahin tu-in India gam pen thu-ummi nakpi in a khanna gam hi a, nisim in Khristian a suak om den hi. Khristian biakna khanzia a kantel Rev. Dr. J. N. Manokaram genna ah, India gamah Khristian million 60 omin, biakinn vekpi kigawm 400,000 ah kikhawm uh in, pawlpi kemsia, evangelistte vekpi kigawm 300 000 te in thu-um nailote kiangah lungdamna thu tangko in kha mangthang man uh hi, ci hi. India missionary tampite zong tualsung bek tham loin gamdang mun tuamtuam ah pai in mission sem uh hi. Hih in William Carey ii India gam sungah Pasian’ Thu tawh kilemkikna thu a tangkona ahng ahi hi.
2. Hans Nielsen Hauge – Lai Siangtho tawh Norway gam a khangtosak pa
Mi tamzaw in Norway gam pen leisung tuipi pan a piang namgimtui (oil) tawh a hau bangin ngaihsun uh hi. Namgimtui ngah napi’n a zawng gam tam mahmah hi. Norway gam in namgimtui a neih hangin a gam mite zawng mahmah hi. A gam sungah kial tung thei zel in mite lampi nawl tengah gilkial in singgah ne tawm uh a, pawlkhatte gilkial in si uh hi. Sanginn le College cihte om lo hi. Gamdangte’ ukna nuai ah kum tampi sung om kha in, suakta takin sep theihna, bawl theihna, kikhawlkhop theihna nei lo uh hi.
Tua dinmun panin tulaitak a gam hau dinmun hong koici tun hiam cih ngaihsun leng abeisa kum 200 hun lai a nungta ngei Hans Nielsen Hauge a kici pa hang hi a, Hauge pen kum 15 a phak ni-in piangthak in mission nasep phuankhia hi. Pasian thu genin vak kawikawi ahih manin thuneite in manin thongkhia zel hi. 1796 leh 1804 kum sung Hauge in Lai Siangtho bute khua khat khit khua khat hawmkhia ahih manin a gambup un Lai Siangtho sim theihna hunpha ngah uh hi. Tua hangin lunglawpna leh lametna meivak zawnna thuak Norway gam sungah hong tangkhia ta hi. Hauge makaihna tawh gammite in kikhawm, thungen, Lai Siangtho sim in Pasian’ thu bangin a nuntak theih nadingun kihawnthawn uh hi. Joseph Shaw gelh ‘Pulpit Under the Sky’ laibu sungah ‘Pasian in amaute lungsim thak tawh mi thak hisak in amau tenna khualetui ah mun thak phutsak hi,’ na ci hi. Norway gam pen leivui pan a domto pen Pasian’ thu nungta hi a, tua pen Hauge ii hanicamna thupha kici thei hi. Hauge ii nasepna in Norway gam ading bek tham loin gamdangte ading zong phattuamna ngahsak hi. Norway gamin gamdang tengah missionary tul val bang khahkhia hi. Tua hun lai in Norway gam pen leitung ah mission khah a tampen gam ahi hi.
3. Adoniram Judson- Kawlgam ah Kilemkikna thupha hong puak pa
Judson pen USA gam panin India, India panin Kawlgam ah lungdamna thu puakin hong pai missionary hi a, Kawlgam sungah Lai Siangtho teina, laihawm tuamtuam hawmna, kam tawh genkhiatna cihte tawh Pasian’ thu nungta hong tangkokhia a, Kawlgam ah Pasian leh mawhneite kikal kilemkikna thu hong bawl pa ahi hi. Ama kipiakkhiatna hangin tu-in Kawlgam ah Khristian pawlpi tampi piangkhia khin a, mission field tampi kisemsem lai hi. Ama hong letkhiatsak Kawl Lai Siangtho pen tuni dongin translation a hoihpen Lai Siangtho in kiciamteh a, thu-ummite leh thu-umlote’ sim le kanin om ahi hi.
Leitungah a khangto masate leh a hau gamte’ tangthu i et ciangin tua gamte pen Lai Siangtho bulphuh in a kalsuan a nungtate ahihna siangtakin kimuthei hi. Gentehna in USA. Bang hang hiam cihleh Lai Siangtho in Pasian’ deihna hong theitelsak banah, Pasian leh mawhneite kikal kilemkikna thu hong pulak in, tua thu koicih ngah ding cih zong limtak hong hilh ahih man ahi hi.
Tua ahih manin leitung mite in kilemna kumpi taktak a theihnop, a muhnop uh leh Lai Siangtho sim uh hen. Pasian tawh kilemkikna a deih uh leh Lai Siangtho sim uh hen. Pasian sunga kilemkikna thupha limna a ngah nop uh leh Lai Siangtho mah sim uh hen. Amen.
