LAMSIAUHNA LE CIDAMNA
Nipi khatin nga vei, khat vei siauhin minutes 30 ta bang lamsiauhna hangin a nuai-a phattuamnate kingah thei hi.
1. Lutang
Lamsiauhna hangin khuak sunga om sihuite ah si luanna thahatsak le khuak sunga ngaihsut theihna a piangsak endorphin tam thohkhiasak thei ahih manin ngaihsutnate siangsakin zong thahatsak thei hi.
2. Tuap
Lamsiauhna hangin a nuai-a bangin tuap nasepna thahatsak hi.
(a) Lungtang le hu-diikna thaguite ah Oxygen tam puaksak zo hi.
(b) Apheipai sazangte thahatsak hi.
(c) Hu-diikna thagui-bawk natna phatuamsak thei hi.
(d) Zatep nopna lungsim kiamsak hi.
3. Nung
Manman a, taina panin kawng natna kingah thei hi. A hang pen, i tai ciangin, i nunglama om sazangte, thaguite kinak lawh ahih hang ahi hi. Lamsiauhna hangin tua bang kawng natna piang lo bek hi loin, tua thaguite thahatsak hi.
4. Guh
Guh cidamna le thahatna pen, lamsiauhna, van domna (weightlifting) le Calcium manmana neknate panin kingah thei hi. Lamsiauhna hangin guhpa natna phatuamsak thei hi.
5. Khuak
Lamsiauhna hangin khuak sunga om sihuite, a tonna, a zanna thahatsak ahih manin pumpi zaw natna ngah theihna panin phatuamsak hi. Khuak sungah sihuite a dal thei sikhalte a pian loh nadingin zong thapia hi. Khuak le luvun kikala om sihuite ah siluanna mansak ahih manin lutang natna panin zong phatuamsak thei hi.
6. Lungtang
Lamsiauhna hangin lungtang ading a nuai-a phattuamnate piangsak hi.
(a) Si kisaina ze-olsak thei hi.
(b) Si netna tha kiamsak thei hi.
(c) Sihui sung, a khak thei si-thau kiamsak thei hi.
(d) Lungtang natna ngah nading kiamsak hi.
7. Gilpi
Lamsiauhna hangin gilpi’ nasepna thahatsak ban ah gilpi thau zong kiamsak hi. Tua ban ah a nuai-a phattuamnate kingah thei lai hi.
(a) Tawmtawma tai theuhtheuhna tawh a kibang zahin Calorie kuangsak thei hi.
(b) Annek khit minute 30 sungin lamsiauhna hangin an sunga kihel Calorie 3% panin 10% dong kiamsak zo hi.
Ref:
GBC Periodical
Source:
ZOMKA (Zomi Khristian Aw)
