LAWHCINNA-AH MIDANG ZONG KIHEL HI
Agelh ~ T. Sawm Lian
Khatvei sangsia bangzah hiam in mihing nuntakzia a theihbeh theih nadingun nasem a guaih mi 2000 tungah dotna kibang dong uh a, a dotna uh pen, “Na sumbawlna mun a nasem na khawlsak kik mi 3-te ngaihsun kik inla, a sepna gam, a nasep neu leh liat, leh a khasum lam uh tuat het loin, na tawpsakna bang hang hiam?” cih ahi hi. A dawnna tampen uh ahih leh lamdang mahmah, “Seppih haksa lua!” cih ahi hi.
Theodore Rooseveltin, “Lawhcinna dinga a kisam penpen in midangte tawh i kizopna bawl hoih ahi hi” ci a, John D. Rockfeller in, “Ni nuaia om na khempeuhte i kholhpihdan sangin, i mihingpihte i kholhpihdan i thupingaihsut zawk kisam hi” ci hi. Bangci bangin nasep siamin, thahatna, septheihna i neih hangin, i mihingpihte tawh na i sepkhop theih kei leh kivalden ding cihna hi.
Na mihingpih te tawh kizop dan nasiam nak leh na nekzonna- ah 85% na lawhcing ding a, na nuntakna ah lungnopna leh lungkimna 99% hong pia thuah lai ding hi. Tua bang liangin hih thu pen manpha hi.
Baih taka genteh theih pen innkuan kizopzia pan ahi hi. Innkuan nuntak a nop a, a kithalawp leh na khempeuh sep nuam kisa hi. Innkuan nuntak a buai leh na khempeuh in hong taisan khin thei hi. Nupa kal haksatna nei kawma mi lawhcing tamlo ding hi. A ciil in lawhcing bangin a kidawk hangin sawt kimang lo hi. Tua ahih manin, i seppih, i pu, i nasemte, leh van hong leisakte tawh i kizopna a hoih nak leh ‘lawhcinna tawh kinai hang’ cih theih ding ahi hi.
Hih bang lianga leitung a khantoh zawh, set in nakpi’n mihing a thamaan sak zawh ciangin zong mite in America gama sumbawlna muna kizopna vai a sinna uh panin ulian (officer) khat in a nasep mun li a khen munthum (3 /4) pen a mihingpihte adingin zang hi, kici hi.
Tua ahih manin, kha-mi na hi a, thu-umlo mi na hi a, bang mi bang mi na hi zongin, leitungah lawhcin na ut leh na mihingpihte tawh kizopna hoih na neih ding kisam hi.
Nuntak Manphazaw Tawh Lawhcinna (Laibu)
